Makunu ku wa hi kumbheleni ka lembe ga 32 Nguveni ya Hina, niku ku wo hundza cipimo ca malembe manharu Jesu na a bhabhatisilwe. Ka cikhati leco, Jesu ni vapizani vakwe va wa ha hi ku suka le Jerusalema Mubuzweni wa Mixaxa, niku zvi wonekisa ku khwatsi va wa nga seya kule. (Luka 10:38; Johani 11:1) Ka 6 wa tihweti to gumesa ta ntiro wakwe, Jesu i no mbheta cikhati co tala na a tira le dhistrito ga Pereya gi nga hi le tlhatuko wa Congo wa Jordhani, hakuva zvi wa ha laveka a ku ku chumayelwa ka wutshamu lego.

Andzhako ka Phasika ga 30 Nguveni ya Hina, Jesu i wa mbhetile tihweti to kari na a chumayela lomu Judhiya a ta na a hundza hi lomu Samariya aya Galileya. Hi cikhati ca Phasika ga 31 Nguveni ya Hina, a vaJudha va le Jerusalema va wa zamile ku mu daya. I no guma a mbheta lembe ni khihlanya legi gi nga landzela na a gondzisa nguvhunguvhu lomu Galileya, ku nga hi le N’walungu wa Judhiya. Ndzeni ka cikhati leco, a vanhu vo tala va no vhumela ku mu landzela. A cikhati a nga hi le Galileya, i gondzisile vapostoli vakwe a tlhela a va ruma ku famba va chumayela aku: Fambani mu kanela muku: “A Mufumo wa tilo wu tshinele.” (Matewu 10:5-7) Makunu, hi 32 Nguveni ya Hina, i no longisela tsima ga ku chumayela lomu Judhiya.

Ka tsima lego, Jesu i no sangula hi ku hlawula 70 wa vapizani a va ruma ku ya chumayela. I no va ava hi vambiri vambiri, ku se huma 35 wa mitlawa basi ya vachumayeli va Mufumo. Va no ya tira cipandzeni leco, lomu ‘a kutshovela [ku nga hi] ka hombe, a zvitiri [na zvi hi] zvi tsongwani’. (Luka 10:2) A vapizani lavo va 70 va wa fanele ku ranga vaya lomu Jesu a nga wa ta guma aya. Va wa fanele ku famba va hanyisa vababyi va tlhela va chumayela a mahungu yo fana ni lawa Jesu a nga kari a chumayela.

A vapizani lavo va wa nga faneli ku chumayela nguvhunguvhu lomu masinagogeni. Va wa fanele ku yela vanhu lomu mitini yabye. I no va byela lezvi: ‘Ni ka yihi yindlu leyi mu ta nga nghena ka yona, a ku ranga wulani, muku: A kurula a kuve ka yindlu leyi! Loku a hi kona laho loyi a randzako kurula, a kurula ka n’wina ku ta tshama kakwe’. Jesu i no va byela ni lezvi va nga fanele ku chumayela, aku: “Muku ka vona: A Mufumo wa Nungungulu wu tshinele ka n’wina.” — Luka 10:5-9.

A zvileletelo a nga nyika lava va 70 ka khati lego, zvi fana ni lezvi a nga nyikile lava va 12 kwalomo ka lembe gi nga hundzile. I no va tlharihisa lezvaku a hi vontlhe va nga wa ta va amukela hi mandla mambiri. Kanilezvi, a ntiro lowu va nga wa ta ti karata va maha, wu wa ta longisela vanhu va timbilu ti nene lezvaku vava ni manyawunyawu ya ku amukela Hosi Jesu ni ku gondzisiwa hi yena a cikhati a nga wa ta ya chumayela.

Na ku nga se hundza cikhati co leha, a vapizani lavo va 70 va no tlhela ka Jesu na va tsakile nguvhu, va yaku: “Hosi, hambu ni madhimoni ma  hi ingisa hi vito ga wena.” Jesu i no tsaka nguvhu hi mubiko lowo wa wu nene, aku: ‘Ndzi no wona Sathani na a wile hi le tilweni kota cingwalangwandza. Langutani, ndzi mu nyikile ntamu wa ku kandzihela tinyoka ni tihume’. — Luka 10:17-19.

Hi magezu lawo, i wo tiyisekisa vapizani vakwe lezvaku va ta hlula zvikarato lezvi va nga wa ta kumana nazvo, va kandzihela tinyoka ni tihume hi ndlela yo fananisa. Ahandle ka lezvo, zvi va tiyisekisile lezvaku cikhatini ci nga hata, Sathani i wa tawa hi le tilweni. Jesu i no tlhela a vhuna vapizani lavo va 70 lezvaku va wona leci ci nga hi ca lisima nguvhu. I te: “Mu nga tsaki hi lezvi a mimoya yi mu ingisako; kanilezvi tsakani hakuva a mavito ya n’wina ma tsalilwe le tilweni.” — Luka 10:20.

Jesu i wa tsakile nguvhu, a se dhumisa Papayi wakwe mahlweni ka vanhu hi lezvi a nga kari a tirisa vanhu va nyalidede hi ndlela leyo yo hlamalisa. I no guma a byela vapizani vakwe, aku: ‘Ma katekile a mahlo lawa ma wonako lezvi n’wina mu zvi wonako; hakuva ndziku ka n’wina: A vaphrofeti vanyingi ni tihosi va wa xuva ku wona lezvi mu zvi wonako, a va zvi wonangi; ni kuzwa lezvi mu zvi zwako, a va zvi zwangi.’ — Luka 10:23, 24.