Hi Sabhadho go kari, Jesu na a fambafamba lomu Jerusalema ni vapizani vakwe, va no wona wanuna a nga tolovela ku kombela zomola. A wanuna loye i wa hi cikhumu kusukela a pswaliwa. A vapizani vakwe va no mu wutisa, vaku: ‘Rabi, himani a nga wonha, lezvi a nga pswaliwa na hi cikhumu, hi yena kutani vapswali vakwe ke?’ — Johani 9:2.

A vapizani va Jesu va wo pimisa ku kuzvilava a munhu a nga wonha na a ha hi lomu rumbyini ga mamani wakwe. Jesu i no va hlamula aku: “Yena a nga wonhangi hambu ni vapswali vakwe; kanilezvi zvi mahekile lezvaku a ntiro wa Nungungulu wu fela ku wonekeliswa ha yena.” (Johani 9:3) Hikwalaho, a wanuna loye a nga pswaliwangi na a hi cikhumu hi kota ya ciwonho co kari a ci mahileko kutani ci mahilweko hi vapswali vakwe. A vanhu vontlhe va pswaliwa na va nga mbhelelangi hi kota ya ciwonho ca Adhamu, leci ci mahako ku va tshuka va pswaliwa ni wulima go kari, go kota wukhumu. Hambulezvo, a kuva a wanuna loye a hi cikhumu, zvi mahile ku Jesu a kombisa mitiro ya Nungungulu, a ku fana ni lezvi a nga yi kombisile ka makhati man’wani hi ku hanyisa vanhu.

Jesu i no khanyisa lezvaku a mitiro leyo yi wa fanele ku mahiwa hi cihatla. I te: “Hi fanele a ku tira a mitiro ya loyi a ndzi rumileko, na ka ha hi mumu; a wusiku gata, laha munhu a nga zvi kotiko ku tira. Laha ndzi nga kona tikweni, ndzi kuwonekela ka tiko.” (Johani 9:4, 5) Kunene, ndzeni ka cikhatanyana, Jesu i wa ta dawa ava munyameni wa cilahla, lomu a nga wa ta kala a nga zvi koti ku maha nchumu. Lezvo na zvi nga se maheka, Jesu i wa hi kuwonekela ka tiko.

Kanilezvi, xana Jesu i mu hanyisile a wanuna loye? I mu hanyisile. I zvi mahisile kuyini? I no phela lahasi, a maha ndzhope hi mari zvonake a tota yo kari lomu ka matihlo ya wanuna loye, aku: “Famba u ya hlamba citivaneni ca Silowame.” (Johani 9:7) I no famba futsi. Loku a hlambile, i no sangula ku wona. Hi nga alakanya lezvi a nga tsakisa zvona laha a nga sangula ku wona hi khati go sangula wutomini gakwe!

A vaakelani vakwe ni lava va nga kari va mu tiva na a hi cikhumu va no hlamala, va wutisana vaku: “A hi yena wanuna loyi a nga tolovela ku kombela zomola ke?” A vokari vaku: “Hi yena!” A van’wani va no kaneta, vaku: “A hi yena, vo fana.” Kanilezvi yena aku: “Hi mina futsi.” — Johani 9:8, 9, NM.

Hikwalaho, va no mu wutisa vaku: ‘A mahlo ya wena ma . . . vhululisilwe kuyini?’ I no hlamula, aku: ‘Loyi a vitwako Jesu i no maha ndzhope, a tota matihlo ya mina, aku ka mina: Famba Silowame, u ya hlamba; lezvo ndzi no famba, ndzi ya hlamba, ndzi se wona.’ Vaku: “I kwihi yena ke?” A wanuna loye aku: “Ahati.” — Johani 9:10-12.

A vanhu va no famba naye ka vaFarisi. A vaFarisi vonawu va no mu wutisa ku zvi mahisile kuyini a kuza a wona. I no va hlamula aku: Loyi a nga ndzi hanyisa ‘i no chela ndzhope matihlweni ya mina, ndzi hlamba, makunu ndza wona.’ Zva dlunyateka ku a vaFarisi va wa fanele ku tsaka zvin’we ni wanuna loye wo kombela zomola. Kanilezvi, a va  tsakangi. A vokari va no wulawula kubiha hi Jesu, vaku: “Loyi munhu a ngati hi ka Nungungulu, hakuva a nga hlayisi a Sabhadho.” Hambulezvo, a van’wani va no wutisa vaku: “A muwonhi a nga mahisa kuyini a zviwoniso zva kunghahi ke?” (Johani 9:15, 16) Lezvo zvi no maha ku kuva ni mawonela yo hambana.

Makunu, lezvi va nga kari va banana tihloko, va no wutisa wanuna loyi a nga hanyisiwa wukhumu, vaku: “Wena u yini ha yena, lezvi a nga ku hanyisa mahlo ke?” I no hlamula na a nga kanakani aku: “Muphrofeti.” — Johani 9:17.

A vaFarisi a va kholwangi. Va no alakanya lezvaku Jesu ni wanuna loye kuzvilava va no boha cikungo ca ku kalavela vanhu. Va no guma va wona lezvaku a ndlela ya ku tsema mhaka leyo, ku wa hi ku wutisa vapswali va kona a ku hakunene i wa pswalilwe na a hi cikhumu ke.