Loku Jesu a hi Mubuzweni wa Mixaxa le Jerusalema, i no tsaka nguvhu hi ku wona lezvaku a vanhu vanyingi va wa ‘kholwa ka yena’. Kanilezvi, a varangeli va wukhongeli a va tsakangi hi zvona. Hikwalaho, va no rumela vavanuna kasi va ya khoma Jesu. A vavanuna lavo, va wa tira kota maphoyisa ya wukhongeli. (Johani 7:31, 32) Hambulezvo, Jesu a nga zamangi ku fihlala.

I no simama ku gondzisa kubaseni kwalomu Jerusalema, aku: “Ka ha hi cikhatanyana na ndza ha hi na n’wina, zvonake ndza famba ka Loyi a ndzi rumileko. Mu ta ndzi lava, kanilezvi mu nga ta ndzi kuma; ni laha ndzi nga kona, n’wina a mu zvi koti kuta.” (Johani 7:33, 34) A vaJudha a va zvi zwisisangi. Hikwalaho, va no wutisana lezvi: “I taya kwihi, laha hi ta nga kala hi nga mu kumi ke? Xana i xuva kuya ka lava va hangalakileko cikari ka vaGreki, a ya gondzisa vaGreki ke? I mhaka muni leyi a yi wulako yaku: Mu ta ndzi lava, kanilezvi mu nga ta ndzi kuma; ni laha ndzi nga kona, n’wina a mu zvi koti kuta”? (Johani 7:35, 36) Jesu i wa wulawula hi kufa ni kuvhuxiwa kakwe aya tilweni. Makunu a valala vakwe a va nge mu landzi seyo.

Makunu a siku ga wu 7 ga festa gi no chikela. Mixo ni mixo ka masiku ya festa, a mupristi wo kari i wa halata mati ma nga khiwa Citivaneni ca Silowame, kasi ma khulunga kala laha tshinyeni ga alati ya tempeli. Kuzvilava Jesu i wo va alakanyisa mhaka leyo laha a nga tlakusa gezu aku: “Loku munhu azwa tora, a ate ka mina, a tanwa. Loyi a kholwako ka mina, hi lomo cifuveni kakwe ku ta khulunga a micongo ya mati ya wutomi”. — Johani 7:37, 38.

Jesu i wa wula lezvi zvi nga wa ta maheka a cikhati leci a vapizani vakwe va nga wa ta totiwa hi moya wa ku basa va rindzela ku vitaniwa va ya hanya tilweni. Lezvo zvi mahekile hi Pentekosta wa lembe gi nga landzela loku makunu Jesu a delwe a guma a vhuka. Ka siku lego, a vapizani va Jesu  va nga totilwe hi moya wa ku basa, va no sangula ku chumayela lisine. Ka cikhati leco, ku no sangula ku khulunga mati ya wutomi.

Laha a vanhu va ngazwa lezvi Jesu a nga kari a gondzisa, a vokari va te: E, “loyi Muphrofeti” futsi. Zvi wonekisa ku va wa wula a muphrofeti wa hombe ku hundza Mosi, loyi a nga tsumbisilwe. A van’wani vaku: “Loyi hi Kristu.” Kanilezvi a van’wani va no kaneta vaku: “Xana Kristu a nga huma Galileya ke? Kasi mitsalo a yi wuli lezvaku Kristu i ta huma lixakeni la Dhavhidha ke, hi le Bhetlehema, a mutini lowu Dhavhidha a nga hi ka wona ke?” — Johani 7:40-42.

A vanhu va wa hi ni mawonela yo hambana. Hambu lezvi a van’wani va nga lava ku Jesu a khon’wa, i hava a nga tiya ku mu henya. Laha a vavanuna lava va nga rumilwe ku ya khoma Jesu va nga tlhela na va nga hi naye, a vaFarisi ni vapristi va hombe va no va wutisa vaku: “Hikuyini mu nga kala ku wuya naye?” A vavanuna lavo vaku: “A hi se tshuka hi wona munhu wa ku wulawulisa lezviyani”! A varangeli va wukhongeli va no kwata nguvhu, va sangula ku va poyilela vaku: “A mu no ya kanganyiswa n’winawu ke? Kova ni mufumeli kutani muFarisi wo kari a kholwako kakwe ke? . . . A citshungu leci, ci nga wu tiviko Nayo, ci rukatelwe”! — Johani 7:45-49, NM.

Ka cikhati leco, ku wo hundza cipimo ca malembe mambiri ni khihlanya a muFarisi wo kari tlhelo ciro ca Hubye ya vaJudha wa ku hi Nikodhemusi na a yile ka Jesu ni wusiku a ya bhula naye a tlhela a kholwa ka yena. Makunu laha Nikodhemusi a ngazwa lezvi va nga wula a vaFarisi-kulobye, i no tiya hlana a yimelela Jesu, aku: “Xana a Nayo wa hina wa kona munhu na va nga rangangi hi ku mu hlola, ni ku tiva lezvi a zvi mahileko ke?” Va no ti yimelela, va mu hlamula vaku: “Na wena u wa le Galileya ke? Hlola u wona lezvaku . . . a ku [na] . . . muphrofeti [a nga wa ta huma] hi le Galileya.” — Johani 7:51, 52.

Lisine ku a mitsalo a yi wuli hi kukongoma a ku le Galileya ku wa ta huma muphrofeti. Hambulezvo, a Mhaka ya Nungungulu yi wa komba lezvaku Kristu i wa tata hi kwaleyo; yi phrofetile lezvaku a vanhu va le “Galileya ga vamatiko” va wa ta wona “kuwonekela ka hombe”. (Isaya 9:1, 2; Matewu 4:13-17) Ahandle ka lezvo, Jesu i pswalelwe Bhetlehema niku i wa hi wa lixaka la Dhavhidha, kota lezvi zvi nga phrofetilwe. Hambu lezvi kuzvilava a vaFarisi va nga zvi tiva khwatsi lezvo, hi vona va nga hangalasa a mahungu yo kala hloko lawa a vanhu va nga hi nawo xungetano hi Jesu.