Kusukela loku Jesu a bhabhatisilwe, i no sangula ku tiveka nguvhu. Makunu ku wa hundza malembe yo kari na a sangulile ku tira. A kutala ka vaJudha va wa zvi wonile a zvihlamaliso zvakwe. A nduma ya lezvi a nga zvi maha yi wa hangalakile tikweni gontlhe. Makunu, laha Mubuzweni wa Mixaxa le Jerusalema, a vanhu vo tala va wo mu lavetela.

A vanhu va wa nga mu tivi khwatsi Jesu. A vokari va waku: “Munhu [wa mu] nene”. A van’wani vaku: “Ahihi, wa kanganyisa vanhu.” (Johani 7:12) Zvontlhe lezvo va wa zvi bhula makhahaleni niku zvive ka masiku yo sangula ya festa. Kanilezvi, i hava a nga tiya ku yimela Jesu mahlweni ka vanhu, hakuva vontlhe va wa chava varangeli va vaJudha.

Laha a festa yi nga kari yi famba, Jesu i no ya gondzisa le tempeleni. A kutala ka vanhu va no hlamala hi lezvi a nga kari a gondzisa, hakuva i wa nga gondzangi lomu zvikoleni zva varabi. Hikwalaho, va no wutisana vaku: “A munhu loyi i tivisa kuyini mitsalo, lezvi cima a nga gondzangi ke?” — Johani 7:15.

Jesu i no tlhamusela aku: “A gondzo ya mina a hi ya mina, kanilezvi ya loyi a ndzi rumileko. Loku munhu a xuva ku maha kurandza ka Nungungulu, i ta yi tiva a gondzo leyi, . . . [lezvaku] yita hi ka Nungungulu, kutani ndzo ti wulawulela mina wutsumbu.” (Johani 7:16, 17) Lezvi Jesu a nga kari a gondzisa zvi wa yelana ni Nayo wa Nungungulu. Hikwalaho, va wa fanele ku zvi wona ku a nga ti laveli wudzundzo, kanilezvi i wa lava ku ku dzundzeka Nungungulu.

Jesu i no gumesa aku: ‘Mosi a nga mu nyikangi a Nayo ke? Hambu zvi hi tano, a nga kona mun’we wa n’wina a . . . [ingisako] Nayo. Hikuyini mu lavako ku ndzi daya?’ A vokari va wa nga zvi tivi a ku va kona va hlotako tindlela ta ku mu daya, kuzvilava hi lava va ngata hi le handle ka dhoropa. Makunu, ko khwatsi ka vona zvi wa nga zwisiseki a ku ku ngava ni munhu a lavako ku daya mugondzisi wa mu nene ku khwatsi hi yena. Hikwalaho, va no mu wonisa ku khwatsi a ti teki, va se: “Wena u na ni dhimoni! Himani a lavako ku ku daya?” — Johani 7:19, 20.

Hi lisine, ku wo hundza lembe ni khihlanya a varangeli va vaJudha na va zamile ku mu daya andzhako ka loku a hanyisile wanuna hi Sabhadho. Ka khati legi makunu, Jesu i no paluxa a tshamela gabye ga xapi hi ku tlhamusela zvilo zvi nga va maha va ehleketa. I no va alakanyisa lezvaku hi kuya hi Nayo, a n’wanana wa mufana i wa fanele ku nghenisiwa wukwera hi siku ga wu 8, hambu loku ku hi Sabhadho. Makunu a se va wutisa aku: “Loku munhu a nghenisiwa wukwera hi sabhadho, lezvaku a nayo wa Mosi wu nga hambunyetwi; xana mu ndzi zangarela yini, hi lezvi ndzi hanyisileko munhu hi sabhadho ke? Mu nga lamuli hi kota ya lezvi zvi wonekako, kanilezvi lamulani hi nongameto.” — Johani 7:23, 24.

A vaJudha va lomu Jerusalema va nga zvi tiva ku va kona va lavako ku mu daya, va se: “A hi yena [wanuna] loyi va lavako ku mu daya ke? [Hambulezvo], wa wulawula kubaseni, a va wuli nchumu ka yena. Xana a vafumeli . . . [vo] zvi tiva lezvaku loyi hi yena Kristu ke?” Hikuyini a vanhu va nga kala va nga kholwi a ku Jesu hi yena Kristu? Va waku: “Loyi munhu ha mu tiva laha a tako ha kona; kanilezvi laha Kristu a ta ngata, a ku na munhu loyi a tivako laha a humako kona.” — Johani 7:25-27.

Jesu i no hlamula na a hi kwalahaya tempeleni, aku: “Hakunene mina ma ndzi tiva, ni laha ndzi tako ha kona ma ku tiva; kanilezvi a ndzi ti telangi hi wutsumbu ganga, ni loyi a ndzi rumileko ngwa zvinene, loyi n’wina mu nga mu tiviko. Mina ndza mu tiva, hakuva ndzi huma ka yena, hi yena a ndzi rumileko.” (Johani 7:28, 29) Laha a nga wula mhaka leyo yo dlunyateka, va no zama ku mu khoma, na va lava ku ya mu vhalela kutani ku daya. Kanilezvi, a zvi kotekangi hakuva ci wa nga se chikela a cikhati ca ku a dawa.

 Hambulezvo, kota lezvi va nga zvi tiva lezvaku i mahile zvihlamaliso zvo tala, a vanyingi va no kholwa ka yena. I wa fambile hehla ka mati, a nyimisa moya, a gisa vanhu vo tala va xura hi tipawa titsongwani ni tinjhanjhi titsongwani, a hanyisa vababyi ni zvilima, ni zvikhumu, ni lava va nga hi ni hlokonho, a tlhela a vhuxa lava va nga file. Hikwalaho, va wa hi ni cigelo co zwala futsi ca ku wutisa vaku: “Kristu loku . . . [ata], xana i ta maha zviwoniso zvo hundza lezvi a zvi mahako loyi munhu ke?” — Johani 7:31.

Laha a vaFarisi va nga zvizwa, vona ni vapristi va hombe va no rumela vavanuna kasi va ya khoma Jesu.