A vafarisi va wa nga kholwi ku Jesu i hanyisile wanuna a nga pswalilwe na a hi cikhumu. Hikwalaho, va no vitanisa vapswali vakwe. A vapswali va kona va wa zvi tiva lezvaku loku va vhila ku hlamula va ta hlongoliwa “sinagogeni.” (Johani 9:22) Loku va hlongoliwa lomu ka vaJudha lava van’wani va wa ta luza vanghana, a ngango wabye kambe wu wa ta xaniseka hi tlhelo ga timali.

A vaFarisi va no va maha zviwutiso zvimbiri, vaku: “Loyi i n’wana wa n’wina ke, loyi mu nge . . . i pswalilwe na hi cikhumu? Makunu i wona hikuyini?” A vapswali va kona va no hlamula vaku: “Ha mu tiva lezvaku i n’wana wa hina, ni lezvaku i pswalilwe na hi cikhumu; kanilezvi aku i wonisa kuyini makunu, a hi zvi tivi”; ne a ku himani a nga mu vhulula mahlo, a hi zvi tivi. Hambu loku ku hi lezvaku a n’wana wabye i wa va byelile lezvi zvi nga humelela, va no ti wonela, va se: “Mu wutiseni, i kulile; i ta ti hlamulela ha yece.” — Johani 9:19-21.

A vaFarisi va no mu vitana kambe a wanuna loyi a nga hanyisilwe, va ta mu dzukisela vaku va tiva mahungu ya hava hi Jesu. Va no mu kurumeta vaku: “Dhumisa Nungungulu; ha zvi tiva lezvaku loyi munhu muwonhi.” A wanuna loye i no potsa ku kanetisana navo, aku: “Kani muwonhi, a ndzi zvi tivi.” A guma aku: “Cilo cin’we ndzi ci tivako, hi lezvaku ndzi wa hi cikhumu, makunu ndza wona.” — Johani 9:24, 25.

A vaFarisi a va lavangi ku zvi tsikisa zvezvo. Va no mu wutisa zvin’wani vaku: ‘I mahile yini ka wena? I no vhululisa kuyini a mahlo ya wena ke?’ A wanuna loye i no tiya hlana, aku: “Lezvi ndzi sinako ndzi mu byelile, a mu [zvi] zwangi; hikuyini mu lavako ku zvizwa kambe ke? N’winawu mu . . . [lava] ku maha vapizani vakwe ke?” A vaFarisi va no vhindluka hi zanga, va mu poyilela vaku: “U mupizani wakwe wena, kanilezvi hina hi vapizani va Mosi. Ha zvi tiva lezvaku Nungungulu i wulawulile ka Mosi; kanilezvi loyi munhu a hi ku tivi laha a humako ha kona.” — Johani 9:26-29.

A wanuna loye i no hlamala, aku: ‘Hakunene zva hlamalisa lezvi mu nga ku tiviko lomu a tako hi kona, kasi lezvo i vhululile mahlo ya mina.’ I no guma a tlhamusela zvilo zvo zwala xungetano hi lava Nungungulu a xalalako hi vona a tlhela a va vhuna. I te: ‘Ha zvi tiva lezvaku Nungungulu a nga ingisi vawonhi, kanilezvi ni wihi a chavako Nungungulu, a maha kurandza kakwe, yaloye wa mu ingisa. A cima a ku se tshuka ku zwala lezvaku a wokari i vhululile a mahlo ya munhu wo pswaliwa na a hi cikhumu.’ Lezvo hi zvona zvi nga mu maha a zwisisa lezvi a nga zvi wula, zvaku: “Loku a wanuna loyi i wa ngati hi ka Nungungulu na a nga mahangi nchumu.” — Johani 9:30-33.

A vaFarisi a va ha ci kumangi co wula, va no mu ruka vaku: “Wena u la su pswalelwa kuwonheni ku tshingileko, wa hi gondzisa wena ke?” Va no gumesa va mu hlongola. — Johani 9:34.

Laha Jesu a nga zvi tiva lezvi zvi nga humelele, i no kuma wanuna loye a mu wutisa aku: “Wa kholwa ka N’wana wa Nungungulu ke?” A wanuna loye a nga mu hanyisile i no hlamula aku: “Hosi, hi yena mani, ndzi fela ku kholwa ka yena?” Jesu i no mu dlunyatisela, aku: Wa mu wona, “hi yena loyi a wulawulako na wena.” — Johani 9:35-37.

A wanuna loye i no hlamula aku: “Hosi, ndza kholwa”. I no khizamela Jesu a kombisa cichawo ni lezvaku wa kholwa ka yena, zvonake Jesu a wula magezu lawa ya lisima, aku: “Ndzi tile misaveni a ku ta lamula vanhu; lezvaku kasi lava va nga woniko va fela ku wona, ni lezvaku lava va wonako va maha zvikhumu.” — Johani 9:38, 39.

A vaFarisi lava va nga hi laho va no ti yimelela va wutisa Jesu vaku: “Hinawu hi zvikhumu ke?” Va mu wutisile lezvo hi lezvi va nga zvi tiva ku a hi zvikhumu. Hambulezvo, ahati ka ntiro lowu va nga ti byela ku hi wona va mahako ke, wa ku rangela vanhu hi tlhelo ga moya? Jesu i no va byela lezvi: “Loku mu wa hi zvikhumu, . . . na mu nga hi na nandzu; kanilezvi lezvi mu nge ngalo: Ha wona; a kuwonha ka n’wina ku tshamile.” (Johani 9:40, 41) Loku va wa nga hi vagondzisi lomu Izrayeli, kuzvilava zvi wa ta zwisiseka lezvi va nga ala ku Jesu hi yena Mesiya. Kanilezvi, lezvi va nga kari va wu tiva Nayo, va wo maha ciwonho ca hombe.