Jesu i gondzisile zvilo zva lisima na a hi le Jerusalema, hi cikhati ca Mubuzo wa Mixaxa. A vaJudha vo kari va nga hi festeni leyo va wa ha hi ku mu byela lezvi: “Hina hi pswalo wa Abrahama, cima a hi na ngava tikhumbi ta munhu.” Jesu i no va hlamula aku: “Ndza zvi tiva lezvaku mu pswalo wa Abrahama; kanilezvi mu . . . [lava] ku ndzi daya, hakuva a mhaka ya mina a yi kumi wutshamu ka n’wina. Mina ndza mu byela lezvi ndzi zvi wonileko ka . . . [Papayi], na n’wina mu maha lezvi mu zvi zwileko ka . . . [papayi] wa n’wina.” — Johani 8:33, 37, 38.

Lezvi Jesu a nga zvi wula zvi wa dlunyateka. I waku: A Papayi wakwe i hambene ni loyi wabye. Hambulezvo, a vaJudha a va zvi zwisisangi, va se phinda vaku: “A . . . papayi wa hina hi Abrahama.” (Johani 8:39; Isaya 41:8) Kota lezvi va nga hi pswalo wa Abrahama, va wa zvi wonisa ku a kukholwa kabye ka fana ni loku ka Abrahama, a munghana wa Nungungulu.

Kanilezvi lezvi Jesu a nga va hlamula zvi no va dzukisa. I te: “Loku mu wa hi vana va Abrahama, . . . na mu maha mitiro ya Abrahama.” A n’wana i pimanyisa mupswali wakwe futsi. Hambulezvo, Jesu i no engeta aku: ‘Mu lava ku ndzi daya, mina ndzi nga munhu loyi a mu byelileko a . . . [lisine], leli ndzi li zwileko ka Nungungulu; Abrahama a nga mahangi lezvo.’ I no guma a wula zvilo zvo hlamalisa, aku: “N’wina mu maha a mitiro ya . . . [papayi] wa n’wina.” — Johani 8:39-41.

A vaJudha va no simama va nga zvi tivi a ku i wula mani papayi wa kona. Va no ti yimelela va ti byela lezvaku a va tangi hi nyimba — i vana va Abrahama futsi, vaku: “A hi pswaliwangi wubhayini; hi na ni Papayi mun’we, ku nga Nungungulu.” Xana va wa hi vana va Nungungulu futsi? Jesu i no va byela lezvi: “Loku Nungungulu i wa hi Papayi wa n’wina na mu ndzi randza hakuva ndzi laha hi kota ya yena, ndzita hi ka Nungungulu. A hi ku ndzi no zvi randza ndzita, hi Yena a nga ndzi ruma.” Jesu i no maha ciwutiso a tlhela a hlamula hi yece. I te: “Hikuyini mu nga zvi zwisisiko lezvi ndzi wulako? Hi lezvaku a mu zvi koti ku ingisela lezvi ndzi wulako.” — Johani 8:41-43, NM.

Jesu i wa lava ku a vaJudha va zvi zwisisa ku loku va nga kholwi kakwe, zvi komba ku a papayi wabye hi Sathani. Makunu, i no guma a va byela hi kukongoma aku: “N’wina mu vana va papayi wa n’wina Sathani, mu tsaka hi ku maha kurandza ka papayi wa n’wina.” Hi kulandzela, i no tlhamusela tshamela ga papayi wabye, aku: “Yena mudayi kusukela kusanguleni, a nga tshamangi lisineni.” I no engeta aku: “Loyi a nga wa Nungungulu wa ingisa timhaka ta Nungungulu. N’wina a mu ingisi hakuva a mu va Nungungulu.” — Johani 8:44, 47, NM.

Laha a vaJudha va ngazwa ku koniwa, va no vhindluka hi zanga, vaku: “A hi wulangi . . . lezvaku u muSamariya, ni ku u na ni dhimoni?” Lezvi va nga mu vitana ku “muSamariya” va wo mu chepeta. Kanilezvi i no komba lezvaku a nga na mhaka ni lezvi va nga mu rukatela hi zvona, aku: “A ndzi na dhimoni; kanilezvi mina ndzi dzundza . . . [Papayi], kasi n’wina ma ndzi kanyisa.” Jesu i no komba lezvaku a magezu ni mitiro yabye zvi ngava ni wuyelo ga gi nene kutani go biha, hi ku wula lezvi: “Loku munhu a hlayisa mhaka ya mina,” a nga tafa. I wa nga wuli lezvaku a vapostoli vakwe ni van’wani lava va nga kari va mu landzela va wa nga tafa futsi. Kanilezvi, i wo komba lezvaku hambu loku vafa, va ta tlhela va vhuxiwa. Va nga tafa va lova — ku nga “kufa ka wumbiri.” — Johani 8:48-51; Kuvhululelwa 21:8.

Kanilezvi a vaJudha va no khoma magezu ya Jesu hi choka, va se: “Makunu ha zvi tiva lezvaku u na ni dhimoni. Abrahama i file, ni vaphrofeti kambe; na wena u ngalo: Loku munhu a hlayisa mhaka ya mina, cima a nga . . . [tafa]. Wena u wa hombe ku hundza a . . . [papayi] wa hina, loyi a ngafa ke? . . . U ti maha mani wena ke?” — Johani 8:52, 53.

Zva dlunyateka ku Jesu i wo va komba ku hi yena Mesiya. Hambulezvo, a nga tekelangi ku hlamula ciwutiso cabye ca ku hi yena mani. I no va byela lezvi: “Loku ndzi ti dzundza, a wudzundzo ga mina a  hi nchumu, kanilezvi hi . . . [Papayi] a ndzi dzundzisako, loyi . . . mu nge . . . i Nungungulu wa n’wina; kasi a mu mu tivi, kanilezvi mina ndza mu tiva; ni loku ndzi wa wula ndziku: A ndzi mu tivi, ndzi tava muhembi kota n’wina.” — Johani 8:54, 55.

Jesu i no guma a wulawula hi kukholwa ka Abrahama, aku: ‘A . . . [papayi] wa n’wina Abrahama i no tsaka lezvaku i wa ta . . . wona a siku ga mina; i gi wonile a nengela.’ Kunene, Abrahama i no kholwa citsumbiso ca Nungungulu, a tlhela a rindzela kuta ka Mesiya hi mahlo yo pswhuka. A vaJudha va no mu wutisa na va nga kholwi vaku: Ne a wu na “50 wa malembe, . . . u mu wonile Abrahama ke?” Jesu i no va hlamula aku: “Hi zvinene ndziku ka n’wina: Ndzi wa hi kona Abrahama na a nga se ku pswaliwa.” Jesu i wa wulawula hi wutomi gakwe le tilweni kota civangwa ca moya ni ca ntamu, na a nga seta laha misaveni. — Johani 8:56-58.

A vaJudha va no zangarela Jesu hi lezvi a nga ku i wa hi kona na a nga se pswaliwa Abrahama. Va no guma va rola maribye va zama ku mu gandla, kanilezvi Jesu i no suka na va nga mu bayisangi.