Andzhako ka loku Jesu a gile Phasika ga lembe ga 30 Nguveni ya Hina, i no suka le Jerusalema ni vapizani vakwe. Hambulezvo, a va tekelangi kuya kaya kabye Galileya, va noya tikweni ga Judhiya lomu va ngaya va ya bhabhatisa vanhu vo tala. Johani Mubhabhatisi yenawu i wa kari a bhabhatisa vanhu hi cipimo ca lembe, kuzvilava le nkoveni wa Congo wa Jordhani. Kala ka cikhati leco, a vapizani vo kari va Johani va wa ha hi na yena.

Jesu i wa nga bhabhatisi vanhu, kanilezvi i wo ruma vapizani vakwe va bhabhatisa. Kala ka nguva leyo, Jesu na Johani va wo gondzisa vaJudha lava va nga ti sola lezvi va nga tsikile ku ingisa civhumelwano ca Nayo wa Nungungulu. — Mitiro 19:4.

Kanilezvi a vapizani va Johani va wa kari va lusa hi lezvi Jesu a nga kari a maha, zvonake va ya khala ka Johani vaku: “Loyi [Jesu] a nga hi na wena . . . wa bhabhatisa, ni vanhu vontlhe vaya ka yena.” (Johani 3:26) Hambulezvo, Johani i wa nga lusi. I wa tsaka nguvhu hi lezvi a ntiro wa Jesu wu nga kari wu andza, niku i wa lava ku a vapizani vakwe vonawu va tsaka. Johani i no va alakanyisa aku: “N’wina mu vakustumunyu va lezvi ndzi nga wula ndziku: ‘A hi mina Kristu, kanilezvi ndzi rumilwe a ku ranga mahlweni kakwe.’ Loyi a nga ni noivha i noivho. Kanilezvi loku a munghana wa noivho a yima kusuhani naye a muzwa, wa tsaka nguvhu hi kuzwa a gezu ga noivho. Hikwalaho, a kutsaka ka mina ku mbhelele.” — Johani 3:28, 29, NM.

A ku fana ni lezvi a munghana wa noivho a tsakako loku azwa gezu ga noivho, Johani i tsakile nguvhu a cikhati leci a nga tivekisa Jesu ka vapizani vakwe ka tihwetana ti nga hundzile. Ka cikhati leco, a vapizani vo kari va Johani va no sangula ku landzela Jesu. Hi kufamba ka cikhati, a vapizani lavo va wa ta totiwa hi moya wa ku basa. Johani i wa lava lezvaku a vapizani lava a nga ha sele navo, vonawu va ya landzela Jesu. A lisine hi lezvaku a kungo ga Johani ku wa hi ku vhulula ndlela kasi Kristu a ta sangula ntiro wakwe. Johani i no wula magezu lawa xungetano hi Jesu: ‘I fanele ku andza, kanilezvi mina ndzi fanele ku bohla.’ — Johani 3:30.

Johani loyi mun’wani a nga rangile a sangula ku landzela Jesu, i no gumesa a tsala magezu lawa xungetano hi lomu Jesu a nga tumbulukela kona ni ntiro wa lisima lowu a nga wa ta wu maha kasi ku hanyisa vanhu. I te: ‘Loyi a tako hi le hehla i hehla ka vontlhe. Papayi wa randza N’wana, niku i vekile zvilo zvontlhe canjeni gakwe. Loyi a kholwako ka N’wana i na ni wutomi ga pindzukelwa; kanilezvi loyi a nga ingisiko N’wana a nga ta wona wutomi, hakuva a khulo ga Nungungulu gi tshamile hehla kakwe.’ (Johani 3:31, 35, 36) Leyi i mhaka ya lisima nguvhu leyi a vanhu va faneleko ku yi tiva.

Ka cikhati leco, Herodhi i wa tekile Herodhiya a nga hi sati wa makabye wakwe Filipu. Makunu laha Johani Mubhabhatisi a nga paluxa wubhayi ga Herodhi, i no mu khoma a mu vhalela paxweni. Lezvo zvi mahekile na ko hundza cikhati citsongwani Johani Mubhabhatisi na a wulile lezvaku a ntiro wakwe wu fanele ku hunguleka. A cikhati leci Jesu a ngazwa lezvaku Johani i khon’wile, i no suka le Judhiya ni vapizani vakwe, ‘vaya Galileya.’ — Matewu 4:12; Marku 1:14.