Zvalezvi Jesu a nga bhabhatiswa hi Johani, a moya wa Nungungulu wu no mu yisa ciwuleni ca Judha. Ku wa hi ni zvilo zvo tala a nga fanele ku ehleketa hi zvona. A cikhati leci a nga bhabhatiswa, ‘a tilo gi no vhululeka’. (Matewu 3:16) Hi ndlela leyo, zvi wa koteka ku a alakanya lezvi a nga gondza ni lezvi a nga maha a cikhati a nga hi le tilweni. Kunene, ku wa hi ni zvotala lezvi Jesu a nga fanele ku ehleketa hi zvona!

Jesu i noya mbheta 40 wa masiku le ciwuleni — a tshama seyo wusiku ni mumu. Ka masiku wontlhe lawo, a nga gangi nchumu. Laha makunu a ngazwa ndlala yo daya ni tisokoti, Sathani i no ya mu ringa, aku: ‘Loku u hi N’wana wa Nungungulu, laya maribye lawa lezvaku ma maha tipawa.’ (Matewu 4:3) Jesu i no ala ciringo leco, hakuva i wa zvi tiva ku zvi bihile a ku tirisa ntamu wakwe lezvaku a maha zvihlamaliso kasi ku ti tsakisa.

Sathani a nga mu tsikangi anwa mati hi khokho. I no zama ku ringa Jesu hi ndlela yin’wani. I no byela Jesu lezvaku a ti tsikeleta hi lehehla ka tempeli. Ka khati legi kambe, Jesu a nga vhumelangi ku hlakana hi ntamu wakwe kasi a ti lavela nduma. Jesu i no tshaha mitsalo kasi ku komba lezvaku zvi bihile a ku ringa Nungungulu hi ndlela leyo.

Ka khati ga wunharu, Sathani i no ringa Jesu hi ku mu komba ‘mifumo yontlhe ya misava ni wudzundzo ga yona’, zvonake aku: “Ndzi ta ku nyika zvontlhe lezvi zvilo, loku uwa lahasi u ndzi khozela.” Ni ka khati legi kambe, Jesu i no ala; a wula na a tiyile aku: “Suka Sathani”! (Matewu 4:8-10) Jesu a nga vhumelangi ku wela ka ciringo leco, hakuva i wa zvi tiva lezvaku i fanele ku khozela Jehovha basi. Jesu i no hlawula ku simama a tsumbekile ka Nungungulu.

Hi gondza yini ka zviringo zva Sathani ni ka lezvi Jesu a nga maha? Hi gondza lezvaku Sathani i kona futsi, i ngilozi — a hi wubihi, a ku fana ni lezvi a vokari va wulako. A matimu lawa kambe ma komba lezvaku a mifumo ya tiko legi ya Sathani, hi yena a yi rangelako. Loku yi wa nga hi ya yena, na a nga mu ringangi hi yona Jesu.

Ahandle ka lezvo, Sathani i wulile lezvaku i wa lava ku chachazela Jesu loku a vhumela ku mu khozela khati gin’we basi, laha ka kuza a ti yimisela ku mu nyika mifumo yontlhe ya misava. Ni nyamutlha konawu Sathani a nga hi ringa hi ndlela yo fana. A nga tshuka a hi tsumbisa ku loku ho vhumela ku maha zvokari hi ta ganya tikweni legi, hi tlhela hiva ni nduma. Gi tava wutlhari ga hombe ka hina loku hi pimanyisa cikombiso ca Jesu, hi simama hi tsumbekile ka Nungungulu hambu loku Sathani a hi ringa hi ndlela muni. Kanilezvi u nga rivali lezvaku Sathani i no tsika Jesu hi “cikhatanyana.” (Luka 4:13) Hinawu a nga ta hi tsikela magumo. Hikwalaho, hi fanele ku tshama na hi ma vhulile.