Laha makunu ku nga hundza 6 wa tihweti Johani Mubhabhatisi na a sangulile ku chumayela, Jesu i noya ka Johani le Congweni wa Jordhani. Ka cikhati leco, Jesu i wa hi ni cipimo ca 30 wa malembe. Makunu Jesu i wa yela yini ka Johani? I wa ngayi a ya mu vhuxela kota lezvi a nga hi xaka gakwe. Ne i wa nga yeli ku ya wona kukula ka ntiro wa Johani. Jesu i waya ka Johani a ya mu kombela lezvaku a mu bhabhatisa.

Johani i no ala aku: “Hi mina ndzi faneleko ku bhabhatiswa hi wena, kasi wena uta ka mina!” (Matewu 3:14) I wa hi ni cigelo co zwala. Johani i wa zvi tiva ku Jesu i N’wana wa Nungungulu. Alakanya lezvaku Johani i tshukumile hi kutsaka na a ha hi lomu ndzeni ka mamani wakwe, a cikhati a mamani wakwe Elizabheti a nga endzelwa hi Mariya na a hi ni nyimba ya Jesu. A zvi kanakanisi a ku Elizabheti i gumesile a mu byela zvilo lezvo Johani. Ahandle ka lezvo, kuzvilava i zvi tivile ku a ngilozi yo kari yi byelile Mariya lezvaku i wa ta pswala Jesu, niku ka wusiku legi a nga pswaliwa hi gona, a varisi vokari va wonile tingilozi.

Johani i wa zvi tiva ku i wa bhabhatisa lava va nga kari va ti sola zviwonho zvabye. Kanilezvi, Jesu i wa nga hi na ciwonho. Hambu lezvi Johani a nga kari a ala ku mu bhabhatisa, Jesu i no kurumeta aku: “Lezvi a zvive tano; hakuva zvinghaho hi fanele ku tatisa kululama kontlhe.” — Matewu 3:15.

Makunu hikuyini zvi nga fanele ku Jesu a bhabhatiswa? A nga bhabhatiswangi kasi ku komba ku wa ti sola zviwonho. I bhabhatisilwe kasi ku komba lezvaku i wo ti hendleleta kasi a maha kurandza ka Papayi wakwe. (Mahebheru 10:5-7) Kala ka cikhati leco, Jesu i wa tira kota muvatli. Kanilezvi, ja ci wa chikele cikhati ca ku a sangula ntiro lowu a nga rumilwe hi Papayi wakwe lezvaku a ta wu maha laha misaveni. U zvi wonisa kuyini, xana Johani i wa rindzela ku wona nchumu wo hlamalisa na wu maheka a cikhati leci a nga wa ta bhabhatisa Jesu?

Johani i wulile lezvi hi ndzhako ka cikhati: “Loyi a ndzi rumileko a ku bhabhatisa hi mati, i te ngalo ka mina: Loyi u ta nga wona a moya wu relela wu tshama hehla kakwe, hi yena a bhabhatisako hi moya wa ku basa.” (Johani 1:33) Hi cigelo leco, Johani i wa rindzela ku wona moya wa Nungungulu na wu relela hehla ka wokari cikari ka lava a nga kari a va bhabhatisa. Hi kota ya lezvo, kuzvilava Johani a nga hlamalangi laha a nga wona “moya wa Nungungulu wu relela kota tuva hehla [ka Jesu]” a cikhati leci a nga mu humesa lomu matini. — Matewu 3:16.

Kanilezvi, a hi lezvo basi zvi nga humelela a cikhati leci Jesu a nga bhabhatiswa. A Bhibhiliya gile i no vhululekelwa hi tilo. Zvi wula yini lezvo? Zvi wula ku kuzvilava  a cikhati leci a nga bhabhatiswa i no alakanya lezvi a nga hanyisa zvona le tilweni na a nga se pswaliwa laha misaveni. Hi ndlela leyo, Jesu i no alakanya a wutomi legi a gi hanyileko kota N’wana wa Jehovha le tilweni — a ku patsa ni lisine lontlhe leli Jehovha a nga mu gondzisile na a nga seta laha misaveni.

Ahandle ka lezvo, a cikhati leci Jesu a nga bhabhatiswa, ku no zwala gezu hi le tilweni giku: ‘Loyi i N’wana wa mina a randzekako, ndzi xaleleko khwatsi ha yena.’ (Matewu 3:17) Gi wa hi gezu ga mani galego? A zvi koteki a ku giva gezu ga Jesu, hakuva yena i wa hi kwalahaya na Johani. Lego gi wa hi gezu ga Nungungulu. Kwalaho, zvi no tekela ku dlunya lezvaku Jesu a hi Nungungulu, kanilezvi i N’wana wa Nungungulu.

Zva dlunyateka a ku laha misaveni makunu Jesu i wa hi N’wana wa Nungungulu wa nyama ni nkhata, a ku fana na Adhamu, a munhu wo sangula. Luka i wulile magezu lawa andzhako ka ku wulawula hi kubhabhatiswa ka Jesu, i te: “Jesu i wa hi ni 30 wa malembe laha a nga sangula ku gondzisa, na va alakanya lezvaku i n’wana wa Josefa, wa Heli, . . . wa Dhavhidha, . . . wa Abrahama, . . . wa Nowa, . . . wa Adhamu, wa Nungungulu.” — Luka 3:23-38.

A ku fana ni lezvi Adhamu a nga hi n’wana wa Nungungulu wa nyama ni nkhata, Jesu yenawu. Laha Jesu a nga bhabhatiswa, i no sangula ku zvi zwisisa lezvaku i N’wana wa Nungungulu, loyi a nga wa ta gumesa a ya hanya le tilweni kota ngilozi. Ka cikhati leco, Jesu i wa ta sangula ku gondzisa lisine la Nungungulu ni ku komba ndlela ya ku kuma wutomi. Makunu Jesu i wo sangula ku hanya hi ndlela yi nga wa ta gumesa hi ku a nyikela wutomi gakwe kasi ku ponisa vanhu va nga mbhelelangiko.