A cikhati leci Jesu a nga hi le Jerusalema aga Phasika hi lembe ga 30 Nguveni ya Hina, i mahile zvihlamaliso. Hi kota ya lezvo, a vanhu votala va no kholwa ka yena. A muFarisi wo kari, tlhelo ciro ca hubye ya hombe ya ciJudha wa ku hi Nikodhemusi, yenawu i no khumbiwa nguvhu hi zvihlamaliso lezvo. Nikodhemusi i no lava ku gondza zvin’wani. Hikwalaho i no endzela Jesu ni wusiku. Kuzvilava i mu endzele ni wusiku hi ku chava ku woniwa hi varangeli-kulobye va ciJudha.

Nikodhemusi i no byela Jesu aku: “Rabi, ha zvi tiva lezvaku u mugondzisi loyi a tileko hi ka Nungungulu; hakuva a ku na munhu a zvi kotako ku maha a zviwoniso lezvi u zvi mahako, loku Nungungulu a nga hi naye.” Jesu i no byela Nikodhemusi lezvaku loku a munhu a lava ku nghena mufun’weni wa Nungungulu i fanele ku ‘belekwa luswa’. — Johani 3:2, 3.

Nikodhemusi i no wutisa Jesu aku: Zvi nga kotekisa kuyini ku a munhu a belekwa luswa? ‘I ta tlhela a nghena ga wumbiri rumbyini ga mamani wakwe, a tlhela a belekwa ke?’ — Johani 3:4.

Jesu i no mu byela lezvaku a ku belekwa luswa a zvi wuli lezvo. I no mu tlhamusela aku: ‘Loku munhu a nga belekiwi hi mati ni moya, a nga na ku nghena mufun’weni wa Nungungulu.’ (Johani 3:5) Jesu i belekilwe hi “mati ni moya” a cikhati leci a nga bhabhatiswa zvonake a moya wa ku basa wuta hehla kakwe. Ka siku lego, ku tlhelile ku zwala gezu hi le tilweni giku: ‘Loyi i N’wana wa mina a randzekako, ndzi xaleleko khwatsi ha yena.’ (Matewu 3:16, 17) Hi magezu lawo, Nungungulu i wo komba lezvaku Jesu i n’wana wakwe wa moya, loyi a nga rindzela ku nghena Mufun’weni wa tilo. Hi kufamba ka cikhati — hi Pentekosta wa 33 Nguveni ya Hina — ku wa tava ni van’wani kambe va nga wa ta bhabhatiswa zvonake ku chululiwa moya wa ku basa hehla kabye, hi ndlela leyo, vonawu va belekwa luswa kota vana va Nungungulu va moya. — Mitiro 2:1-4.

Nikodhemusi zvi mu karatele ku zvi zwisisa lezvi Jesu a nga mu gondzisa xungetano hi Mufumo. Hikwalaho, Jesu i no mu tlhamusela zvin’wani xungetano hi lisima la ntiro wakwe kota N’wana wa Nungungulu wa nyama. Jesu i te: A ku fana ni ‘lezvi Mosi a nga tlakusa a nyoka ciwuleni, hizvalezvo a N’wana wa munhu i fanele ku tlakuswa; kasi ni wihi a kholwako ka yena ava ni wutomi ga pindzukelwa.’ — Johani 3:14, 15.

Cikhatini leco ca kale, a vaIzrayeli lava va nga lumiwa hi tinyoka ta wuxungu, va wa fanele ku cuwuka nyoka ya suku yi nga hayekilwe hi Mosi kasi va ngafi. (Mitsengo 21:9) Hi kufanana, vontlhe vanhu va fanele ku kholwa ka N’wana wa Nungungulu kasi va tlhatlhiswa ka ciwonho ni kufa va tlhela va kuma wutomi ga pindzukelwa. Kasi ku vhuna Nikodhemusi lezvaku a zwisisa lirandzo leli Nungungulu a li kombisileko mhakeni leyi, Jesu i te: ‘Nungungulu i lo randza tiko kota lezvi, a kala a nyikela a N’wana wakwe a belekilweko yece, kasi ni wihi loyi a kholwako kakwe a nga lovi, kanilezvi ava ni wutomi ga pindzukelwa.’ (Johani 3:16) Hi magezu lawo, Jesu i no tlhamusela Nikodhemusi lezvaku hi yena ndlela ya ku a vanhu vontlhe va hanyiswa. Ka cikhati leco, ku wo hundza 6 wa tihweti basi Jesu na a sangulile ntiro wakwe!

Jesu i no byela Nikodhemusi aku: “Nungungulu a nga rumelangi a N’wana wakwe tikweni a ku ta lamula tiko”. Lezvo zvi wula lezvaku Jesu a nga rumelwangi ku ta lamula vanhu laha misaveni a tlhela a va kona lezvaku vontlhe va loviswa. Kanilezvi, i rumelwe “kasi a tiko gi fela ku hanyiswa hi yena.” — Johani 3:17.

Lezvi Nikodhemusi a ngaya ka Jesu ni wusiku ga munyama hi kota ya ku chava, a zvo ku hlamalisa lezvi Jesu a nga gemetisa zvona mabhulo yakwe naye! I te: ‘A kulamula hi kwaloku, lezvaku a kuwonekela [ku nga Jesu a woningako hi wutomi gakwe ni tigondzo  takwe] ku tile misaveni, kanilezvi a vanhu va randzile munyama ku hundza kuwonekela; hakuva a mitiro yabye yi wa bihile. Hakuva ni wihi a mahako kubiha wa venga kuwonekela, zvonake a ngati kuwonekeleni, ku nga taku a mitiro yakwe yi wonekeliswa. Kanilezvi loyi a mahako zva zvi nene, wata kuwonekeleni, kasi a mitiro yakwe yi fela ku woneka yiku dlunya, lezvaku yi tirilwe ka Nungungulu.’ — Johani 3:19-21.

A muFarisi loye wa ku hi Nikodhemusi, tlhelo mugondzisi wa Izrayeli, i wa wu tivile a ntiro wa Jesu mhakeni ya kutatiseka ka kungo ga Nungungulu. Makunu zvi wa salele yena a ku ehleketa hi zvona a tlhela a tiva lezvi a nga fanele ku maha.