Andzhako ka ku tshama 40 wa masiku le ciwuleni, Jesu i no tlhela ka Johani mubhabhatisi, loyi a nga mu bhabhatisile. Laha Jesu a nga kari a chikela kusuhani, Johani i no xungeta Jesu a byela lava a nga hi navo aku: “Wonani Yivhana ya Nungungulu, leyi yi susako zviwonho zva tiko! Hi yena loyi ndzi nga wulawula ha yena ndziku: Wata munhu andzhako ka mina loyi a ndzi rangeleko; hakuva i wa hi kona na ndzi nga seva kona mina.” (Johani 1:29, 30) Hambu lezvi Johani a nga nhondzonyana ka Jesu, wa zvi tiva lezvaku Jesu hi yena a nga ranga a vangiwa niku i hanyile le tilweni yena na a nga se pswaliwa.

Ka mavhiki matsongwani ma nga hundzile, laha Jesu a ngaya ka Johani a ya mu kombela ku a mu bhabhatisa, zvi wonekisa ku khwatsi Johani i wa nga zvi tivi khwatsi ku Jesu hi yena a nga wa tava Mesiya. I no zvi wula kubaseni aku: ‘Mina ndzi wa nga mu tivi; kanilezvi ndzi tile na ndzi bhabhatisa hi mati, kasi a tivekiswa ka Izrayeli.’ — Johani 1:31.

Johani i noya mahlweni a byela lava a nga hi navo lezvi zvi nga maheka a cikhati leci a nga bhabhatisa Jesu, i te: “Ndzi wonile a moya wu relela hi le tilweni kota tuva, wu tshama hehla kakwe. Mina ndzi wa nga mu tivi; kanilezvi loyi a ndzi rumileko a ku bhabhatisa hi mati, i te ngalo ka mina: Loyi u ta nga wona a moya wu relela wu tshama hehla kakwe, hi yena a bhabhatisako hi moya wa ku basa. Ndzi zvi wonile, ndza maha wukustumunyu lezvaku loyi i N’wana wa Nungungulu.” — Johani 1:32-34.

Ka siku gi nga landzela, laha Johani a nga hi ni vapizani vakwe va vambiri, i no wona Jesu na ata, a byela vapizani vakwe aku: “Wonani Yivhana ya Nungungulu!” (Johani 1:36) Loku a vapizani va Johani Mubhabhatisi va zvi zwile, va no landzela Jesu. A mun’we wabye hi Andrewu. Loyi mun’wani ko khwatsi yenawu hi Johani, yaloyi a nga tsala matimu lawa. Johani loyi i wa hi n’wana wa Salome, a nga hi kata Zabhedhi. Ko khwatsi Salome i wa hi makabye wa Mariya. Makunu lezvi Johani a nga hi n’wana wa Salome, zvi wonekisa ku i wa hi primo wa Jesu.

Laha Jesu a nga hundzuluka a wona Andrewu na Johani na va mu landzela, i no va wutisa lezvi: “Mu lava yini?”

Va no mu wutisa vaku: “Rabi . . . , u tshama kwihi?”

Jesu aku: “Ngonani, mu ta wona.” — Johani 1:37-39.

Zvi wa hi kwalomo ka ma 16 wora. Ka siku lego, Johani na Andrewu va no tshama na Jesu. Andrewu i no suka na a tsakile nguvhu laha ka ku zvalezvi a nga kuma makabye wakwe, Simoni, loyi nga hi Pedro kambe, a tekela ku mu byela lezvi: “Hi mu kumile Mesiya.” (Johani 1:41) Andrewu i no famba na Pedro ka Jesu. Lezvi zvi tlhamuselwako ka matimu ma nga landzela zvi komba ku Johani yenawu i no ya kuma makabye wakwe Jakobe ata naye ka Jesu. Hambulezvo, ka lezvi Johani a nga tsala, a nga tlhamuselangi zvotala xungetano hi matimu yakwe.

 Hi mandziko wa kona, Jesu i no kuma Filipu wa le Bhetsaidha. A dhoropa legi gi wa hi le tlhatuko wa Bimbi ga Jordhani niku hi kwalomo a nga pswaliwa kona Andrewu na Pedro. Jesu i no ramba Filipu aku: “Ndzi landzele.” — Johani 1:43.

Filipu i no ya kuma Nataneli, loyi a nga hi Bhartolomewu kambe, aku: “Hi mu kumile loyi Mosi a nga tsala ha yena Nayweni, kambe ni vaphrofeti, hi Jesu wa le Nazareta, a n’wana Josefa.” Nataneli i no kanakana aku: “Ku nga huma a cilo co saseka hi le Nazareta ke?”

Filipu i no mu kuca aku: “Ngone, u ta wona.” Jesu i no wona Nataneli na a kari ata zvonake aku: Hi nga wona ‘a muIzrayeli wa lisine, loyi a nga hiko na kuxengetela’!

Nataneli i no mu wutisa aku: “U ndzi tivisa kuyini?”

Jesu i no mu hlamula aku: ‘Filipu na a nga se ku vitana, ndzi ku wonile na u hi lahasi ka nkuwu.’

Nataneli i no hlamala, aku: “Rabi, wena u N’wana wa Nungungulu, u Hosi ya vaIzrayeli” futsi!

Jesu i no mu wutisa aku: ‘U kholwa hi lezvi ndzi ngaku ndzi ku wonile na u hi lahasi ka nkuwu ke? U ta wona a zvilo zva hombe zvo hundza lezvi.’ Jesu i no gumesa a tsumbisa lezvi: ‘Hi zvinene, ndziku ka n’wina: Mu ta wona tilo na gi vhululekile, a tingilozi ta Nungungulu na ti kari ti kandziha ti relela hi le hehla tita ka N’wana wa munhu.’ — Johani 1:45-51.

Na ku nga se hundza cikhati co leha, Jesu ni vapizani vakwe lava a nga ha hi ku tivana navo, va no suka le Nkoveni wa Jordhani vaya le Galileya.