A cikhati leci Jesu a nga kari aga laha kaya ka murangeli wa vaFarisi, i gondzisile zvilo zva lisima nguvhu. Makunu, laha a nga simama ku endza a ya Jerusalema i no landzelwa hi vanhu vo tala nguvhu. Va wa lava yini? Ku ngava lezvaku va wa no ti yimisela ku maha vapizani vakwe, hambu loku ko humelela ni cihi?

Laha va nga kari va famba, Jesu i no va byela nchumu lowu kuzvilava wu nga dzukisa vokari. I te: “Loku a munhu ata ka mina, na a nga vengi a . . . [papayi] wakwe, ni . . . [mamani], ni sati, ni vana, . . . ni vamakabye, ina, hambu ni kuhanya kakwe, a nga zvi koti ku maha mupizani wa mina.” (Luka 14:26) Kasi Jesu i wa lava ku wula yini hi magezu lawa?

I wa nga lavi ku wula lezvaku vontlhe lava va mahako vapizani vakwe va fanele ku zonda maxaka yabye futsi. Kanilezvi, i wa wula lezvaku va fanele ku va zonda hi ku va mu randza nguvhu yena a ku hundza lezvi va ma randzisako zvona a maxaka yabye. A va faneli ku fana ni wanuna loyi a nga mu wula ka mufananiso wakwe wa lava va nga rambiwa ku yaga, loyi a nga tsika ku vhumela cirambo ca lisima hi lezvi a nga ha hi kuchadha basi. (Luka 14:20) A Bhibhiliya gi wula ku Jakobe, a kokwani wa vaJudha, i wa ‘venga’ Leya a randza Rakeli na gi komba lezvaku Jakobe i wa mu randza nguvhu Rakeli a ku hundza Leya. — Genesisi 29:31.

Wona kambe lezvaku Jesu i te a mupizani i fanele ku zonda “ni kuhanya kakwe,” kutani wutomi gakwe. Lezvo zvi komba lezvaku a mupizani wa lisine wa Jesu i fanele ku mu randza ku hundza wutomi gakwe, laha ka kuza a ti yimisela kufa lomu zvi laveka. Zvi se dlunya ku a kuva mupizani wa Kristu a hi mhaka yo hlakana. A hi zvilo zva ku zvi maha hi kuzwa kuxura, na u nga rangangi hi ku tshama u zvi ehleketa khwatsi.

A munhu a nga tshuka a kumana ni zvikarato a tlhela a xanisiwa hi kota ya kuva mupizani wa Kristu, hakuva i te: “Ni wihi loyi a nga rwaliko mhandze yakwe ya xanisa a ndzi landzela, a nge mahi mupizani wa mina.” (Luka 14:27, NM) Jesu i wa sina a wulile ku i ta dawa hi valala vakwe. Makunu, loyi hakunene a nga mupizani wa Jesu i fanele ku ti yimisela ku chepetiwa a ku fana ni lezvi yenawu a nga mahiwa.

Makunu lava va nga kari va famba na Jesu va wa fanele ku ranga hi ku ehleketa va zvi zwisisa khwatsi lezvi zvi lavekako kasi a munhu ava mupizani wa Kristu. Jesu i no khanyisa a mhaka leyi hi ku hlawutela mufananiso, aku: “Hi wihi wa n’wina, loyi a lavako ku aka likhokhola, a nga rangiko hi ku tshama a hlayela ntsengo, a ku kutani i nawo lowu a ta nga mbhetisa ha wona ke? Ku nga taku, laha na a akile ciseketelo, a nga zvi koti ku mbhetisa”. (Luka 14:28, 29) Lezvo zvi komba ku lava va nga kari va famba na Jesu vaya Jerusalema, va wa fanele ku ti yimisela ku khoma zvi tiya va maha zvontlhe zvi lavekako kota vapizani vakwe. I no guma a khanyisa mhaka leyi kambe hi mufananiso wun’wani.

I te: “Kutani hi yihi hosi leyi yi fambako ku yalwa ni yin’wani hosi, yi ta nga kala ku ranga hi ku tshama hasi, yi pima lezvaku kutani yi ta zvi kota  hi 10 000 wa masochwa a ku tlhangana ni leyi yi tako ka yona hi 20 000 ke? Loku zvi nge nghaho, yi ta rumela mitsumi, na ya ha hi kule a yin’wani hosi, a ku ya kombela a kuva kona kurula.” Jesu i no guma a khanyisa mhaka yakwe hi ku wula lezvi: “Zinghaho ni wihi wa n’wina a nga tsikiko zvontlhe lezvi a nga nazvo, a nga zvi koti ku maha mupizani wa mina.” — Luka 14:31-33.

Kunene, lezvo Jesu i wa nga byeli lava a nga kari a famba navo basi. Vontlhe lava va gondzako va tiva Kristu, va fanele ku ti yimisela ku maha lezvi zvi wuliwako laha. Lezvo zvi komba ku loku a munhu a lava ku maha mupizani wa Kristu i fanele ku ti yimisela ku luza zvontlhe lezvi a nga nazvo — titshomba hambu wutomi gakwe futsi. A munhu i fanele ku ranga hi ku ehleketa khwatsi a tlhela a khongela hi mhaka leyi.

Makunu Jesu i no wulawula hi mhaka a nga yi kumbukile a cikhati a nga Kanela le Citsungeni, laha a ngaku a vapizani vakwe i “munyu wa misava”. (Matewu 5:13) Ko khwatsi i wa komba lezvaku a ku fana ni lezvi a munyu wu vhikelako zvilo lezvaku zvi nga bholi, a vapizani vakwe va vhikela vanhu lezvaku va ngavi ni mahanyela yo biha va tlhela va va vhuna kuva ni wunghana na Jehovha. Laha a nga kari a mbheta ntiro wakwe, i no wula lezvi: ‘A munyu wu . . . [nene]; kanilezvi loku a munyu wu pswhama, wu ta lungiwa hi yini ke?’ (Luka 14:34) Lava va nga kari va mu ingisela va wa zvi tiva lezvaku a munyu wo kari wu nga hi kona cikhatini leco wu wa chakile hi kota ya lezvi wu nga hi ni misava, makunu wu wa nga vhuni nguvhu.

Makunu Jesu i wo komba lezvaku hambu lava va nga hi vapizani vakwe hi kale va wa fanele ku ti karata kasi va tshama na va ti yimisele ku simama va mu landzela. Loku va nga mahi lezvo, va wa nga ta vhuna nchumu; va wo to fana ni munyu wu nga ha zvi kotiko ku lunga nchumu. Makunu a tiko gi wa ta guma gi va hleka. A ya kubiha ku hundza lezvo, va wa nga ta vhuna nchumu mahlweni ka Nungungulu, hambu ku rukisa vito gakwe futsi. Jesu i no guma a khanyisa lisima la ku va ti wonela kasi lezvo zvi nga humeleli, hi ku wula lezvi: “Loyi a nga ni tindleve ta kuzwa, ngha a ingisa.” — Luka 14:35.