Loku Jesu a gondzisile a tlhela a hanyisa vanhu lomu Judhiya ni Jerusalema, i no guma a tsemakanya Congo wa Jordhani kasi a ya gondzisa hi muti ni muti lomu dhistrito ga Pereya. Hambulezvo, i no hatla a tlhela le Jerusalema.

Laha a nga hi le Pereya, a wanuna wo kari i no mu wutisa lezvi: “Hosi, va tsongwani lava va hanyiswako ke?” Kuzvilava a wanuna loye i wa zvi tiva ku a varangeli va wukhongeli va wa zametela ku tiva ku va tele va to hanyisiwa ni ku vatsongwani ke. Jesu i no djikisa mhaka a wulawula hi lezvi a munhu a faneleko ku maha kasi a hanyisiwa, aku: “Kurumetani ku nghena hi nyangwa yi hlongileko.” Kunene, zvi lava kulwa ni kutikarata. Hikuyini? Jesu i no tlhamusela aku: ‘Hakuva . . . vanyingi va ta nga ringa ku nghena, kanilezvi va ta tsandzeka.’ — Luka 13:23, 24.

Jesu i no komba lezvaku ku laveka ku ti karata nguvhu futsi, hi ku wula lezvi: “Loku a n’winyi wa yindlu a vhukile, a vhala livati, zvonake na mu yimile lahandle, mu sangula ku gongondza, muku: Hosi, hi vhululele; i ta mu hlamula, aku: . . . A ndzi ku tivi laha mu tako ha kona; sukani ka mina, n’wina n’wentlhe mu mahako kubiha.” — Luka 13:25-27.

Lezvo zvi komba ciyimo ca munhu a nga celwa ku chikela, zvonake a ta kuma lezvaku a livati li vhalilwe li tlhela li khotsiwa — kuzvilava na a no ranga hi ku ti mahela zvakwe. A munhu loye i wa fanele ku hatla a chikela, hambu ku hi lezvaku i wa fanele ku ti karata. Hi zvalezvo zvi nga humelela votala cikhatini ca Jesu, lava va nga fanele ku vhuneka hi lezvi a nga kari a gondzisa. Va tsikile ku londzowota thomo lego ga ku rangisa wukhozeli ga lisine wutomini gabye. A kutala ka lava Jesu a nga rumelwe ku ya va chumayela, a va gi amukelangi a lulamiselo ga Nungungulu ga ku hanyisa vanhu. Jesu i no va byela lezvaku va ta hoxiwa lahandle, va yaba ‘mikosi va getsela meno’. Kanilezvi, a vanhu va le ‘Mutsuwuka-gambo, ni Mupela-gambo, ni le N’walungu, ni Dzongeni’ — ku nga vanhu va matiko wontlhe — “va ta tshama kugeni Mufun’weni wa Nungungulu.” — Luka 13:28, 29.

Jesu i no tlhamusela aku: “A van’wani va lava vo gumesa [vo kota lava va nga hiko vaJudha ni vaJudha va nyalidede] va tava vo ranga, ni van’wani va lava vo ranga [a varangeli va wukhongeli, lava va nga ti dzundza hi kuva vana va Abrahama] va tava vo gumesa.” (Luka 13:30) A kuva a vanhu lavo vo kala ku bonga vava “vo gumesa”, zvi wula ku a Mufumo wa Nungungulu va nga ta wu danja.

Makunu ku no guma kuta vaFarisi vo kari va ta kuca Jesu vaku: “Suka laha, u ti fambela; hakuva Herodhi [Antipasi] i lava ku ku daya.” Kuzvilava hi yena Hosi Herodhi futsi a nga sangulile ku wulawula hi mhaka leyi ya ku hlongola Jesu. Kuzvilava i wa chava ku a nga tshuka a daya muphrofeti mun’wani, a ku fana ni lezvi a nga daya Johani Mubhabhatisi. Kanilezvi, Jesu i no byela vaFarisi aku: “Fambani, mu ya byela hlati loye, . . . [muku i te] inyamutlha na mandziko ndzi hlongola madhimoni, ndzi hanyisa a vababyako, ndzi ta mbhetisa  mondlwani.” (Luka 13:31, 32) Kuzvilava Jesu i wa fananisa Herodhi ni “hlati” hi kota ya kutlhariha. Hambulezvo, Jesu a nga vhumelangi ku kalavelwa ne ku tsemariswa ntiro hi Herodhi ne hi munhu mun’wani. A nga ingisangi vanhu. I no maha ntiro lowu a nga nyikilwe hi Papayi wakwe — a wu maha hi cikhati ca Nungungulu.

Jesu i no guma a simama ni pfhumba gakwe, aya Jerusalema. I no wula cigelo ca kona laha a ngaku: “A zvi faneli lezvaku a muphrofeti a dawa lehandle ka Jerusalema.” (Luka 13:33) A ku na ciphrofeto ca Bhibhiliya ci nga wula lezvaku Mesiya i ta dayelwa lomu Jerusalema. Makunu hikuyini Jesu a nga lava ku dayelwa kona? Hi ku a dhoropa ga Jerusalema gi wa hi gona tsindza, niku hi kwale ku nga hi ni 71 wa zviro zva Hubye ya Hombe ya Kulamula, lezvi zvi nga lamula lava va nga woniwa kota vaphrofeti va mawunwa. A cin’wani kambe, hi kwaleyo ku nga mahiwa miphahlo ya zvihari. Hikwalaho, Jesu i wa zvi tiva a ku ku wa nga hi na ndlela ya ku va mu dayela ka wutshamu gin’wani.

I no rilela tiko lego aku: “Jerusalema, Jerusalema, wena loyi u dayako vaphrofeti, ni ku gandla hi maribye lava va rumelweko ka wena! Zvikhati zvingani ndzi nga xuva ku wungeletela a vanana va wena, kota a pswele gi wungeletelako a zvihukwana zva gona lahasi ta tipapa ta gona, kanilezvi a mu zvi randzangi! Langutani, mu ta siyelwa a yindlu ya n’wina na yi hi rumbi”! (Luka 13:34, 35) Kunene, a vaIzrayeli va wo ala N’wana wa Nungungulu, niku va wa ta ti hala khombo hi zvona.

Na a nga se chikela lomu Jerusalema, Jesu i no rambiwa hi murangeli wo kari wa vaFarisi kasi a yaga naye le kaya kakwe hi Sabhadho. Ku wa hi ni wanuna a nga xaniseka hi mababyi ma vitaniwako ku i hidropisia (mababyi ya ku tala zvilo zvo khwatsi i mati lomu mirini, a kutala ka zvikhati lomu ka minenge ni lomu ka mikondzo). Makunu lava va nga rambilwe va no mu cuwuka nguvhu Jesu, na va lava ku wona ku i ta maha yini. Jesu i no wutisa vaFarisi ni van’wani va nga wu tiva khwatsi Nayo aku: Zva ‘fanela ku hanyisa [munhu] hi Sabhadho,’ kutani a zvi faneli ke? — Luka 14:3.

Vontlhe va no kape. Jesu i no hanyisa wanuna loye a guma a va wutisa lezvi: ‘Hi wihi wa n’wina a nga ni mbongola, kutani homu, yi welako hlobyeni, loyi a nga hatlisiko a ku yi humesa hi . . . Sabhadho ke?’ (Luka 14:5) Ka khati legi kambe, a va kumangi co wula ka mitlhamuselo leyo yo zwisiseka.