Loku Jesu a hanyisile wanuna loyi a nga babya hi hidropisia, a nga tekelangi ku suka laha kaya ka muFarisi loyi a nga mu rambile. I no guma a wona vanhu na va hlawula matshamu ya ma nene nguvhu laha mezeni, a se tekela ku londzowota ku gondzisa lisima la ku ti koramisa.

I te: “Loku u rambilwe mubuzweni wa muchadho, u nga tshami citshan’wini ca kuranga; ku nga taku loyi a dhumileko a ku hundza wena a rambilwewo; zvonake loyi a nga ku ramba, i tata a taku ka wena: Nyika wutshamu legi ka munhu loyi; zvonake u ta suka hi tingana, u ya teka citshamu ca lendzhako.” — Luka 14:8, 9.

I no guma aku: “Loku u rambilwe, famba u ya tshama citshan’wini ca lendzhako; kasi laha a tako loyi a ku rambileko, a taku ka wena: Xaka, yana hi le mahlweni. Zvonake u tava ni wudhumo mahlweni ka vona lava va tshamileko zvakugeni zvin’we na wena.” Lezvo zvi wa nga hi ku kombisa cichawo ntsena. Jesu i no tlhamusela aku: “Ni wihi a ti kulisako i ta koramiswa; ni loyi a ti koramisako i ta kuliswa.” (Luka 14:10, 11) Kunene, Jesu i wo kuca lava va nga mu ingisela lezvaku va va vanhu vo ti koramisa.

Jesu i no guma a yisa kupima ka muFarisi loyi a nga mu rambile, a mu gondzisa nchumu wa lisima — ku nga ku maha festa yi tsakisako Nungungulu. I te: “Loku u maha mubuzo laha hlikanhini, kutani wa laha gambyeni, u nga rambi vanghana va wena, hambu . . . [vamakabye va wena], hambu maxaka ya wena, hambu vaakelane va wena lava . . . [vo ganya]; ku nga taku na vona va ku ramba, kasi wa tlheliselwa. Kanilezvi laha u mahako a mubuzo, ramba zvisiwana, ni zvirela, ni zvilima, ni zvikhumu; zvonake u ta kateka, hakuva va vhumala zva ku ku tlhelisela ha zvona”. — Luka 14:12-14.

Kunene loku a munhu a maha festa i tolovela ku ramba vanghana, ni maxaka, ni vaakelane. A hi ku khwatsi Jesu i waku lezvo zvi bihile. Kanilezvi, i wo khanyisa lezvaku a ku a munhu a maha festa a ramba zvisiwana, ni zvilima, ni zvikhumu zvi neha makatekwa. I no guma a tlhamusela loyi a nga mu rambile, aku: ‘U ta tlheliselwa kuvhukeni ka valulamileko.’ A wokari a nga rambilwewo i no seketela Jesu, aku: “I katekile loyi a ta ngaga zvakuga Mufun’weni wa Nungungulu.” (Luka 14:15) I no zvi zwisisa ku lego gi wa tava thomo ga hombe nguvhu. Kanilezvi, a mufananiso lowu Jesu a nga hlawutela hi kulandzela, wu komba lezvaku a hi vontlhe va nga zvi wonisa lezvo.

I te: ‘A munhu wo kari i no maha mubuzo wa hombe, a ramba votala. I no ruma a nandza gakwe . . . a ku ya byela lava va rambilweko ku ngalo: Tanani, hakuva zvontlhe zvi longile. Vona vontlhe va no sangula ku . . . [ti lavela zvigelo]. A wa kuranga i te ngalo ka nandza: Ndzi xavile simu, ndzi fanele a ku ya gi wona; ndza ku khongotela a kuva ndzi tlhatlheka. A mun’wani aku ngalo: Ndzi xavile ntlhanu wa mipatswa ya . . . [tihomu], ndzi famba ndzi ya ti ringisa; ndza ku khongotela a kuva ndzi tlhatlheka. Ni mun’wani aku ngalo: . . . [Ndza hi ku teka sati], hikwalaho a ndzi zvi koti kuta.’ — Luka 14:16-20.

A zvigelo zvabye zvi wa nga zwali ne ni kutsongwani! A munhu i wa tolovela ku ranga hi ku hlola khwatsi a simu kutani zvifuyo na a nga se xava; maku zvi wa nga ha hi zva cihatla a ku zvi hlola kambe. Loyi wa wunharu, i wa nga longiseli muchadho, i wa chadhile. Lezvo zvi wa nga mu vhaleli kuya festeni ya lisima leyi a nga rambilwe. Laha a hosi yi ngazwa lezvi va nga wula lava yi nga va rambile, yi no zangara nguvhu, yi guma yi gi ruma kambe a nandza ga yona.

Yi te: “Hatlisa u famba . . . tindleleni ta . . . [dhoropa], u tisa laha a zvisiwana, ni zvirela, ni zvikhumu ni zvilima.” A nandza gi no maha lezvo, hambulezvo ku no sala wutshamu. A hosi yi no byela nandza ga yona kambe yiku: ‘Famba magondzweni ni tihlavhini, u kurumeta vanhu ku ta nghena, kasi a yindlu ya mina yi fela ku tala. Hakuva ndziku ka n’wina: A nga kona ni mun’we wa vona lava  va rambilweko a ta nga lazva a mubuzo wa mina.’ — Luka 14:21-24.

Lezvi Jesu a nga hlawutela zvi wa dlunyatisa khwatsi lezvi Jehovha Nungungulu a nga mu rumisa zvona Jesu Kristu lezvaku a ta ramba vanhu kasi va ringanelwa hi ku nghena Mufun’weni wa Nungungulu. A vo sangula ku rambiwa kuve vaJudha — nguvhunguvhu lava va nga hi varangeli va wukhongeli. A kutala kabye va no ala a cikhati leci Jesu a nga fambafamba a tira. Kanilezvi a zvi nyimangi laho, ku wa ta rambiwa van’wani. Jesu i no komba zvi ku dlunya lezvaku cikhatini ci nga hata, ku wa ta rambiwa vaJudha va nyalidede ni vaprozelita. Andzhako ka lezvo, ku wa ta rambiwa a ntlawa wa wunharu, ku nga ntlawa wo gumesa wu wumbiwako hi lava a vaJudha va nga va wona na va nga amukeleki mahlweni ka Nungungulu. — Mitiro 10:28-48.

Kunene, lezvi Jesu a nga wula, zvi tiyisa magezu ya wokari a nga rambilwewo; loyi a ngaku: “I katekile loyi a ta ngaga zvakuga Mufun’weni wa Nungungulu.”