A cikhati leci Jesu a nga tiva lezvaku a Hubye ya Hombe ya Kulamula yi lava ku mu daya, i no chela mati ka makungo yabye, a suka ni vapizani vakwe a ya dhoropeni ga Efrayime le N’walungu wa Mupela-gambo wa Jerusalema, a tsawukana ni valala vakwe. (Johani 11:54) Laha a Phasika ga 33 Nguveni ya Hina gi nga hi kusuhani, zvi no lava ku Jesu a endza kambe. I no kongoma Mupela-gambo, a nghena Samariya na aya Galileya a ya tira hi khati go gumesa.

Zvalezvi Jesu a nga sangula ku fambafamba hi cidhoropana ni cidhoropana, i no kuma 10 wa vavanuna va nga babya hi hlokonho. Loku munhu a gilwe hi wubabyi lego, a nga tsemekela zviro zvo kari, zvo kota titiho kutani tindleve. (Mitsengo 12:10-12) A Nayo wa Nungungulu wu wa wula lezvaku loku munhu a hi ni hlokonho i fanele ku tsawukana ni van’wani a tlhela a pongolokelana aku: “A ndzi hlazvekangi, a ndzi hlazvekangi!” — Levhi 13:45, 46.

A vavanuna lavo va 10 va no ingisa nayo lowu, va nga tshineli kusuhani ka Jesu. Va no banguleka hi kwale kule vaku: “Jesu, Hosi, hi mahele wuxinji!” Laha Jesu a nga va wona, i te: “Fambani mu ya ti kombisa ka vapristi.” (Luka 17:13, 14) Hi ndlela leyo, Jesu i no komba lezvaku i wa hi ni cichawo hi Nayo wa Nungungulu. Hakuva wu wa ku a vapristi hi vona va nga ni fanelo yo byela munhu a nga hanyisiwa hlokonho ku i hanyile. Makunu hi kona va nga wa ta tlhela va patsana ni van’wani, va hanya navo. — Levhi 13:9-17.

A vavanuna lavo va 10, va wa kholwa ku Jesu i na ni ntamu wa ku maha zvihlamaliso. Hikwalaho, va no suka vaya ka vapristi hambu lezvi ka ku va wa nga se hanya. Na va ha hi lomu ndleleni, va no chachazelwa hi lezvi va nga kholwa ka Jesu. Va no sangula ku zvi wona va tlhela va zvizwa ku gi wuyile makunu!

A 9 wa vona va no hanya va fambela teto. Kanilezvi, a mun’we wabye a nga hi muSamariya i no tlhela a ya lavetela Jesu. Hikuyini? Hakuva a wanuna loye i wa mu bonga nguvhu Jesu hi lezvi a nga mu mahele. I wa kari a “dhumisa Nungungulu hi gezu ga hombe” kambe hakuva i wa zvi zwisisa ku hi Nungungulu a nga mu hanyisa. (Luka 17:15) Makunu laha a nga kuma Jesu, i no mu khizamela a mu bonga.

Jesu i no wutisa lava va nga hi kona aku: “Kasi a hi 10 va nga basiswa ke? Makunu lava van’wani va 9 va kwihi? Hikuyini lava van’wani va nga kala ku wuya va ta dhumisa Nungungulu, ku wuya wanuna loyi wa gin’wani tiko basi?” Jesu i no guma a byela muSamariya loye aku: “Suka u ti fambela; a kukholwa ka wena ku ku hanyisile.” — Luka 17:17-19, NM.

A kuva Jesu a zvi kotile ku hanyisa vavanuna lavo va 10 va nga babya hi hlokonho, cikombiso ca lezvaku i wa nyikiwa ntamu hi Nungungulu. A wanuna loye wa muSamariya a nga no hanyisiwa basi zvi gama kwalaho; i tlhelile a zwisisa zvilo zvi nga wa ta maha ku ava ndleleni ya ku kuma wutomi ga pindzukelwa. Inyamutlha, a hi hanyi cikhatini leci Nungungulu a nga kari a maha zvihlamaliso hi ku tirisa Jesu. Hambulezvo, loku hi kholwa ka Jesu, hi ngava ndleleni ya ku kuma wutomi ga pindzukelwa. Hikwalaho, hi fanele ku pimanyisa muSamariya, hi kombisa kubonga.