Laha Jesu a nga kari aya Jerusalema na a suka hi Pereya, i no tshinelelwa hi mufana a mu khizamela. A mufana loye i wa hi “mufumeli wo kari”, kuzvilava i wa hi murangeli wa sinagoga kutani ciro ca Hubye ya Hombe ya Kulamula. I no wutisa Jesu aku: “Mugondzisi [wa mu] nene, ndzi ta maha yini kasi ndzaga a tshomba ya wutomi ga pindzukelwa ke?” — Luka 8:41; 18:18; 24:20.

Jesu i no mu hlamula aku: “Hi yini u ndzi vitanako uku ndzi [mu] nene ke? A ku na loyi [a nga mu] nene, saseka mun’we, yena Nungungulu.” (Luka 18:19) Ko khwatsi a mufana loye i vitanile Jesu aku ‘Mugondzisi wa mu nene’ kota cikhundla, khwatsi hi lezvi a varabi va nga maha. Hambu lezvi ka ku Jesu i wa hi mu nene laha ko gondzisa, i no byela mufana loye lezvaku a cikhundla caku wa ‘Mu Nene’, hi Nungungulu yece a faneleko ku vitaniwa hi cona.

Jesu i no mu kuca aku: “Loku u lava ku kuma wutomi ga pindzukelwa, u nga tsiki ku ingisa Milayo.” A mufana loye aku: “Yihi ya kona?” Jesu i no guma a hlawula 5 wa Milayo ka leyi ya Khume yi nga nyikilwe hi Mosi. Aku: “U nga dayi, u nga mahi wubhayi, u nga yivi, u nga yimeli zvilo zva mawunwa, kombisa cichawo ka papayi ni ka mamani wa wena”. I no guma a engetela Nayo wun’wani wa lisima nguvhu aku: “Randza muakelani wa wena a ku fana ni lezvi u ti randzisako zvona.” — Matewu 19:17-19, NM.

A mufumeli loye i no byela Jesu aku: “Zvontlhe lezvo ndzi zvi hlayisile; ndza ha kiyelelwa hi yini ke?” (Matewu 19:20) Kuzvilava i wo zvi wonisa ku khwatsi ka ha kiyela ku a maha nchumu wo hlawuleka kasi a ringanelwa hi ku kuma wutomi ga pindzukelwa. Jesu i no zvi zwisisa ku i wa wutisa hi mbilu yontlhe, a se “mu randza”. — Marku 10:21.

Kanilezvi a mufumeli loye i wa hi ni cikarato, i wa ti randza nguvhu a titshomba takwe. Hikwalaho, Jesu i te: ‘Wa ha vhumala cilo cin’we; famba u ya xavisa zvontlhe lezvi u nga nazvo, u nyika zvisiwana; zvonake u tava ni tshomba le tilweni; zvonake ngone u ndzi landzela.’ A mufana loye i wa fanele ku teka mali leyi a nga hi nayo a phakela zvisiwana — ku nga vanhu va ku va wa nga ta zvi kota ku mu hakhela — a guma a maha mupizani wa Jesu. Kanilezvi, a mufana loye i no tsuva,  a suka a yima, a ti fambela. Zvi wonekisa ku Jesu i mu zwele wusiwana! A lirandzo leli a nga hi nalo hi titshomba takwe — a “titshomba to tala” leti a nga hi nato — li mu mahile cikhumu, a nga yi woni tshomba ya lisima ka tontlhe leyi a nga wa ta yi kuma! (Marku 10:21, 22) Jesu i no guma aku: “Zvi ta karata nguvhu a ku lava va nga ni mali va nghena Mufun’weni wa Nungungulu!” — Luka 18:24, NM.

A magezu lawo ya Jesu, ni lezvi a nga guma a wula hi kulandzela, zvi va hlamalisile nguvhu a vapizani vakwe. I te: ‘Zva hehuka ka kameli ku nghena non’wini wa chingani, ku hundza munhu [wo ganya] . . . ku nghena Mufun’weni wa Nungungulu.’ Va no guma va mu wutisa vaku: “Kasi himani a nga hanyiswako ke?” Ku ngava lezvaku Jesu i waku kasi a munhu a hanyiswa ku laveka zvilo zvo karata zva ku a zvi koteki ke? Jesu i no va cuwuka aku: “A zvilo lezvi zvi nga kotekiko ka vanhu, zva koteka ka Nungungulu.” — Luka 18:25-27.

Pedro i no guma a wula lezvaku vona va mahile zvo hambana ni lezvi zvi nga mahiwa hi mufana loye wo ganya, aku: “Hina hi siyile zvontlhe, hi ku landzela; a nchachazelo wa hina hi wihi ke?” Jesu i no va byela lezvi va nga wa ta chachazeliswa zvona hi lezvi va nga hlawulile nchumu wa wu nene, aku: “Cikhatini ca ku vhuxetwa luswa ka zvontlhe, laha a N’wana wa munhu a ta nga tshama citshan’wini cakwe ca wuhosi, n’wina lava mu ndzi landzeleko mu ta tshama ka 12 wa zvitshamu zva wuhosi, mu lamula a 12 wa tixaka ta Izrayeli.” — Matewu 19:27, 28.

Laha Jesu a nga wula lezvo i wa wulawula hi cikhati leci a zvilo zvontlhe laha misaveni zvi to tlhela zvi mahiwa zviswa, zvi fana ni lezvi zvi nga tshamisile zvona le Edheni. Pedro ni vapizani van’wani va wa ta ya fuma na Jesu, va fumela misava ya Paradhise. Hakunene, zvi wa ringana futsi a ku va ti karata hi tindlela tontlhe kasi va kuma nchachazelo lowo!

Kanilezvi a hi wontlhe makatekwa va nga wa ta ma kuma ka cikhati ci nga hata. A man’wani va wa kari va ti buza hi wona. Jesu i naku: “A ku na munhu loyi a siyileko yindlu, kutani sati, kutani . . . [vamakabye], kutani vapswali, kutani vana, hi kota ya Mufumo wa Nungungulu, loyi a ta nga kala ku amukela hi kuengetilweko kunyingi a ka leci cikhati, ni ka tiko gi tako a wutomi ga pindzukelwa.” — Luka 18:29, 30.

Kunene, ni kwihi laha a vapizani vakwe va nga wa taya kona, va wa ta ti buza hi wunghana go tsakisa ni vakhozeli-kulobye. A wunghana lego gi wa hi ga lisima nguvhu a ku hundza legi va nga hi nago ni zviro zva mingango yabye. Le’ci nga tsakisiko, hi lezvaku zvi wonekisa ku a mufumeli loye wo ganya i wa ta luza makatekwa wontlhe lawo ni wutomi Mufun’weni wa Nungungulu le tilweni.

Jesu i no engeta aku: ‘Kanilezvi a vanyingi va lava va kuranga, va tava vo gumesa, ni lava vo gumesa va tava va kuranga.’ (Matewu 19:30) I wa lava ku wula yini?

A Mufumeli loye wo ganya i wa hi cikari ka lava “va kuranga” hakuva i wa hi mun’we va varangeli va vaJudha. Kota lezvi a nga ingisa Nayo, zvi wa wonekisa ku khwatsi a nga maha mupizani wa Jesu a tlhela a maha zvilo zvo tala zva zvi nene na a hi ni lava va nga landzela loyi a nga Mesiya hakunene. Kanilezvi, i wa rangisa nguvhu titshomba wutomini gakwe. I wa hambene ni vanhu laha va yileko, hakuva va wa zvi wona ku lezvi Jesu a nga kari a gondzisa lisine niku zvi nga va maha va kuma wutomi. Hi nga zvi wulisa lezvi: A vanhu laha va yileko va wa hi “vo gumesa”; kanilezvi va no sangula kuva “va kuranga.” Makunu va wa rindzela ku ya tshama zvitshan’wini zva wuhosi na Jesu le tilweni, va fumela misava ya Paradhise.