Ka cikhati co kari, Jesu i no tira lomu Pereya, ku nga hi le ‘tlhatuko wa Jordhani’. (Johani 10:40) I no guma a suka a ya Dzongeni a kongoma Jerusalema.

I wa nga hi yece, i wa famba ni vapizani vakwe ni ‘cidlemo ca hombe’, a ku patsa ni vahlengisi va khupo ni vawonhi. (Luka 14:25; 15:1) Hambu vaFarisi ni vatsali lava va nga solasola lezvi Jesu a nga wula ni ku maha, va no famba naye. Ka cikhati leco, va wa hi ni zvotala zvo ehleketa hi zvona hakuva va wa ha hi kuzwa Jesu na a hlawutela mufananiso wa yivhu yi nga lahlekile, wa n’wana a nga pengile, ni wa wanuna wo ganya na Lazaru. — Luka 15:2; 16:14.

Jesu i no guma a wulawula hi vapizani vakwe. Kuzvilava i mahile lezvo hi ku alakanya lezvi a valala vakwe va nga mu sola hi zvona va tlhela va mu tseketsela. I no kumbuka zvokari a nga va gondzisile na a hi le Galileya.

Hi cikombiso, Jesu i te: “A zvi koteki lezvaku ku nga humeleli nchumu wa ku maha munhu a wonha. Hambulezvo khombo ka loyi wu tako ha yena! . . . Ti woneleni. Loku a makabye wa wena a wonha, mu kawuke, loku a ti sola mu tsetselele. Hambu loku a ku wonhela 7 wa makhati hi siku, kanilezvi ata ka wena 7 wa makhati a taku: ‘Ndza ti sola,’ mu tsetselele.” (Luka 17:1-4, NM) A magezu ya Jesu yo gumesa kuzvilava ma mahile Pedro a alakanya lezvi a nga wutisile zva ku a munhu i fanele ku mu tsetselela 7 wa makhati ke. — Matewu 18:21.

Xana a vapizani va Jesu va wa ta zvi kota ku hanya hi lezvi a nga va gondzisile? Laha va nga kombela Jesu vaku: “Engetela kukholwa ka hina”, i no va tiyisekisa aku: “Loku mu wa hi ni kukholwa ku kotisa a mbewu ya cinapi, ngha muku ka sinya leyi ya nkuwu: Simuka, u ya byaliwa bimbini; yi wa ta mu ingisa.” (Luka 17:5, 6) Kunene, a kukholwa ku nga hi vhuna ku maha zvilo zva hombe!

Jesu i no simama ku gondzisa, a va komba lisima la ku ti koramisa, va nga ti woni va hi va lisima ku hundza van’wani. I no byela vapostoli vakwe aku: “Hi wihi wa n’wina, loyi a nga ni nandza gi rimako, kutani gi risako tiyivhu, loyi a ta ngaku ka gona laha na gita hi le masin’wini: Hatlisa, u ta tshama uga? Kutani a nga ta wula ka gona, aku: Ndzi longisele zvakuga, u ti boha bhandi, u ndzi khozela, ndzi kala ndziga ni kunwa; andzhako wenawu u taga ni kunwa. Xana i ta bonga a nandza hi lezvi gi nga maha lezvi gi layilweko ke? Hizvalezvo na n’winawu, loku mu mahile zvontlhe lezvi mu layilweko zvona, wulani muku: Hi malandza ma nga vhuniko nchumu; hakuva hi mahile ntsena lezvi hi yimelweko hi ku zvi maha.” — Luka 17:7-10.

Hikwalaho, hontlheni hi fanele ku tiva lezvaku a ku tirela Nungungulu zvi fanele kuva zvo ranga wutomini ga hina. Niku hi fanele ku bonga a thomo legi Nungungulu a nga hi nyika ga ku hi mu tirela kota zviro zva ngango wakwe.

Zvi wonekisa ku zvalezvi Jesu a nga ku bhi ku wulawula, ku nota wokari a ta mu byela lezvi: “Hosi, . . . loyi u mu randzako wa babya.” A munhu loye i wa rumilwe hi Mariya na Marta, a vamakabye va Lazaru. A vavasati lavo va wa tshama le Judhiya, ka cidhoropana ci nga vitaniwa ku i Bhetaniya. — Johani 11:1-3.

Hambu lezvi Jesu a ngazwa lezvaku a munghana wakwe Lazaru wa babya nguvhu, a nga bayisekangi a mbhela ni ntamu. Kanilezvi i te: ‘Legi wubabyi a gi yisi kufeni, kanilezvi gi yisa kudzundziweni ka Nungungulu; kasi a N’wana wa Nungungulu a fela ku dhumiswa ha gona.’ I no tshama masiku mambiri kwale a nga hi kona, a guma a byela vapizani vakwe aku: ‘A hi tlheleni Judhiya.’ Vona va no khala vaku: “Rabi, lokuloku lezvi a vaJudha va nga lava ku ku gandla hi maribye; wa haya kona kambe ke?” — Johani 11:4, 7, 8.

Jesu i no hlamula aku: “A siku a gi na 12 wa tihora ta kuwonekela ke? Loku a munhu a famba ni mumu a nga ti gumuli hi nchumu hakuva wa wona kuwonekela ka tiko legi. Kanilezvi loku a munhu a famba ni wusiku wa ti gumula, hakuva a kuwonekela  a ku kona ka yena.” (Johani 11:9, 10, NM) Hi magezu lawo, i wo komba lezvaku a cikhati leci Nungungulu a nga pimile kasi Jesu a tira ci wa nga se mbhela. Hikwalaho, Jesu i wa ha fanele ku tira nguvhu ka cikhatana leci ci nga ha mu salele.

Jesu i no guma aku: “Lazaru, a xaka ga hina, i etlele; kanilezvi ndza famba, ndzi ya mu vhuxa.” A vapizani vakwe a va zvi zwisisangi, ko khwatsi va pimisile ku i no etlela a humula kasi a ta kalamuka mababyi; va se: “Hosi, loku a etlele, i ta kalamuka.” Jesu i no tekela ku zvi dlunyatisa, aku: “Lazaru i file . . . kanilezvi a hi yeni kakwe.” — Johani 11:11-15.

Tomasi i wa zvi tiva ku Jesu a nga tshuka a ya dawa le Judhiya. Hambulezvo, i no lava ku mu seketela, a se kuca vapizani-kulobye aku: “A hi fambeniwo, hi yafa naye.” — Johani 11:16.