Laha Jesu a nga kari a tira, i phindaphindile ku khanyisa lisima la ku ti koramisa. (Luka 14:8-11) I wa kari a zama ku kuma vanhu — vavanuna ni vavasati — lava va nga zvi lava ku ti koramisa va tirela Nungungulu. Kanilezvi kala ka cikhati leco, a vokari va vona va wa ha tiveka kota vawonhi.

A vaFarisi ni vatsali va no wona lezvaku a vanhu lavo — va nga kala va nga hi va lisima ka vona — va wa tsakela Jesu ni mahungu lawa a nga kari a chumayela; va se khala vaku: Jesu “wa amukela vawonhi, aga navo”! (Luka 15:2) A vaFarisi ni vatsali va wa wona vanhu laha va yileko kota timbongola [kutani, “vo biha”]; va va vitana hi gezu ga ciHebheru gaku ‛am ha·’aʹrets, gi nga komba lezvi va nga va chepetisa zvona.

Kanilezvi Jesu i wa va nyika lisima vontlhe, a va zwela wusiwana a tlhela a va khatalela khwatsi. Hikwalaho, a kutala ka lava va nga tiviwa kota vawonhi va wa zvi lava nguvhu a kuzwa lezvi Jesu a nga kari a gondzisa. Makunu, Jesu i ti zwisile kuyini lezvi a vaFarisi ni vatsali va nga kari va wulawula kubiha hi yena hi lezvi a nga vhuna vanhu lavo va nyalidede? Kona zvini a nga maha?

A hlamulo hi wu kuma ka mufananiso wo khumba mbilu a nga hlawutela, wo fana ni lowu a nga hlawutele le Kapernawume. (Matewu 18:12-14) Ka mifananiso yontlhe ya yimbiri, Jesu i zvi mahisile ku khwatsi a vaFarisi hi vona vo lulama, va nga tiyivhu ti hlayisekileko lomu rangeni kutani cibaleni ca Nungungulu, a vanhu laha va yileko va ku khwatsi hi vona va lahlekileko.

I te: “Hi wihi ka n’wina, a . . . nga ni 100 wa tiyivhu, loku a lahlekelwe hi yin’we ya tona, a nga siyiko leti ta 99 le ciwuleni, a famba a ya lava leyi yi lahlekileko, a kala a yi kuma ke? Laha na a yi kumile, i yi rwala makatleni hi kutsaka. Zvonake loku a chikele kaya, a vitana a maxaka yakwe ni vaakelane vakwe, aku ka vona: Tsakani na mina, hakuva ndzi yi kumile a yivhu ya mina leyi yi nga lahlekile.” — Luka 15:4-6.

I wu tlhamuselisile kuyini a mufananiso lowu? I te: “Zvinghaho ku tava kona kutsaka le tilweni hi kota ya muwonhi mun’we loyi a hundzulukako, a ku hundza loku ku nga kona hi kota ya lava va 99 wa vanhu va lulamileko, lava ku nga lavekiko kabye lezvaku va hundzuluka.” — Luka 15:7.

Laha Jesu a nga wulawula hi kuhundzuluka, zva koteka ku a vaFarisi va dzukile. Va wa ti wona na va lulamile niku va wa alakanya ku a ku na cigelo ca ku va hundzuluka. A cikhati leci a vaFarisi vo kari va nga tseketsela Jesu hi lezvi a ngaga ni vawonhi ni vahlengisi va khupo ka malembe yo kari ma nga hundzile, i va byelile lezvi: “A ndzi telangi  ku ta vitana a valulamileko, kanilezvi a vawonhi.” (Marku 2:15-17) Kota lezvi a vaFarisi va nga ti wona na va lulamile, va wa nga ci woni cigelo ca ku va ti sola va hundzuluka. Lezvo zvi wa nga tsakisi munhu le tilweni. Kanilezvi, loku a muwonhi a hundzuluka, ka tsakiwa nguvhu le tilweni.

Jesu i no hlawutela mufananiso wun’wani kasi ku komba lezvaku hakunene ka tsakiwa nguvhu le tilweni loku a muwonhi a ti sola. Lowo wu yelana ni zvilo zva laha mutini. I te: “A wasati loyi a . . . nga ni khume ga macheleni, loku a lahlekelwa hi cheleni gin’we, xana a nga lumeki kandiya, a swiyela yindlu, a lavisisa a kala a gi kuma ke? Laha na a gi kumile, i vitana a maxaka yakwe ni vaakelane vakwe, aku: Tsakani na mina, hakuva ndzi gi kumile a cheleni legi ndzi nga lahlekelwe ha gona.” — Luka 15:8, 9.

Lezvi Jesu a nga gondzisa ka mufananiso lowu, zva fana ni lezvi a nga gondzisa hi mufananiso wa yivhu yi lahlekileko. I naku: “Zvinghaho ku kona kutsaka mahlweni ka tingilozi ta Nungungulu, hi kota ya muwonhi mun’we loyi a hundzulukako.” — Luka 15:10.

A mhaka leyi ya ku a tingilozi ta Nungungulu ti tsaka loku a muwonhi a ti sola a hundzuluka ya hlamalisa. Phela a muwonhi loyi a ti solako a hundzuluka zvonake a ringanelwa hi kuya tilweni Mufun’weni wa Nungungulu i ta kuma cikhundla ca hombe ku hundza tingilozi! (1 Va Le Korinte 6:2, 3) Hambulezvo, a tingilozi a ti lusi. Hinawu hi fanele ku tsaka loku a muwonhi a ti sola hi mbilu yontlhe a tlhelela ka Nungungulu.