Laha Jesu a nga suka le Pereya, i noya Bhetaniya, ci nga hi cidhoropana ci nga kumeka ka pfhuka wa 3 wa tikilometro kusukela le Mutsuwuka-gambo wa Jerusalema. Laha a nga chikela Bhetaniya, Lazaru i wa ha hi kufa. A vamakabye va kona Mariya na Marta va wo rila. Ku wa hi ni vanhu vo tala kambe va nga yile ku ya va chavelela.

Laha a nga hi kusuhani, a wokari i no byela Marta aku Jesu wata; Marta a se tsutsuma a mu khinga, a ya mu byela lezvi kuzvilava yena ni makabye wakwe Mariya ku nga hundza 4 wa masiku na va ehleketa hi zvona, aku: “Hosi, loku u wa hi kona laha, a makabye wa mina . . . [na] a nga fangi.” Hambulezvo, i wa hi ni kutsumba. I te: “Ndza zvi tiva ni zvalezvi, lezvaku ni zvihi lezvi u ta nga zvi kombela ka Nungungulu, Nungungulu i ta ku nyika zvona.” (Johani 11:21, 22) I wa zvi wona ku Jesu a nga maha cokari hi makabye wakwe a fileko.

Jesu i no byela Marta aku: “A makabye wa wena i ta vhuka.” Marta i no pimisa ku Jesu i wa wula kuvhuka ka vafileko ku to maheka cikhatini ci tako laha misaveni, lezvi Abrahama ni van’wani va nga zvi rindzela. I no guma a kombisa lezvaku wa kholwa ku hakunene lezvo zvi ta maheka, aku: “Ndza zvi tiva lezvaku i ta vhuka hi siku go gumesa, a kuvhukeni ka vafileko.” — Johani 11:23, 24.

Hambulezvo, ku ngava lezvaku Jesu i wa ta mu vhuxa ka cikhati caleco? Jesu i no alakanyisa Marta lezvaku Nungungulu i mu nyikile ntamu wa ku vhuxa vafileko, aku: “Loyi a kholwako ka mina, hambu loku a file, i ta hanya; ni wihi a hanyako a kholwa hi mina, cima a nga tafa.” — Johani 11:25, 26.

I wa nga wuli lezvaku a vapizani vakwe lava va nga hanya ka cikhati leco va wa nga tafa. Hambu yena i wa tafa, khwatsi hi lezvi a nga byelile vapostoli vakwe. (Matewu 16:21; 17:22, 23) Jesu i wo khanyisa lezvaku loyi a kholwako kakwe a nga kuma wutomi ga pindzukelwa. A votala va wa ta vhuxiwa kasi va kuma wutomi lego. Hambulezvo, a vanhu vo tsumbeka lava va hanyako cikhati leci ca magumo ya tiko legi ga Sathani, va nga tshuka va ngafi futsi. Kani hi zvihi zvi to maheka, vontlhe lava va kholwako ka Jesu va nga tiyiseka lezvaku va nga ta fela magumo.

Hambulezvo, xana Jesu i wa ta zvi kota ku vhuxa Lazaru, loyi ka cikhati leco ku nga hundza 4 wa masiku na a file? Laha a nga byela Marta aku Jesu aku: “Mina ndzi kuvhuka ni wutomi”, i gumile a mu wutisa lezvi: ‘Wa kholwa lezvo ke?’ I no hlamula aku: ‘Ina, Hosi; ndza kholwa lezvaku hi wena Kristu, a N’wana wa Nungungulu, loyi a nga wa tata misaveni.’ I no kholwa lezvaku Jesu a nga maha cokari ka cikhati caleco, a hatlisa a ya byela Mariya cihundleni aku: “Mugondzisi i kona, wa ku vitana.” (Johani 11:25-28) Mariya i no tekela ku suka a famba. A van’wani va se tekela ku mu landza na va pimisa lezvaku i ya cilahleni ca Lazaru.

Kanilezvi, Mariya i noya ka Jesu, a ya mu khizamela na a rila, a phinda magezu ya makabye wakwe aku: “Hosi, loku u wa hi kona laha, a makabye wa mina . . . [na] a nga fangi.” Jesu i no wona Mariya ni lava van’wani na va rila, a se xukuvala, a karateka aza a rila futsi. Lava va nga hi laho, va no zvi wona ku i wa mu randza Lazaru hi mbilu yontlhe. Kanilezvi, a vokari va no wutisana lezvi: “Xana munhu loyi a nga vhulula mahlo ya cikhumu, . . . [i wa nga] zvi koti . . . ku maha loyi munhu a ngafi ke?”— Johani 11:32, 37.