Jesu i wa sina a va hlawutele mufananiso a vapizani vakwe xungetano hi ku khongela va nga tsiki. (Luka 11:5-13) I no guma a khanyisa a mhaka leyi kambe hi ku hlawutela mufananiso wun’wani. Ko khwatsi ka khati legi i hlawutele na a hi le Samariya kutani le Galileya.

I te: Ka dhoropa go kari ‘ku wa hi ni mulamuli, loyi a nga kala a nga chavi Nungungulu, ni ku nga khatali hi munhu. . . . [Kwalomo] ku wa hi ni noni, leyi yi ngata kanyingi kakwe, yi taku: Ndzi lulamisele a mhaka ka nala wa mina. Ku wa hi cikhati co kari na a nga vhumeli; kanilezvi hi lendzhako i lo alakanya, aku: Hambu lezvi ndzi nga chaviko Nungungulu, ne ni ku khatala hi munhu; kanilezvi kota lezvi a noni leyi yi ndzi karatako, ndzi ta yi lulametela a mhaka, yi nga kala yi ndzi rera loku yi simamisa yita.’ — Luka 18:2-5.

Jesu i no tlhamusela lezvi a nga kari a gondzisa hi mufananiso lowu, aku: “Zwanani lezvi a wulako a mulamuli a nga lulamangiko! Xana Nungungulu a nga ta va photela a vahlawulilweko vakwe, lava va rilako ka yena a mumu ni wusiku, . . . [na a] timisela ha vona ke?” (Luka 18:6, 7) Makunu Jesu i wa komba yini hi Papayi wakwe?

A hi ku khwatsi Jesu i wo wula ku Nungungulu i fana ni mulamuli loye wo kala kululama. Kanilezvi, i wo komba kuhambana, aku: Loku ku hi lezvaku a mulamuli wo kala ku lulama, wa hlamula munhu a tamako ku mu karata, handle ko kanakana Nungungulu i ta hlamula malandza yakwe ma khongelako ma nga tsiki. Nungungulu i lulamile, mu nene kambe. Lezvo hi zvi wona ka lezvi Jesu a nga guma a wula. I te: “Ndziku ka n’wina: [Nungungulu] i ta va photela hi kuhatlisa.” — Luka 18:8.

A kutala ka zvikhati a vanhu va nyalidede ni zvisiwana a zvi mahelwi kululama. A zviganyi ni lava va nduma hi vona va randziwako. Kanilezvi, Nungungulu a nga mahisi lezvo. Loku a cikhati cakwe ci ta chikela, i ta landza kululama, a lovisa vakubiha a ma nyika wutomi ga pindzukelwa a malandza yakwe.

Himani a nga ni kukholwa ko fana ni ka noni leyo? Xana vangani va kholwako lezvaku Nungungulu i ta hatla a maha kululama? Jesu i wa ha hi ku hlawutela mufananiso lowo kasi ku komba lisima la ku khongela hi nga tsiki. Makunu, mhakeni ya ku kholwa ku a mukhongelo wa vhuna, i no wutisa lezvi: “Laha N’wana wa munhu a ta nga wuya, i ta ta kuma kukholwa misaveni ke?” (Luka 18:8) Lezvo zvi komba ku a cikhati leci Kristu a to wuya, zva koteka ku a ngati a ta kuma vanhu vo tala na va hi ni kukholwa ko fana ni loko.

A vokari va nga ingisela Jesu va wa ti tsumba hi kukholwa loku va nga hi nako. Va wa ti byela lezvaku va lulamile, va chepeta van’wani. Makunu Jesu i no hlawutela mufananiso wun’wani na a wula vanhu lavo.

I te: ‘A vavanuna vambiri va noya tempeleni ku ya khongela; a mun’we i wa hi muFarisi, mun’wani a hi muhlengisi. A muFarisi i no yima hi tlhelo a khongela, aku: Nungungulu, ndza ku bonga hi lezvi ndzi nga fananiko ni van’wani vanhu; va nga makhamba, ni vakanganyisi, ni zvirembi, hambu ku khwatsi hi muhlengisi loyi. Ndzi yila kumbiri hi vhiki, ndzi nyika zva wukhume ka zvontlhe lezvi ndzi zvi kumako.’ — Luka 18:10-12.

A vaFarisi va wa tiveka hi ku ti maha vo lulama mahlweni ka vanhu. Va wa maha lezvo kasi ku ti mahela  vito. Va wa tolovela ku ti tsona zvakuga hi Muvhulo ni Wazibili. Ka masiku lawo, lomu mabazarini ku wa tala hi vanhu. Makunu va wa ti tsona hi masiku lawo kasi va woniwa hi vanhu vo tala. Loku va maha minyikelo va wa nyikela zva wukhume futsi— va nga hundzisi ne va nga kengezi. Va wa maha lezvo hambu loku va nyikela hi matsawu. (Luka 11:42) Ka tihweti ti nga hundzile, va wa kombile lezvi va nga va chepetisa zvona a vanhu laha va yileko, hi ku va vitana ku ‘cidlemo ci nga wu tiviko nayo [hi kuya hi lezvi vona va nga wu tlhamuselisa zvona]’. Va tlhela vaku “ci rukatelwe.” — Johani 7:49.

Jesu i no simama ni mufananiso wakwe, aku: ‘Kanilezvi a muhlengisi i no yima kule, a nga tiyangi ni ku tlakusa a mahlo yakwe le tilweni, kanilezvi i no tiba cifuva, aku: Nungungulu, ngha u hi ni wuxinji ka mina ndzi nga muwonhi.’ Kunene, a muhlengisi wa khupo i no ti koramisa a vhumela zvihoxo zvakwe. Jesu i no gemeta hi magezu lawa: ‘Ndziku ka n’wina: Loyi munhu i no tlhela kaya na a hlayiwa loyi a lulamileko ku hundza loyi mun’wani; hakuva ni wihi a ti kulisako i ta koramiswa; kanilezvi loyi a ti koramisako i ta kuliswa.’ — Luka 18:13, 14.

Hi ndlela leyo, Jesu i no komba lisima la ku ti koramisa. A wusungukati lego give ga lisima nguvhu ka vapizani vakwe, lava va nga kulile cikari va vanhu va nga vhuvhumisa nguvhu a zvikhundla ni ku ti lavela wudzundzo. A wusungukati lego, ga lisima nguvhu ka vapizani vontlhe va Jesu kambe.