Hambu lezvi Jesu a nga kari aya Jerusalema, ko khwatsi i wa ha hi laha kaya ka Zakewu ni vapizani vakwe. A vapizani vakwe va wa kholwa ku ko kiyela ku tsongwani kasi a “Mufumo wa Nungungulu” wu yimisiwa, Jesu a sangula ku fuma. (Luka 19:11) A mhaka leyo yonawu va wa nga yi zwisisi, a ku fana ni lezvi va nga kala va nga zvi zwisisi a ku i fanele ku dawa. Hikwalaho, i no hlawutela mufananiso kasi ku va vhuna ku zwisisa lezvaku ku wa ha kiyela cikhati co leha kasi a Mufumo wu yimisiwa.

I te: “A wanuna wo kari a nga pswalelwa ngangweni wa wuhosi, i no endza a ya tikweni ga le kule kasi a ya nyikiwa wuhosi a gumesa a wuya.” (Luka 19:12, NM) Kota lezvi hi zvi wonako, a lipfhumba lelo li wa ta teka cikhati co kari. Handle ko kanakana, Jesu hi yena ‘wanuna loye a nga pswalelwa ngangweni wa wuhosi’, loyi a ngaya “tikweni ga le kule” — ku nga le tilweni — laha a Papayi wakwe a nga wa ta ya mu nyika wuhosi.

Ka mufananiso lowo, a ‘wanuna loyi a nga pswalelwa ngangweni wa wuhosi’, i rangile hi ku vitana 10 wa malandza; gin’we ni gin’we a ta gi nyika pondo ya silivha, a ma byela lezvi: “Bhindzulani ha tona . . . kala ndzi wuya.” (Luka 19:13) A pondo ya zvingerengere zva silivha yi wa hi mali yo tala. Kasi a murimi a hola pondo, i wa fanele ku tira tihweti tinharu ni ku hundza.

Zva koteka ku a vapizani va Jesu va zvi zwisisile ku va fana ni malandza lawo ya 10, hakuva i wa sina a va fananisile ni zvitiri zva ku tshovela. (Matewu 9:35-38) A nga va kombelangi ku va ya tshovela timbewu va wuya tano. Kanilezvi, a ntiro wabye wu wa yelana ni ku tshovela vapizani van’wani, lava va nga wa ta ringanelwa hi ku nghena Mufun’weni wa Nungungulu. A vapizani vakwe va wa fanele ku tirisa cikhati cabye, ntamu wabye ni zvontlhe va nga hi nazvo kasi va kuma van’wani va to nghena Mufun’weni.

Zvini kambe a nga wula Jesu ka mufananiso wakwe? I wulile ku “a vanhu va tiko [ga wanuna loyi wo pswalelwa ngangweni wa wuhosi] va wa mu venga, va ruma . . . [vanhu] hi lendzhako kakwe, vaku: A hi . . . [zvi lavi] ku fumiwa hi munhu loyi.” (Luka 19:14) A vapizani vakwe va wa zvi tiva ku a vaJudha va wa nga mu lavi Jesu. A van’wani va waza va lava ni ku mu daya. Loku Jesu a file a guma a vhuka, a vaJudha laha va yileko va no xanisa vapizani vakwe, va komba lezvaku va wa mu nyenya, va wa nga zvi lavi ku a maha Hosi. — Johani 19:15, 16; Mitiro 4:13-18; 5:40.

Makunu a malandza lawa ya 10 ma mahile yini hi tipondo leti a ‘wanuna wo pswalelwa ngangweni wa wuhosi’ a nga ma siyela aku kala a wuya hi le ko nyikiwa “wuhosi” ke? Jesu i no hlawutela aku: ‘Ku te laha a nga wuyile, na a amukele a wuhosi, i no laya lezvaku a ma vitanwe a malandza lawa a nga ma nyikile mali, lezvaku a fela ku tiva lezvi va bhindzuleko ha yona. A ga kuranga gi nota, gi taku: Hosi, a pondo ya wena yi bhindzule khume ga tipondo. Aku ngalo ka gona: U mahile khwatsi, nandza go saseka; lezvi u nga tsumbeka ka lezvi zvi tsongwani, u ta fumela khume ga miti. A ga wumbiri gi nota, gi taku: Hosi, a pondo ya wena yi bhindzule a ntlhanu wa tipondo. I te ngalo ka gona kambe: U ta fumela ntlhanu wa miti.’ — Luka 19:15-19.

Loku ku hi lezvaku a vapizani va Jesu va wonile ku va wa tirisa cikhati ca vona, ni ntamu wa vona ni zvontlhe va nga hi nazvo kasi ku maha vapizani van’wani — a ku fana ni malandza lawo — va zvi wonile lezvaku Jesu i ta tsaka niku i ta va chachazela hi kutikarata kabye. Lisine ku a wutlhari, ni zviyimo zva vapizani vakwe a zvi fani. Hambulezvo, Jesu, loyi a nga ya nyikiwa “wuhosi”, i ta zvi zwisisa a tlhela a va katekisa hi kutsumbeka kabye ntirweni wa ku maha vapizani. — Matewu 28:19, 20.

Hambulezvo, wona kuhambana ku ngava kona laha ka malandza ya mufananiso wa Jesu. I no simama aku: ‘Ku nota gin’wani gi taku: Hosi, a pondo ya wena hi leyi; ndzi wa yi bohele leswini, hakuva ndzi wa ku chava, hi lezvi u nga munhu wa lunya; u teka lezvi u nga vekangiko, u tshovela lezvi u nga  byalangiko. Yena aku ngalo ka gona: Nandza go biha, ndzi ta ku lamula hi magezu ya wena. Wena u wa kari u zvi tiva lezvaku ndzi munhu wa lunya, ndzi tekako lezvi ndzi nga vekangiko, ndzi tshovela lezvi ndzi nga byalangiko; hikuyini u nga kala ku veka mali ya mina bankeni, kasi a kuwuyeni ka mina ngha ndzi yi vitanile zvin’we ni bhindzu? Zvonake i te ngalo ka vona lavo va nga yimile laho: Mu tekeleni a pondo, mu yi nyika ka loye a nga ni khume ga tipondo.’ — Luka 19:20-24.

A nandza lego gi luzile hi lezvi gi nga kala ku bhindzulisa tshomba ya hosi. A vapostoli va wa ci rindzela hi mahlo yo pswhuka a cikhati leci Jesu a nga wa ta fuma Mufun’weni wa Nungungulu. Makunu ka lezvi a nga wula hi nandza legi go gumesa, va zvi zwisisile lezvaku loku va nga tiri zvi phela, va nga ta fuma naye Mufun’weni wa Nungungulu.

A vapizani va Jesu vo tsumbeka va wa fanele ku kuceka ku va ti tsitsirita. Jesu i no gemeta hi magezu lawa: “Ndza mu byela lezvaku kani himani a nga nazvo, i ta nyikiwa zvin’wani; kanilezvi loyi a nga hiko nazvo, hambu ni leci a nga naco ci ta tekiwa ka yena.” I no tlhavinyeta aku a valala vakwe lava va nga zvi laviko ku a “fuma hehla kabye,” va ta dawa. I no gumesa a suka laho, a tlhavinyeta lipfhumba lakwe aya Jerusalema. — Luka 19:26-28.