A vahlengisi va khupo, ni vatsali, ni vaFarisi lava va nga ha hi kuzwa Jesu na a hlawutela mufananiso wa n’wana a nga pengile, va fanele ku ngha va zvi zwisisile khwatsi lezvaku Nungungulu i ti yimisele ku tsetselela vawonhi lava va ti solako. (Luka 15:1-7, 11) Jesu i no guma a hlawutela mufananiso ka vapizani vakwe makunu. A mufananiso lowo wu wulawula hi wanuna wo ganya a nga tiva lezvaku a nekwa yakwe kutani nandza yi mahile zva hava.

Jesu i te a hosi ya nandza lego yi nozwa lezvaku ga hlakanisela tshomba ya yona. Makunu a hosi yiku yi lava ku gi hlongola. A nandza lego gi ku tse, gi ti wutisa lezvi: “Ndzi ta maha yini, lezvi a hosi ya mina yi ndzi susako wunekweni ga mina ke? A ndzi na ntamu [wa] ku rima, ni ku kombela ndzi na ni tingana.” Kasi gi ti longisela zva mandziko, gi no ti byela lezvi: “Ndza zvi tiva lezvi ndzi ta nga zvi maha, . . . kasi va fela ku ndzi amukela tindlwini tabye laha na ndzi susilwe wunekweni ga mina.” Gi no tekela ku vitana lava va nga dhevha hosi hi mun’we mun’we, gi ta va wutisa, giku: “I nandzu muni u nga nawo ka hosi ya mina ke?” — Luka 16:3-5.

Loyi wo sangula i no hlamula aku: “I zana [100] ga mabarero ya mafura.” Lezvo zvi wa ringana 2200 wa tilitro. Kuzvilava a wanuna loye i wa hi ni simu ga hombe ga maOlivha kutani i wa hi muxavisi wa mafura. A nandza gi no mu byela lezvi: “Hatlisa u teka papilo ga wena ga . . . [mangava], tshama u tsala 50 [1100 wa tilitro].” — Luka 16:6.

A nandza gi no wutisa mun’wani giku: “I nandzu muni u nga nawo wena ke?” Aku: “I zana ga tisakwa ta mavele.” Zvi wa hi kwalomo ka 22 000 wa tilitro. A nandza gi no byela wanuna loye a nga dhevha giku: “Teka papilo ga wena ga . . . [mangava], tshama u tsala 80.” Yenawu loyi gi mu hungulele zvo nyawula. — Luka 16:7.

A nandza lego hi gona gi nga ha wonelela zva timali ta hosi. Hikwalaho, gi wa ha hi ni ntamu wa ku hungula lezvi a vanhu va nga dhevha. Lezvi a nandza lego gi nga va hungulela mangava lava va nga dhevha hosi, gi no maha wunghana ni lava va nga wa ta gi mahela wuxinji loku gi hlongoliwa ntirweni.

A hosi yi no zvi tiva lezvi gi nga maha. Hambu lezvi a hosi yi nga zvi tiva ku yi luzile hi wukanganyisi ga nandza lego, yi no hlamala, yi tlhela yi gi dzundza; hakuva hambu lezvi gi nga hi “nekwa yo biha,” gi wa tirisile “wutlhari.” Jesu i no engeta aku: “A vana va misava leyi va tlharihile ka cizukulwana cabye a ku hundza a vana va kuwonekela.” — Luka 16:8.

A hi ku khwatsi Jesu i no tsakisiwa hi lezvi a nandza lego gi nga maha, ne i wa nga kuci vanhu lezvaku va kanganyisa van’wani lomu ka mabhindzu. Makunu i wa lava ku gondzisa yini? I no kuca vapizani vakwe aku: “Ti maheleni a maxaka [vanghana, NM] hi cuma leci ci nga lulamangiko; kasi loku ci mbhelile, va fela ku mu amukela mixaxeni ya pindzukelwa.” (Luka 16:9) Lisine, hi gondza nchumu wa lisima laha: Hi fanele ku tlhariha hi ti wonela zva mandziko, hi ku maha lezvi zvi to hi vhuna. Kunene a malandza ya Nungungulu kutani “vana va kuwonekela”, va fanele ku tirisa titshomba tabye hi  wutlhari, na va alakanya wutomi ga pindzukelwa legi gi tako.

Hi Jehovha ni N’wana wakwe basi va zvi kotako ku amukela munhu Mufun’weni wa tilo, kutani Paradhiseni laha misaveni a cikhati yi to fumelwa hi Mufumo wakwe. Hikwalaho, hi fanele ku ti tsitsirita, hi zama kuva ni wunghana navo, hi ku seketela ntiro wa Mufumo hi titshomba leti hi nga nato. Loku hi maha lezvo, hi tava ni wutomi ga pindzukelwa, a cikhati leci a ouro, ni prata, ni titshomba tin’wani zvi to loviswa.

Jesu i no tlhela a wula lezvaku lava va tsumbekako laha va hlayisako ni ku tirisa titshomba leti va nga nato, va ta tsumbeka kambe laha ko hlayisa zvilo zva lisima nguvhu. I te: ‘Hikwalaho loku mu nga tsumbekangi ka cuma ci nga lulamangiko, zvonake himani a to mu nyika ku hlayisa titshomba . . . ta lisima? [Lezvo i wa wula zvilo zva lisima lezvi Nungungulu a nyikako vanhu vakwe.]’ — Luka 16:11.

Jesu i wo komba vapizani vakwe lezvaku loku va lava ku amukelwa “mixaxeni ya pindzukelwa”, va fanele ku ti tsitsirita. A munhu a nge zvi koti ku tirela Nungungulu, lezvo na a tirela titshomba kambe. Jesu i no gemeta hi magezu lawa: “A ku na nandza gi zvi kotako ku tirela tihosi timbiri; hakuva gi ta venga yin’we, gi randza yin’wani; kutani gi ta namarela ka yin’we, gi kanyisa yin’wani. N’wina a mu [nge] zvi koti ku tirela Nungungulu” ni Titshomba. — Luka 16:9, 13.