Jesu i wa ha hi ku byela vanhu le Pereya lezvaku a kutala ka ‘lava va kuranga, va tava vo gumesa, ni lava vo gumesa va tava va kuranga.’ (Matewu 19:30) I no guma a khanyisa mhaka leyi hi mufananiso wa zvitiri zva lomu ka simu ga mauvha.

I te: “A Mufumo wa matilo wu fana ni n’winyi wa simu loyi a nga huma ni mixo a ya thola vatiri kasi va ya tira sin’wini gakwe ga mauvha. Loku a vhumelelene ni vatiri lezvaku i ta va holisa dhenariyu hi siku, i no va rumela sin’wini gakwe. Laha a nga huma kambe hi hora ya wu 3, i no wona van’wani va nga yimile merkadho na va nga tiri nchumu, aku ka vona: ‘N’winawu fambani sin’wini ga mina. Ndzi ta mu holisa leyi yi ringanako, ndzi nga ta mu kalavela.’ Hikwalaho va no famba. I no huma kambe hi hora ya wu 6, ni hora ya wu 9 a ya maha zvalezvo. Hi kugumesa, i no huma hi hora ya wu 11 a ya kuma van’wani na va yimile aku ka vona: ‘Hikuyini mu yimileko laha siku gontlhe na mu nga mahi nchumu?’ Vaku: ‘Hakuva i hava a nga hi thola.’ Aku kabye: ‘N’winawu fambani sin’wini ga mina ga mauvha.’” — Matewu 20:1-7, NM.

Laha a vanhu va ngazwa Jesu na a kumbuka “Mufumo wa tilo” ni ‘n’winyi wa muti,’ kuzvilava va alakanyile Jehovha Nungungulu. A Bhibhiliya gi wulawula hi Jehovha kota n’winyi wa simu ga mauvha — gi yimelako tiko ga Izrayeli. (Lisimu 80:8, 9; Isaya 5:3, 4) Lava va nga hi ka civhumelwano ca Nayo va wa fananiswa ni zvitiri zva lomu ka simu ga mauvha. Hambulezvo, Jesu i wa nga wulawuli hi vaIzrayeli va cikhatini ca kaleloko. I wa wulawula hi ciyimo ci nga hi kona ka cikhati ceco.

A varangeli va wukhongeli, vo kota vaFarisi lava va nga ha hi ku ringa Jesu xungetano hi kutlhatlha wukati, va wa fana ni vanhu va tirako yi nga chayi ntirweni wa Nungungulu, a ku khwatsi zvitiri zvi tirako siku gontlhe zvi nga hi ni fanelo yo hola mali yo enela, leyi yi nga hi dhenariyu hi siku.

A vapristi ni varangeli van’wani va wukhongeli, va wa wona vanhu laha va yileko na va nga mu tireli hi kumbhelela Nungungulu, a ku fana ni vanhu va nga tiriko cikhati contlhe lomu sin’wini gakwe ga mauvha. Ka mufananiso wa Jesu, lavo hi lava va nga tholiwa hi hora ya wu 3 (ku nga ma 9) — kutani lava va nga tholiwa na gi cile makunu hi hora ya wu 6, ni ya wu 9, ni lava vo gumesa va hora ya wu 11 (ku nga ma 17).

Lava va nga fambafamba na Jesu va wa woniwa kota vanhu va ‘rukatelweko.’ (Johani 7:49) Wutomini gabye, va wa mbhetile cikhati co leha na va tira ku phasa tinjhanjhi ni ku rima masiku. Makunu, kumbheleni ka lembe ga 29 Nguveni ya Hina, “a n’winyi” wa simu ga mauvha i no ruma Jesu lezvaku a ya vitana vanhu lavo vo kala nduma kasi va ya tirela Nungungulu kota vapizani va Kristu. Lavo hi vona “vo gumesa” lava Jesu a ngaku va vitanilwe ku ya tira lomu sin’wini ga mauvha hi hora ya wu 11 (ku nga ma 17).

Loku Jesu a kari a gumesa mufananiso wakwe, i no hlawutela lezvi zvi nga maheka a cikhati va nga mbheta ku tira, aku: “Loku gi pelile, a n’winyi wa simu i no byela a muwoneleli wa vatiri aku: ‘Vitana vatiri u ta va holisa mali yabye. Sangula hi lava vo gumesa kala ka vo sangula.’ A cikhati leci va nga chikela lava va ngata hi hora ya wu 11, a mun’we ni mun’wani wabye i no hola a dhenariyu. Hikwalaho, a cikhati leci lava vo sangula va nga chikela va no alakanya lezvaku va ta holisiwa yo tala. Kanilezvi vonawu va no holisiwa dhenariyu. Loku va amukele va no sangula ku khala ka n’winyi wa simu, vaku: ‘Vainalava vo gumesa va tirile hora yin’we basi, hambulezvo u va holisile mali yo fana ni leyi ya hina hi nga koroka siku gontlhe laha mun’wini!’ Kanilezvi, i no byela mun’we wabye aku: ‘Munghana, a ndzi ku kalaveli. Hi bhulile hi dhenariyu, a hi zvona ke? Teka zva wena u famba. Ndzi lava ku nyika loyi wo gumesa a muholo wo fana ni lowu ndzi nga ku nyika. A ndzi na fanelo ya ku maha lezvi ndzi zvi lavako hi zvilo zva mina ke? A tihlo ga wena a gova ni matshoho hi lezvi ndzi nga mu nene ke? Hizvalezvo, a vo sangula va ta maha vo gumesa ni vo gumesa va maha vo sangula.” — Matewu 20:8-16, NM.

 Loku a vapizani va Jesu va zwile lezvi a nga gumesisa zvona a mufananiso wakwe, kuzvilava va karatekile. Zvi wa ta mahisa kuyini a ku a varangeli va wukhongeli ga ciJudha vava “vo gumesa”, kasi lezvo va wa ti wona na va hi “vo sangula”? Kona a vapizani va Jesu va wa ta mahisa kuyini “vo sangula”?

A vapizani va Jesu, lava a vaFarisi va nga va wona na va hi “vo gumesa”, va wa tava “vo sangula” a ku nyikiwa muholo wo enela. Laha Jesu a ngafa, Nungungulu i no vhaleta vaIzrayeli va mabeleko hi tiko gin’wani — ku nga ‘Izrayeli wa Nungungulu.’ (Va Le Galatiya 6:16; Matewu 23:38) Johani Mubhabhatisi i wa wula valavo va nga wa ta wumba ‘Izrayeli wa Nungungulu’ a cikhati leci a nga wulawula hi lava nga wa ta bhabhatiswa hi moya. A vanhu lavo va nga hi “vo gumesa”, va wa tava vo sangula ku bhabhatiswa hi moya va tlhela va nyikwa thomo ga kuva vakustumunyu va Jesu “kala le magemeta-musi ya misava.” (Mitiro 1:5, 8; Matewu 3:11) Laha a vapizani va Jesu va nga zvi zwisisa lezvaku ku wa tava ni kucica ka hombe, zva koteka ku va zvi wonile lezvaku va wa ta nyenyiwa ni nkondzo hi varangeli va wukhongeli, lava “vo gumesa.”