Laha Jesu a nga hi ka gin’we ga matshamu lawa— le Samariya kutani le Galileya, a vaFarisi va no mu wutisa lezvi a Mufumo wa Nungungulu wu to chikelisa zvona, hi lezvi va nga pimisa lezvaku wu ta chikela hi ndlela yo hlamalisa ni wudzundzo ga hombe nguvhu. Makunu Jesu i no va hlamula aku: “A Mufumo wa Nungungulu a wu woneki a kuteni ka wona. Cima va nga ta wula, vaku: . . . Hi lowu! kutani: Hi lowuya! Hakuva a Mufumo wa Nungungulu wu kona cikari ka n’wina.” — Luka 17:20, 21.

Kuzvilava a vokari va pimisile ku Jesu i wa wula ku a Mufumo wu wa kari wu fuma timbilwini ta malandza ya Nungungulu. Lezvo a zvi nge koteki, hakuva a Mufumo wu wa nga hi timbilwini ta vaFarisi lava Jesu a nga kari a wulawula navo. Kanilezvi Jesu i te wu kona cikari ka n’wina, hi kota ya lezvi yena Hosi yi hlawulilweko ya Mufumo wa Nungungulu a nga hi cikari kabye. — Matewu 21:5.

A cikhati leci a vaFarisi va nga famba, ko khwatsi Jesu i salile a va tlhamusela zvin’wani a vapizani vakwe xungetano hi kuta ka Mufumo. Xungetano hi cikhati leco a nga wa tava kona kota Hosi le Mufun’weni, i no ranga hi ku va tlharihisa, aku: “Ma tata masiku laha mu ta nga xuva ku wona a gin’we ga masiku ya N’wana wa munhu, kanilezvi mu nga ta gi wona.” (Luka 17:22) Jesu i wo komba lezvaku a cikhati ca ku a sangula ku fuma ci wa hata. Kanilezvi na ci nga se chikela, a vapizani vakwe va wa taswa hi ku lava ku tiva ku ci ta chikela rini. Hambulezvo, zvi wa ta boha ku va simama ku rindzela kala cikhati leci ci nga yimisilwe hi Nungungulu kasi a N’wana wa munhu ata.

Jesu i noya mahlweni aku: “Va taku ngalo ka n’wina: . . . hi gaya! . . . hi loyi laha! Mu ngayi, hambu ni ku va landzela. Hakuva kota lezvi a kuhatima ku hatimako hi tlhelo gin’we ga tilo, ku woninga ni ka tlhelo gin’wani; i tava nghaho N’wana wa munhu hi siku gakwe.” (Luka 17:23, 24) Jesu i no byela vapizani vakwe lezvaku lezvi Mesiya a to chikelisa zvona, zvi ta fana ni lezvi a kuhatima ku wonisiwako zvona ka wutshamu go kari. Lava va cuwukako khwatsi va tlhela va chela kota, va wa ta zvi wona ku makunu i kona kota hosi le Mufun’weni wa Nungungulu. Lezvo zvi wa ta va vhikela ku va nga landziseli a vamesiya vo kala va nga hi loyi wa lisine.

Jesu i no guma a komba lezvi a vanhu va nga wa tava zvona cikhatini leco, hi ku fananisa ni zvilo zvi nga mahekile kaleloko. I te: “Kota lezvi zvi nga maheka masikwini ya Nowa, zvi tava nghaho a masikwini ya N’wana wa munhu. . . . Khwatsi hi lezvi zvi nga maheka masikwini ya Loti; va waga, vanwa, va xava, va xavisa, va rima, va aka; kanilezvi sikwini lego Loti a nga huma ha gona Sodhoma, ku lona a ndzilo ni solufa hi le tilweni, zvi va lovisa vontlhe. Zvi tava nghaho sikwini lego a N’wana wa munhu a ta nga wonekeliswa ha gona.” — Luka 17:26-30.

Jesu i wa nga wuli lezvaku masikwini ya Nowa ni ya Loti a vanhu va lovisilwe hi lezvi va nga kari va ti mahela mitiro ya siku ni siku, yo kota kuga, kunwa,  kuxava, kuxavisa, kubyala, ni kuaka. Phela Nowa na Loti ni mingango yabye vonawu va wa maha lezvo. Kanilezvi, lava va nga lovisiwa va wa maha zvilo lezvo na va nga hi na mhaka ni kurandza ka Nungungulu, ne na va nga cheli kota hi nguva va nga hanya ka yona. Jesu i wo tlharihisa vapizani vakwe kasi va chela kota hi kurandza ka Nungungulu va tlhela va ku maha hi kuhiseka. Hi ndlela leyo, i no komba lezvi a vapizani vakwe va faneleko ku maha kasi va pona a cikhati leci Nungungulu a to lovisa tiko.

Jesu i no simama aku: “Hi lego siku, loye a nga hehla ka yindlu, na zvibya zvakwe zvi hi lomo ndlwini, . . . a nga chiki a ku ya zvi teka; ni loye a nga le masin’wini, . . . a nga tlheli a wuya. Alakanyani a sati wa Loti.” (Luka 17:31, 32) A sati wa Loti i no maha ruka ga munyu. Makunu a vapizani va Jesu a va faneli ku colopetelwa hi zvilo zva tiko.

Jesu i noya mahlweni a tlhamusela vapizani vakwe lezvi a ciyimo ci nga wa ta tshamisa zvona a cikhati leci a N’wana wa munhu a nga wa ta fuma. I te: “Hi wusiku lego a [vanhu] vambiri va ta etlela sangweni gin’we: A mun’we i ta tekiwa, mun’wani a siyiwa.” (Luka 17:34) A vokari va ta ponisiwa. Kanilezvi a van’wani, va ta siyiwa — ku nga kulovisiwa.

A vapizani vakwe va no mu wutisa vaku: “Kwihi Hosi?” Jesu a va hlamula aku: “Laha ku nga kona cirumbi, kwalaho ma ta tsombana kona” a magama. (Luka 17:37) Kunene, a vokari va tava ni mahlo ya ku wona kule a ku khwatsi magama. A vapizani lavo, va taya tshombana ka Mesiya wa citereti, a N’wana wa munhu. Ka cikhati ci nga hata, Jesu i wa ta va gondzisa lisine li nyikako wutomi a vapizani vakwe va nga ni kukholwa.