CIPIMO 136
Va wona Jesu le mbhirini ya Bimbi ga Galileya
-
JESU A HUMELELA LE BIMBINI GA GALILEYA
-
JESU AKU PEDRO NI LAVA VAN’WANI VA FANELE KU GISA TIYIVHU TAKWE
Ka wusiku go gumesa legi Jesu a nga tshama ni vapostoli vakwe, i wa va byelile lezvi: “Loku ndzi vhukile hi ka vafileko ndzi ta mu rangela a kuya Galileya.” (Matewu 26:32; 28:7, 10) A kutala ka vapizani vakwe va noya Galileya futsi. Va wa yela yini kwaseyo?
Ka cikhati co kari, Pedro i no byela vapostoli van’wani va 6 aku: “Ndza haya kukukuteni.” Vontlhe va 6 vaku: “Na hina kambe hi ta famba na wena.” (Johani 21:3) Va no kukuta wusiku gontlhe va nga kumi nchumu. Laha gi nga sangula kuca makunu, Jesu i no humelela laha mbhirini ya bimbi. Kanilezvi va wa nga mu tivi. Jesu i no tlakusa gezu a va vitana, aku: “Vana vanga, mu na ni zvakuga ke?” Va hlamula vaku: “Ahihi.” Jesu aku: Hoxelani “a likoka hi tlhelo ga cinene ga ngalava, mu ta zvi kuma.” (Johani 21:5, 6) Va no phasa tinjhanjhi to tala nguvhu laha ka ku va nga ha zvi koti ni ku humesa likoka.
Johani i no byela Pedro aku: “Hi Hosi.” (Johani 21:7) Pedro i no tekela ku phamba nguwo yakwe ya lahandle, leyi a nga tlhatlhile a cikhati a nga kukuta. I no tlula a nghena lomu matini a hlambela cipimo ca 90 wa timetro aya lehandle. Lava va nga hi lomu ngalaveni va no mu landza hi kutsongwani-kutsongwani, na va koka likoka li nga tele hi tinjhanjhi.
A cikhati va nga chikela mbhirini ya bimbi, va no wona “ndzilo wa makhala laho.” Jesu aku: “Nehani zvidluwani ka lezvi ma ha ku zvi kukutako”. Pedro i no koka likoka, leli li nga hi ni 153 wa tinjhanjhi ta hombe! Jesu aku: “Ngonani mu ta fihlula.” Ne mun’we wabye a nga tiyangi ku mu wutisa ku: “Hi wena mani?” Hakuva va wa zvi wona ku hi Jesu. (Johani 21:10-12) Lego give khati ga wunharu a nga woneka ka vapizani vakwe na va hi ntlawa.
Mun’we ni mun’we i no mu nyika pawa ni njhanjhi aga. I no guma a wutisa Pedro, kuzvilava na a cuwuka tinjhanjhi leti ti nga hi lomu ka likoka, aku: “Simoni, n’wana Johani, wa ndzi randza ku hundza lava ke?” Kuzvilava Pedro i wo wu randza nguvhu a ntiro wa ku kukuta ku hundza lowu Jesu a nga mu nyikile. Pedro i no hlamula, aku: ‘Ina, Hosi; wa zvi tiva ku ndza ku randza.’ Makunu Jesu a se mu kuca aku: “Gisa tiyivhana ta mina.” — Johani 21:15.
Jesu i no phinda aku: “Simoni, n’wana Johani, wa ndzi randza ke?” Pedro i no karateka, a mu byela hi mbilu yontlhe aku: ‘Ina, Hosi; wa zvi tiva ku ndza ku randza.’ Jesu a se tlhela a wula zva ku lava ku fana, aku: “Gisa tiyivhu ta mina.” — Johani 21:16.
Jesu i no mu wutisa hi khati ga wunharu, aku: “Simoni, n’wana Johani, wa ndzi randza ke?” Ka khati legi kuzvilava Pedro i wa karateka a ti wutisa ku Jesu o kanakana ku wa tsumbeka ke. I no guma a hlamula a tlhela a khanyisa, aku: ‘Hosi, wa zvi tiva zvontlhe; wa zvi tiva lezvaku ndza ku randza.’ Ka khati legi kambe Jesu i no khanyisa lezvi Pedro a nga fanele ku maha, aku: “Gisa tiyivhu ta mina.” (Johani 21:17) Kunene, lava va rangelako lomu bandleni va fanele ku tirela lava va kokiwako vata ntlhambini wa Nungungulu.
Jesu i delwe hi ku maha ntiro lowu Nungungulu a nga mu rumile ku ta maha. Makunu i no guma a komba ku Pedro yenawu i wa ta kumana ni zvo fana ni lezvo. I te: “Na wa ha hi mufana, u wa boha hi wece uya ni kwihi u ku lavako. Kanilezvi, a cikhati u to khosahala, u ta tshambuluta mandla ya wena u bohisiwa hi mun’wani, a ku yisa laha u nga ku laviko.” Hambulezvo, i no kuca Pedro aku: “Simama ku ndzi landzela.” — Johani 21:18, 19, NM.
Pedro i no wona Johani aku: ‘Hosi, inaloyi i ta maha yini?’ Hi zvona futsi, zvini zvi nga wa ta humelela a mupostoli loyi Jesu a nga mu randza nguvhu? Jesu i no hlamula aku: “Loku ndzi randza lezvaku a tshame ndzi kala ndzi wuya,” u lava ku zvi tiva u zvi maha yini? (Johani 21:21-23) Pedro i wa fanele ku landzela Jesu na a nga karateki hi lezvi a van’wani va mahako. Hambulezvo, Jesu i wo komba lezvaku Johani i wa ta hanya ku hundza vapostoli lava van’wani niku i wa ta wona muwoniso wa Jesu na ata kota Hosi Mufun’weni.
Kunene, Jesu i mahile zvilo zvin’wani zvo tala zvaku a ku na bhuku zvi nga wa ta enela ka gona.