Loku ku hundzile 10 wa masiku Jesu na a yile tilweni, i no chulula moya wa ku basa ka vapizani vakwe hi Pentekosta. Leco cive cikombiso caku i le tilweni futsi, ni ca lezvi zvi nga hata. Mupizani Stefani na a nga se gandliwa hi maribye hi lezvi a nga nyika wukustumunyu hi kutsumbeka, i no wula lezvi: “Ndzi wona tilo na gi vhululekile, ni N’wana wa munhu na a yimile hi le canjeni ga cinene ga Nungungulu.” — Mitiro 7:56.

Dhavhidha i pimiselwe ku tsala lezvi: “Jehovha i te ngalo ka hosi ya mina [Jesu]: Tshama hi le reveni ga mina ga cinene, kala ndzi veka a valala va wena a kuva cikhegetelo ca mikondzo ya wena.” Lezvo zvi komba ku Jesu i wa ta tshama kwale tilweni ni Papayi wakwe, na a rindzela ku rumiwa ku maha lezvi zvi phrofetilweko lomu ka Mhaka ya Nungungulu. Laha makunu a cikhati ca ku rindzela ci nga wa ta mbhela, i wa ta ‘fuma cikari ka valala vakwe.’ (Lisimu 110:1, 2) Hambulezvo, Jesu i wa ta maha yini hi kwale tilweni na a ha rindzela cikhati leci a nga wa ta hlula valala vakwe?

Hi Pentekosta wa 33 Nguveni ya Hina, ku no vhululiwa bandla ga wuKristu. Jesu i no sangula ku fumela vapizani vakwe va totilweko hi moya na a hi kwale tilweni. (Va Le Kolosi 1:13) I no va rangela laha va nga kari va chumayela a tlhela a va longisela ka ntiro lowu wu nga hata. I ntiro muni walowo? Lava va nga wa ta tsumbeka kala vafa, va wa ta guma va vhuxiwa va ya tira naye kota tihosi le Mufun’weni.

A mun’we wa mupizani wo hlamalisa a nga wa tava hosi hi Sawule, a tiviwako nguvhu hi vito gakwe ga ciRoma ga ku hi Pawule. I wa hi muJudha a nga kombisile ku hisekela Nayo wa Nungungulu hi cikhati co leha, kanilezvi i wa pengisilwe hi varangeli va wukhongeli ga ciJudha laha ka kuza a seketela ku Stefani a gandliwa hi maribye. Sawule i no guma a suka kuya Dhamasku na a ‘kukutela ku dzukisa ni ku daya a vapizani’ va Jesu. I wa chusilwe hi Kayafasi, a Mupristi wa Hombe, lezvaku a ya khoma vapizani va Jesu a tlhela navo Jerusalema. (Mitiro 7:58; 9:1) Hambulezvo, laha Sawule a nga hi ndleleni, i no woningiwa hi kuwoneka ka hombe nguvhu awa lahasi.

Ku no zwala gezu hi le tilweni, giku: “Sawule, Sawule, hi yini u ndzi xanisako ke?” Sawule aku: “Hi wena mani Hosi?” A hlamuliwa lezvi: “Hi mina Jesu loyi u mu xanisako.” — Mitiro 9:4, 5.

 Jesu i no byela Sawule lezvaku a nghena lomu Dhamasku a rindzela zvileletelo zvin’wani. Hambulezvo, zvi lavile ku a ya hi ku khometelwa hakuva i wa file mahlo hi kuwonekela a nga ku wona hi cihlamaliso. Jesu i no woneka ka munhu mun’wani. I no woneka ka mupizani wakwe wa ku hi Ananiyasi a nga hanya lomu Dhamasku. Jesu i no mu leletela wutshamu go kari kasi a ya kuma Sawule. Ananiyasi i wa nga tlhatlheki ku famba. Kanilezvi, Jesu i no mu tiyisekisa aku: “Famba, hakuva loyi hi cibya ci hlawulilweko ca mina, a ku yisa a vito ga mina ka vamatiko ni ka tihosi, ni ka vanana va ka Izrayeli.” Sawule i no tlhela a wona, a tekela ku sangula kwalomuya Dhamasku aba “hungu hi Jesu . . . lezvaku i N’wana wa Nungungulu.” — Mitiro 9:15, 20.

Jesu i no vhuna Pawule ni vapizani van’wani lezvaku va maha ntiro lowu yena a nga wu sangulile, wa ku chumayela. Nungungulu i no va katekisa va maha zvilo zva hombe nguvhu. Andzhako ka 25 wa malembe Jesu na a wonekile ka Pawule na aya Dhamasku, Pawule i no tsala lezvaku a mahungu yo saseka ma wa chumayelwe “ka zvivangwa zvontlhe lahasi ka tilo”. — Va Le Kolosi 1:23.

Loku ku hundzile malembe yo kari, Johani, a mupostoli wa Jesu wo randzeka, i nova ni miwoniso yo landzelana hi ku vhuniwa hi Jesu, yi tsalilweko lomu ka Bhibhiliya, ka bhuku ga Kuvhululelwa. Hi lisine, Johani i hanyile kuza a wona kuwuya ka Jesu kota Hosi Mufun’weni hi miwoniso leyo. (Johani 21:22) Johani i te: “Ndzi wa hi le moyeni hi siku ga Hosi”. (Kuvhululelwa 1:10) Zvi mahekile lembe muni zvezvo?

A zviphrofeto zva Bhibhiliya zvi komba lezvaku a “siku ga Hosi” gi sangulile hi 1914. Ka lembe lego, ku vhukile Yimpi yo Sangula ya Misava Yontlhe. Niku ka malembe ma nga landzela kuve ni tiyimpi to tala, mababyi, tindlala, kutsekatseka ka misava, ni zvilo zvin’wani zvi mahekako ka matshamu yo tsalangana zvi tatisako “ciwoniso” leci Jesu a nga nyika vapostoli vakwe xungetano hi “kuwuya” kutani kuva kona kakwe ni “kugumesa” ka tiko. (Matewu 24:3, 7, 8, 14) Zvezvi a mahungu yo saseka ma chumayelwa misaveni yontlhe, a ma ha chumayelwi lomu ku nga fumelwa hi vaRoma basi.

Johani i pimiselwe ku tlhamusela lezvaku zvontlhe lezvo zvi komba yini. I te: “Makunu ku chikele a kuhanyiswa, ni ntamu, ni Mufumo wa Nungungulu wa hina, ni ntamu wa Kristu wakwe”. (Kuvhululelwa 12:10) Ina, zvi komba ku a Mufumo wa Nungungulu, lowu Jesu a nga chumayela nguvhu hi wona, wu yimisilwe le tilweni!

Lawo mahungu ya ma nene nguvhu ka vapizani va Jesu vo tsumbeka. Va nga tsaka hi lezvi Johani a nga zvi wula, aku: “Hikwalaho, tsakani n’wina matilo, na n’wina lava mu tshamako ka wona. Kanilezvi n’wina misava ni bimbi mu na ni khombo, hakuva Sathani i relele ka n’wina, na a zangarile nguvhu, hakuva wa zvi tiva lezvaku a cikhati leci ci mu saleleko ci tsongwanyani.” — Kuvhululelwa 12:12.

Kunene, Jesu a nga ha tshamangi reveni ga cinene ga Papayi wakwe a rindzela. Zvezvi i Hosi, o fuma kambe, niku na ku nga hi kale i ta swiyela valala vakwe va ku bhi. (Mahebheru 10:12, 13) Ka cipimo ci landzelako, hi ta wona zvilo zva zvi nene lezvi hi zvi rindzelako cikhatini ci tako.