Ka siku gi nga landzela, hi 9 ka Nisani, Jesu ni vapizani vakwe va no suka le Bhetaniya va kongoma Jerusalema. Laha va nga hi kusuhani ni Bhetfage, le Citsungeni ca maOlivha, Jesu i no ruma vapizani vambiri.

Aku: “Fambani cimutaneni ci nga mahlweni ka n’wina, mu ta ya kuma a mbongola na yi . . . [bohilwe] na yi hi ni cimbongolana; ti tlhatlheni muta nato ka mina. Loku munhu a wula nchumu ka n’wina, mu taku: A Hosi ya ti lava; i ta ti rumela zvalezvi.” — Matewu 21:2, 3.

A vapizani lavo a va tekelangi ku zvi zwisisa ku lezvi Jesu a nga wula zvi wa sina zvi phrofetilwe. Kanilezvi hi kufamba ka cikhati, va wa ta wona ciphrofeto leco ca Zakariya na ci tatiseka. Zakariya i wa phrofetile lezvaku a Hosi leyi Nungungulu a nga tsumbisile yi wa ta nghena Jerusalema hi kutikoramisa na yi ‘khilele mbongola, a role ga pswele ga mbongola.’ — Zakariya 9:9.

Laha a vapizani va Jesu va nga chikela Bhetfage va tlhatlha cimbongolana ni mamani wa cona, lava va nga hi laha kusuhani va no va wutisa vaku: “Mu ci tlhatlhela yini a cimbongolana ke?” (Marku 11:5) Laha a vanhu lavo va ngazwa lezvaku va wa ci tlhatlhela ku famba naco ka Hosi, va no va tsika va ci tlhatlha va wuya naco ka Jesu. A vapizani vakwe va no ta tlhateka tinguwo tabye laha ka cimbongolana ni mamani wa cona, kanilezvi Jesu i no khilela cimbongolana.

Jesu i no famba hi cimbongolana a kongoma le Jerusalema, zvonake a vanhu va sangula ku talelana. A votala va no andlala tinguwo tabye laha ruweni. A van’wani va no tshova madhavi ya tisinya lomu “mafusini” va veketela laha ruweni. Va no bangulekelana vaku: “A . . . [dzundziwe] yena loyi a tako vitweni ga Hosi! A wu . . . [dzundziwe] Mufumo lowu wu tako wa . . . [papayi] wa hina Dhavhidha.” (Marku 11:8-10) A vaFarisi lava va nga hi kona laho, va no zangara hi kuzwa lezvi vanhu va nga wula. Va no byela Jesu vaku: “Mugondzisi, kawuka a vapizani va wena.” Kanilezvi Jesu i no va hlamula, aku: “Loku va miyela lava, a maribye ma ta” banguleka wona. — Luka 19:39, 40.

Laha Jesu a nga wona dhoropa ga Jerusalema i no gi rilela aku: Mayiwako “loku wena u wa zvi tivile nyamutlha lezvi zvi vangako kurula! Kanilezvi makunu zvi fihlilwe ka wena”! A vanhu va lomu Jerusalema va wa ta tshovela ku bava hi lezvi va nga tsika ku ingisa ha womu. Jesu i no phrofeta aku: ‘A valala va wena va ta ku bhiyela, va ku randzela, va ku vhalela matlhelweni wontlhe. Va ta ku hahlula uku . . . [bhi], zvin’we ni vana va wena lava va nga cikari ka wena; ku nga ta siyiwa cikari ka wena a ribye gin’we hehla ka gin’wani’. (Luka 19:42-44) Lezvi Jesu a nga wula zvi tatisekile futsi. A dhoropa ga Jerusalema gi lovisilwe hi 70 Nguveni ya Hina.

A cikhati leci Jesu a nga nghena lomu Jerusalema, a vanhu vontlhe va dhoropa va no banguleka vaku: “Himani loyi ke?” Va simama ku banguleka vaku: “Loyi hi Jesu, a muphrofeti wa le Nazareta wa Galileya.” (Matewu 21:10, 11) Lava va nga wonile Jesu na a vhuxa Lazaru hi cihlamaliso va hlawutele van’wani. A vaFarisi va no karateka hi ku wona lezvaku va nga ta lunga, lezvi va nga zvi lava zvi wa nga ta maheka. Va byelana vaku: “A tiko gontlhe ga mu landzisela.” — Johani 12:18, 19.

Jesu i noya tempeleni a ya gondzisa, kota lezvi a nga tolovela ku maha loku aya Jerusalema. Na a hi lomu tempeleni, i no hanyisa zvikhumu ni zvilima. A vapristi va hombe ni vatsali va no zangara hi ku wona lezvi Jesu a nga kari a maha, ni lezvi va ngazwa zvivanana na zvi banguleka zviku: “Hozana ka N’wana Dhavhidha”. A varangeli lavo va wukhongeli va no wutisa Jesu vaku: “Wa zvizwa lezvi va zvi wulako ke?” Jesu a hlamula aku: “Ina, cima a mu gondzangi a gezu legi gi nge ngalo: Hi milomu ya zvihlangana ni tisana u ti longisele kudzunziwa?” — Matewu 21:15, 16.

Jesu i no cuwuka lomu matlhelweni, a wona lezvi zvi nga kari zvi maheka lomu tempeleni. Ni gambo ga kona, na ku nga se chikela 10 ka Nisani, Jesu i no tlhela Bhetaniya ni vapostoli vakwe, va ya tshama wusiku gontlhe ga Soto.