Loku Jesu a vhuxilwe hi ka vafileko, i no tlhangana ni vapostoli vakwe va 11 ka citsunga co kari le Galileya. Kwalaho, ku wa hi ni vapizani van’wani kambe. Va wa hi cipimo ca 500 wa vona. Kanilezvi a van’wani va wa kanakana ku i vhukile. (Matewu 28:17; 1 Va Le Korinte 15:6) Hambulezvo, lezvi Jesu nga wula ka khati lego, zvi va vhunile ku kholwa lezvaku hakunene i vhukile.

I no tlhamusela lezvaku Nungungulu i mu nyikile ntamu wontlhe, le tilweni ni laha misaveni, a guma a va kuca aku: “Hikwalaho fambani, mu va maha vapizani a matiko wontlhe, mu va bhapatiza hi vito ga . . . [Papayi] ni ga N’wana ni ga moya wa ku basa; mu va gondzisa a ku gonga zvontlhe lezvi ndzi mu layileko zvona.” (Matewu 28:18-20) Kunene, Jesu i wa vhukile niku i wa lava lezvaku a mahungu yo saseka ma chumayelwa.

Vontlhe lava va landzelako Jesu — vavanuna, ni vavasati, ni vanana — va nyikilwe ntiro walowu wa ku maha vapizani. A valala vabye va wa ta tshuka va zama ku va nyimisa ku chumayela ni ku gondzisa. Hambulezvo, Jesu i no va tiyisekisa aku: “Wu nyikilwe ka mina a ntamu wontlhe a tilweni ni laha misaveni”. Zvi wa wula yini lezvo ka vapizani vakwe? I te: “Ndzi na n’wina a masiku wontlhe, na kona kugumelweni ka cikhati.” Jesu a nga wulangi lezvaku vontlhe lava va chumayelako mahungu yo saseka va wa ta maha zvihlamaliso. Hambulezvo, va wa ta vhuniwa hi moya wa ku basa.

Loku Jesu a vhukile, i no woneka makhati yo tala ka vapizani vakwe hi “cipimo ca 40 wa masiku”. Hambu lezvi va nga ranga hi ku mu kohlwa, i no va “kombisa hi wukustumunyu ginyingi, lezvaku wa hanya”, a va gondzisa zvilo zva “Mufumo wa Nungungulu.” — Mitiro 1:3; 1 Va Le Korinte 15:7.

Jesu i no guma a byela vapostoli vakwe lezvaku va tlhela le Jerusalema; ko khwatsi i va byelile na va ha hi kwale Galileya. Loku va tlhelile, i no va kuma kambe na va tlhangene kwalomu dhoropeni, aku: ‘Mu nga suki Jerusalema, kanilezvi rindzelani a citsumbiso ca . . . [Papayi], leci ndzi mu byelileko ha cona; hakuva Johani, yena i no bhapatiza hi mati, kanilezvi n’wina mu ta bhapatizwa hi moya wa ku basa andzhako ka masiku ma tsongwani.’ — Mitiro 1:4, 5.

Jesu i no tlhangana ni vapostoli vakwe kambe hi ndzhako ka cikhati. I no va yisa lahandle ka dhoropa, ‘kala va chikela Bhetaniya’, ku nga hi ndzelelweni wa Citsunga ca maOlivha hi tlhelo ga Mutsuwuka-gambo. (Luka 24:50) Hambu lezvi Jesu a nga va byelile zvilo zvo tala xungetano hi ku aya tilweni, va wa ha kholwa lezvaku a Mufumo wakwe wu wa tava kwalaha misaveni hi ndlela yo kari. — Luka 22:16, 18, 30; Johani 14:2, 3.

Va no mu wutisa vaku: “Hosi, u ta tlhelisela a Mufumo ka Izrayeli hi leci cikhati ke?” I na se va byela lezvi: “A zvi nyikwangi ka n’wina ku tiva a zvikhati ni tinguva, lezvi . . . [Papayi] a zvi yimisileko hi ntamu wakwe.” I no tlhela a va khanyisela a ntiro lowu va nga fanele ku maha, aku: “Mu ta nyikiwa a ntamu, loku wu tile hehla ka n’wina a moya wa ku basa; zvonake mu ta maha vakustumunyu va mina laha Jerusalema, ni le Judhiya gontlhe, ni le Samariya, ku kala le magemeta-musi ya misava.” — Mitiro 1:6-8.

Loku Jesu a vhukile, i ambele mimiri yo hambanahambana ya nyama ni nkhata. Kanilezvi, laha a nga hi Citsungeni ca maOlivha ni vapostoli vakwe, i no tsika miri lowu a nga hi nawo ka khati lego, a sangula kuya tilweni. Zvalezvo i no fihletelwa hi refu va nga ha mu woni. I no famba hi miri wun’wani wa moya makunu. (1 Va Le Korinte 15:44, 50; 1 Pedro 3:18) Laha a vapostoli vakwe vo tsumbeka va nga ha nyimile va ku rwada va mu cuwukisela, ku no humelela ‘vavanuna vambiri na va ambele tinguwo to basa’ va yima tlhelweni gabye. Ti wa hi tingilozi ti nga ambele mimiri ya nyama. Ti no va wutisa lezvi: “Vavanuna va le Galileya, hi yini mu yimileko mu cuwuka tilweni ke? Jesu loyi a susilweko ka n’wina aya tilweni, ita wuya kota lezvi mu mu wonileko na aya tilweni.” — Mitiro 1:10, 11.

Jesu i yile tilweni na a woniwa hi vapostoli vakwe vo tsumbeka basi. A cikhati a nga wa ta wuya ku ta fuma Mufun’weni, i wa ta ‘wuya kota lezvi va mu wonisileko’  zvona — zvi wulako ku zvi wa ta poliwa hi vapizani vakwe vo tsumbeka basi.

A vapostoli va no tlhela Jerusalema. Ka masiku ma nga landzela, va no tlhangana ni vapizani van’wani, a ku patsa na Mariya mamani wa Jesu, ni vamakabye vakwe. (Mitiro 1:14) Va no tlhangana va khongela yi nga chayi. A cin’we ca lezvi va nga khongela hi zvona ku wa hi ku hlawula mupizani wa ku vhaleta Judhasi Iskariyoti, kasi a vapostoli va tlhela vava 12 kambe. (Matewu 19:28) Va wa lava mupizani a nga wona ntiro wa Jesu a tlhela ava mboni ya ku i vhukile. Va no hlahluva tihlolo kasi va hlawula. Lego i khati go gumesa legi a Bhibhiliya gi wulawulako hi vanhu va nga hlahluva kasi ku tiva kurandza ka Nungungulu. (Lisimu 109:8; Mavingu 16:33) Va no hlawula Matiyasi; kuzvilava ive mun’we wa lava va 70 va nga rumilwe hi Jesu va ya chumayela. Matiyasi i no guma a ‘hlayiwa zvin’we ni vapostoli va khume ni mun’we.’ — Mitiro 1:26.

Andzhako ka 10 wa masiku Jesu na a yile tilweni, a vaJudha va no maha Mubuzo wabye — a Pentekosta wa 33 Nguveni ya Hina. Le Jerusalema ku wa tlhangene cipimo ca 120 wa vapizani va Jesu lomu ka sala yo kari le hehla. Hi citshuketi, ku no zwala kuvhumavhuma ko fana ni moya wa hombe lomu ka yindlu leyi va nga tshamile ka yona. Ku no woneka tirimi to fana ni ndzilo, lin’we hehla ka mun’we ni mun’wani. Vontlhe va no sangula ku wulawula tirimi to hambanahambana. Lowo wu wa hi moya wa ku basa wu nga chululilwe, lowu Jesu a nga tsumbisile! — Johani 14:26.