Laha Jesu a nga maha cihlamaliso kuga vanhu vo tala va xura, va no hlamala nguvhu, zvonake vaku: ‘Hakunene loyi Muphrofeti loyi a nga wa tata lomu tikweni.’ Lezvo va wa wula Mesiya. Va no gumesa va mu navela ku a va fumela. (Johani 6:14; Dhewuteronome 18:18) Hikwalaho, va no maha makungo ya ku mu yimisa kota hosi yabye.

Jesu i no zvi tiva lezvi va nga lava ku maha, a se chusa vanhu lezvaku va famba, a guma a byela vapizani vakwe a ku va ya nghena lomu ngalaveni. Va waya kwihi? Va wa fanele kuya Bhetsaidha va gumesa vaya Kapernawume. Kanilezvi Jesu i noya citsungeni yece kasi a ya khongela ni wusiku.

Laha gi ngaya kuceni, a n’weti na wu ku pa, Jesu i no wona ngalava hi le kule. A mavingo ma wa hi ya hombe hi lezvi ku nga hi ni moya wa hombe. A vapostoli va wo ‘karateka hi ku bondza makasiya, hakuva a moya wu waya ka tlhelo go hambana’. (Marku 6:48) Jesu i no relela hi le citsungeni a ta nghena lomu bimbini a famba hi le hehla ka mati, a va yela. Ka cikhati leco, va wa fambile cipimo ca “mune kutani ntlhanu wa tikilometro”. (Johani 6:19) A vapizani vakwe va no mu wona na a ku khwatsi o va hundza, va se banguleka hi ku chava, vaku: “Cigono”! — Marku 6:49.

Jesu i no va chavelela aku: “Tiyani hlana, hi mina; mu nga chavi.” Kanilezvi, Pedro i no byela Jesu aku: “Hosi, loku . . . [ku] hi wena, ndzi vitane ndzita ka wena hehla ka mati.” Jesu aku: “Tana.” Pedro i no tekela ku huma lomu ngalaveni a famba hi le hehla ka mati futsi aya ka Jesu. Kanilezvi, laha a nga cuwuka moya, i no chava, a sangula ku rikha, zvonake a keta aku: “Hosi, ndzi ponise.” Jesu i no nawuluta woko a khoma Pedro aku: “Wena wa kukholwa ku tsongwani, hi yini u kanakanako ke?” — Matewu 14:27-31.

Pedro na Jesu va no guma va nghena lomu ngalaveni, a moya wu se renga. A vapizani vakwe va no hlamala, zvonake va mu khizamela, vaku: Hakunene wena “u N’wana wa Nungungulu.” Xana va wa hi ni cigelo ca ku hlamala futsi? Loku va wa no zvi zwisisa “lezvi zvi nga maheka hi zvibaba” ka tihoranyana ti nga hundzile — ku nga cihlamaliso leci Jesu a nga ci maha, ca ku kuga vanhu vo tala va xura hi tipawa titsongwani — na zvi nga va hlamalisangi a ku wona Jesu na a famba hi le hehla ka mati a tlhela a nyimisa moya. — Marku 6:52; Matewu 14:33.

Na ku nga se hundza cikhati co leha, va no chikela le Genezareta, ku nga hi le Dzongeni wa Kapernawume. Lego gi wa hi wutshamu go saseka ni go nona khwatsi. Va no nyimisa ngalava yabye, va huma. A vanhu va no wona Jesu, va seta ni vababyi. Ni van’wani va nga hanya ka matiko ya laha kusuhani vonawu va nota ni vababyi. Jesu i no va hanyisa; hambu va henya machakafula ya nguwo yakwe basi va wo hanya.

Ndzeni ka cikhati leco, lava va nga hi kona a cikhati leci Jesu a nga maha cihlamaliso kuga vanhu vo tala va xura, va no zvi pola ku i fambile. Hikwalaho, va no nghena zvingalavana zvi ngata hi le Tibheriya, vaya Kapernawume va ya lavetela Jesu. Laha va nga ku mu kukununu, va no mu wutisa lezvi: “Rabi, [kasi] u tile rini laha?” (Johani 6:25) Jesu i no va kawuka. I wa hi ni cigelo co zwala futsi. A cigelo ca kona hi ta ci tiva ka cipimo ci landzelako.