Jesu i no mbheta cikhati co kari na a tira lomu Galileya basi, lomu a vanhu va kona va nga zvi tsakela ku hundza va lomu Judhiya. A cikhati leci a nga hi le Jerusalema a guma a hanyisa wanuna hi Sabhadho, a vaJudha va no zama “ku mu daya” kambe. — Johani 5:18; 7:1.

Ka cikhati leco, ku wa hi Setembro kutani Outubro wa 32 Nguveni ya Kristu, a Mubuzo wa Mixaxa wu wa hi kusuhani. A mubuzo lowo wu wa mahiwa hi 7 wa masiku. Ka siku ga wu 8, ku wa mahiwa mutlhangano wa kubasa. A mubuzo lowo, wu wa hi cikombiso ca ku a lembe ga cirimo gi mbhelile niku ci wa hi cikhati ca kubonga ni kutsaka.

Jakobe, na Simoni, na Josefa, na Judha — a vamakabye va Jesu va nga hambene hi papayi — va no kuca Jesu vaku: “Suka laha, uya Judhiya”. Jerusalema gi wa hi tsindza ga wukhongeli tikweni gontlhe. Ndzeni ka masiku manharu ya mubuzo wa lembe, ku wa tshama na ku tele. A vamakabye va Jesu va no mu byela cigelo ca ku aya Judhiya, vaku: “A ku na munhu a mahako nchumu kufihlaleni loku a . . . [lava ku tiviwa hi] vanhu. Lezvi u mahako mitiro ya kunghahi ti wonekelise kubaseni mahlweni ka vanhu.” — Johani 7:3, 4.

Hi lisine, a vamakabye vakwe lava va 4, “va wa nga kholwi” a ku hi yena Mesiya. A kungo gabye ku wa hi lezvaku lava va nga tlhangene laha mubuzweni va mu wona na a maha zvihlamaliso basi. Kota lezvi Jesu a nga yi tiva a mhango yi nga wa ta humelela, i no va byela lezvi: “A tiko a gi zvi koti ku mu venga; kanilezvi mina ga ndzi venga, hakuva ndza kustumunya ha gona, lezvaku a mitiro ya gona yi bihile. Yanani n’wina mubuzweni, mina a ndza hayi mubuzweni lowu; hakuva a cikhati ca mina a ci se . . . tatiseka.” — Johani 7:5-8.

A vamakabye va Jesu va no famba ni van’wani hi ntlawa. A ndzhako ka masiku yo kari, Jesu ni vapizani vakwe va no fambawu cihundleni. Va no teka le’yo tsema va huma Samariya, va tsika leyi yi nga randziwa hi votala, yi nga hundza hi laha kusuhani ni Congo wa Jordhani. Kota lezvi Jesu ni vapizani vakwe va nga wa ta lava ko humula kona le Samariya, i no ruma vanhu va ranga kasi va ya longisela. Hambu lezvi zvi nga tolovelekile ku amukela vapfhumba, a vanhu va lomu Samariya va no ala ku va amukela, hi lezvi Jesu a ngaya Jerusalema mubuzweni wa vaJudha. Jakobe na Johani va no zangara nguvhu, va wutisa Jesu vaku: “Hosi, wa zvi . . . [lava ku] hi laya ndzilo wu relela hi le tilweni, wu ta va mbhetisa ke?” (Luka 9:54) Jesu i no va kawuka hi lezvi va nga zvi alakanyela basi; zvonake va simama ni pfhumba gabye.

Laha va nga kari va famba, a wanuna wo kari a nga hi mutsali i no byela Jesu aku: “Hosi, ndzi ta ku landzela ni kwihi laha u yako kona.” Jesu aku: “A vahlati va na ni timhako, ni tinyanyani ta tilo ti na ni zvisaka; kanilezvi a N’wana wa munhu a nga nako laha a nga vekako kona hloko.” (Matewu 8:19, 20) I wo komba  a wanuna loye lezvaku loku a mu landzela i ta kumana ni zvikarato. Ko khwatsi a wanuna loye i wa hi ni matshandza nguvhu. A nga vhumelangi kuva ni hanyela lego. Makunu, a mun’we ni mun’wani wa hina a nga ha ti wutisa lezvi: ‘Ndzi ti yimisele ku ti karata kuya chikela kwihi kasi ndzi landzela Jesu ke?’

Jesu i no byela wanuna mun’wani aku: “Ndzi landzele.” A wanuna loye i no hlamula aku: “Hosi, ndzi vhumele ndzi ya lahla papayi kusangula.” Kota lezvi Jesu a nga ci tiva ciyimo ca wanuna loye, i no mu hlamula aku: “Tsika a vafileko va lahla a vafileko vabye; kanilezvi wena famba u yaba hungu hi Mufumo wa Nungungulu.” (Luka 9:59, 60) Zvi wonekisa ku a papayi wa kona i wa ha hanya. Loku i wa nofa na a ha rindzela ku a lahliwa, zva kanakanisa a ku yena n’wana wa kona na a hi lahayani a bhula na Jesu. A wanuna loye i wa nga longangi ku rangisa Mufumo wa Nungungulu wutomini gakwe.

Laha va nga kari va relela hi ruwa vaya Jerusalema, a wanuna mun’wani i no byela Jesu aku: “Ndzi ta ku landzela, Hosi; kanilezvi ndzi vhumele ndzi ranga hi ku ya salisa a va le ndlwini ka hina.” Jesu aku: “A munhu loyi a khomako cikomu . . . kurimeni, a tlhela a cuwuka lendzhako, a nga fanelwi hi Mufumo wa Nungungulu.” — Luka 9:61, 62.

Lava va lavako kuva vapizani va lisine va Jesu va fanele ku veka tihlo ntirweni wa Mufumo wa Nungungulu. Loyi a rimako hi cikomu ca zvifuyo, loku a nga veki tihlo ni kupima lomu a cikomu ci yako kona, a tilinya ti ta gombonyeka. Loku a veka cikomu a cuwuka zva lendzhako, a ntiro wu ta celwa. Ni wihi a cuwukako zva lendzhako tikweni legi ga Sathani, yenawu a nga tshuka awa ndleleni ya kuya wutomini ga pindzukelwa.