Andzhako ka loku Jesu a wulawulile hi ku a vanhu va tsetselelwa zviwonho, na a hi laha kaya ka Mufarisi wa ku hi Simoni, i no sangula pfhumba gin’wani ga ku famba a chumayela le Galileya. Ka cikhati leco, i wa hi ni malembe mambiri na a chumayela niku i wa nga ha fambafambi yece. I wa fambafamba ni vapostoli vakwe va 12 ni vavasati vo kari a nga va ‘hanyisile ka mimoya ya kubiha ni mababyi’. (Luka 8:2) A vokari va kona ku wa hi Mariya wa le Magdhala, na Suzana, na Jowana a nga hi sati wa nduna ya Hosi Herodhi Antipasi.

Laha a vanhu va nga ya va tiva lezvaku ku na na Jesu, ku nova ni mawonela yo hambanahambana xungetano hi lezvi a nga kari a zvi maha. Lezvo zvi wonekile khwatsi a cikhati leci a vanhu va ngaya ka Jesu ni wanuna a nga hi ni dhimoni, loyi a nga hi cikhumu tlhelo mbeveve. Jesu i no hlongola dhimoni lego, a wanuna loye a sangula ku wona a tlhela a wulawula. Makunu a vanhu va no hlamala nguvhu, vaku: “Xana loyi a hi yena n’wana Dhavhidha ke?” — Matewu 12:23.

Lava va nga tlhangene laha ka muti lowu Jesu a nga hi ka wona, va wa tele nguvhu laha ka kuza yena ni vapizani vakwe va nga zvi koti ni kuga zvakuga. Hambulezvo, a hi vontlhe va nga wona Jesu kota “N’wana Dhavhidha” loyi a nga tsumbisilwe. Ku wa hi ni vatsali ni vaFarisi vo kari va nga tile hi le Jerusalema — kwale ka kule nguvhu! Va wa nga teli ku ta gondzisiwa hi Jesu kutani ku ta mu vhuna. Kanilezvi, va wo byetela vanhu vaku: Jesu “i na na Bhelzebhubha,” hikwalaho i vhuniwa “hi hosana ya madhimoni.” (Marku 3:22) A cikhati leci a maxaka ya Jesu ma nga zvi tiva, va no mu yela, na va lava ku mu teka va famba naye. Hikuyini?

Hi lezvaku kala ka cikhati leco, hambu vamakabye vakwe va wa nga kholwi ku i N’wana wa Nungungulu. (Johani 7:5) Va wa zvi wonisa ku khwatsi Jesu i wa cicile. Hi mawonela yabye, loyi a nga kari a vangisa  gujeguje leyo i wa nga ha hi yena Jesu loyi va nga kulile naye le Nazareta. Kota lezvi va nga mu wonisa ku khwatsi a ta ha teki, va te: “Wa pepuka.” — Marku 3:21.

Hambulezvo, lezvi Jesu a nga kari a zvi maha zvi wa va kaneta! I wa ha hi ku hanyisa wanuna a nga hi ni dhimoni, loyi a nga gumesa a sangula ku wona ni ku wulawula. I hava a nga kaneta a cihlamaliso leco. Hikwalaho, a vatsali ni vaFarisi va no tsamba mawunwa kasi a vanhu va nga mu tsumbi Jesu. Va te: “Loyi munhu i hlongola madhimoni ntsena hi ntamu wa Bhelzebhubha, loyi a nga hosi ya madhimoni.” — Matewu 12:24.

Jesu i no tiva a mawonela ya vatsali ni vaFarisi, a se: “Ni wihi mufumo wu ti pandzako ha woce wu ti vhukela wu ta hangalaka. Ni gihi dhoropa kutani muti wu ti pandzako ha woce wu ti vhukela wu nga ta pindzuka. Hikwalaho, loku Sathani a hlongola Sathani o ti vhukela ha yece; makunu, a mufumo wakwe wu ta tiyisa kuyini ke?” — Matewu 12:25, 26, NM.

Hi ngazwa kuzwisiseka ka zvona! A vaFarisi va wa zvi tiva ku a vaJudha vo kari va wa hlongola madhimoni. (Mitiro 19:13) Hikwalaho, Jesu i no va wutisa aku: “Loku mina ndzi hlongola madhimoni hi Bhelzebhubha, ahati vapizani va n’wina ke, va ma hlongola hi mani?” Hi magezu man’wani, lezvi va nga lumbeta Jesu hi zvona, hi zvalezvi vona va nga kari va maha. Hi kulandzela, Jesu i no simama ku tlhamusela, aku: “Loku ndzi hlongola madhimoni hi ntamu wa Nungungulu, a Mufumo wa Nungungulu wu cikari ka n’wina kanilezvi a mu wu woni.” — Matewu 12:27, 28, NM.

Jesu i no tirisa mufananiso kasi ku komba lezvaku lezvi a zvi kotako ku hlongola madhimoni, ci wa hi cikombiso ca ku i na ni ntamu wa ku pala Sathani. I te: “Kona a munhu a nga dhumelisa kuyini a yindlu ya wanuna wa ntamu a phanga zvilo zvakwe na a nga rangangi hi ku mu bohelela ke? Loku a mu bohelele hi kona a to zvi kota ku phanga a yindlu yakwe. Ni wihi a nga hiko tlhelweni ga mina wa ndzi vhukela, ni loyi a nga hlengeletiko na mina wa hangalasa.” (Matewu 12:29, 30, NM) Handle ko kanakana, a vatsali ni vaFarisi va wa vhukela Jesu, lezvo zvi wa komba ku va tirisana na Sathani. Va wa hangalasa vanhu lezvaku va ngayi ka N’wana wa Nungungulu, loyi a nga maha zvilo hi ku vhuniwa hi yena.

Jesu i no tlharihisa vanhu lavo va nga tirisiwa hi Sathani lezvaku va mu vhukela, aku: “A vana va vanhu va ta tsetselelwa a zviwonho zvabye zvontlhe, ni tihlamba tontlhe leti va rukatelako ha tona; kanilezvi loyi a rukatelako a moya wa ku basa, cima a nga ta tsetselelwa, i na ni ciwonho ca pindzukelwa.” (Marku 3:28, 29) Jesu i wa hlongola madhimoni hi ku vhuniwa hi moya wa Nungungulu, kanilezvi vona va waku Jesu i vhuniwa hi Sathani. Hi nga alakanyela lezvi zvi nga wa ta humelela a vanhu lavo va nga kaneta Jesu!