Ka siku go kari Jesu a nga tirile nguvhu, i no byela vapizani vakwe ni gambo ga kona lezvaku va suka le Kapernawume va tsemakanya va ya le “tlhatuko.” — Marku 4:35.

Loku u tsemakanya Bimbi ga Galileya uya Mutsuwuka-gambo, ku wa hi ni wutshamu gi nga vitaniwa ku i Gerasa. Lego gi wa hi gin’we ga madhoropa ya Dhekapoli. Lomu ka madhoropa lawo ku wa tele hi mikhuwo ya ciGreki, hambu lezvi ku nga tshama vaJudha vo tala.

A cikhati leci Jesu a nga suka Kapernawume a vanhu va no mu wona. Ku wa hi ni tingalava tin’wani ti nga sangula ku tsemakanya bimbi. (Marku 4:36) A tiva ga Galileya gi wa hi ni 21 wa tikilometro ta kuleha ni 12 ta kuanama. Hikwalaho, le Dhekapoli ku wa nga hi kule.

Hambu lezvi Jesu a nga hi munhu wo mbhelela, i wa karele hakuva i wa mbhetile siku gontlhe na a tira. Hikwalaho a cikhati leci va nga suka, i no etlela le magumo ka ngalava, a khigela cokari.

A kutala ka vapostoli va Jesu va wa zvi tiva khwatsi ku fambisa tingalava. Kanilezvi a liendzo lelo a li va olovelangi. Lomu matlhelweni ka tiva ku ni zvitsunga, niku le hehla ka mati ku tshama na ku kufumela. Ka zvikhati zvo kari, ku wata moya wo titimela hi lomu zvitsungeni wu ta kumana ni moya wa ku kufumela wa le hehla ka mati. Hi kota ya lezvo, lomu tiveni lego ku wa tolovela ku sangula moya wa hombe hi citshuketi. Hi zvalezvo zvi nga maheka futsi a siku lego. A mavingo ma no sangula kuba ngalava, zvonake va sangula ‘ku talelwa hi mati, vava mhangweni.’ (Luka 8:23) Hambulezvo, Jesu i no simama ku etlela!

A vamarinyero lavo va no tira yi nga chayi, va zama ku fambisa ngalava kasi yi nga rikhi, na va tirisa wutlhari gontlhe va gi kumileko ka malembe lawa va nga kari va lwisana ni mimoya ya hombe lomu bimbini. Kanilezvi ka khati lego, a cikatawu ci wa tlimbile. Va no vhuxa Jesu hi ku chava kufa; va keta vaku: “Hosi, hi hanyise, ha lova”! (Matewu 8:25) Va wa chava ku va ta mbombomela futsi!

Laha Jesu a nga vhuka, i no va wutisa lezvi: “N’wina va kukholwa ku tsongwani, hi yini mu chavako?” (Matewu 8:26) I no gumesa a kawuka moya ni bimbi aku: ‘Miyelani, muku hwi!’ (Marku 4:39) A moya wu no nyima a bimbi gonawu gi rula. (Marku na Luka va hlawutele matimu lawo yo hlamalisa. Va sangulile hi ku khanyisa lezvaku Jesu i nyimisile moya lowo wa hombe, va gumesa va wula lezvaku a vapizani va Jesu va wa hi ni kukholwa kutsongwani.)

Hi nga ehleketa lezvi a vapizani va Jesu va nga ti zwisa zvona siku lego! Va wa ha hi ku wona bimbi gi nga zangarile gi guma gi rula, ni moya wa hombe wu nyima. Va no sangula ku chava nguvhu, zvonake va wutisana vaku: ‘Kasi himani loyi, wa ku hambu moya ni bimbi zva mu ingisa ke?’ Va no guma va chikela khwatsi ka tlhelo le gin’wani ga bimbi. (Marku 4:41–5:1) Kuzvilava a tingalava leti tin’wani ti nga sangulile ku tsemakanya, ti zvi kotile ku tlhela.

A zvo ku tiyisa hlana a ku tiva lezvaku a n’wana wa Nungungulu i na ni ntamu wa ku nyimisa zvilo zva ntumbuluko! A cikhati a to fumela misava, vontlhe va ta hanya na va nga chavi nchumu, hakuva ku nga ta hava ni makhombo ya ntumbuluko!