Andzhako ka loku Jesu a mbhetile cipimo ca masiku mambiri le Samariya, i no tlhela lomu a nga kulela kona. I wa tirile nguvhu le Judhiya, hambulezvo i wa nga tlheleli ku ya humula le Galileya. Kanilezvi, i no ya sangula ntiro wa hombe nguvhu tikweni legi a nga kulele ka gona. Zvi wonekisa ku i wa nga rindzeli ku a vanhu va le Galileya va mu amukela khwatsi, hakuva i wa sina a wulile lezvaku ‘a muphrofeti a nga dzundziwi tikweni gabye.’ (Johani 4:44) A vapizani vakwe a va simamangi naye; kanilezvi, va no tlhela mitini yabye va ya simama ni mitiro yabye.

Mahungu muni lawa Jesu a nga sangula ku chumayela? I waku: ‘A mufumo wa Nungungulu wu tshinele; hundzulukani mu kholwa hi ivhangeli.’ (Marku 1:15) Zvini lezvi a vanhu va nga maha? A votala va mu amukele khwatsi va tlhela va mu dzundza. A va mu dzundzangi hi kuzwa lezvi a nga kari a chumayela basi. A cin’wani hi lezvaku a vokari va le Galileya va wa hi kona le Jerusalema vaga Phasika ka tihwetana ti nga hundzile, maku va wa zvi wonile a zvihlamaliso zva hombe lezvi a nga maha. — Johani 2:23.

Jesu i sangulele kwihi ka kona a ku maha ntiro wakwe wa hombe le tikweni ga Galileya? Zvi wonekisa ku khwatsi i sangulele le Kana, lomu a nga cicile mati ma maha vhinyo laha festeni ya muchadho. Makunu laha Jesu a nga hi kwale Kana hi khati ga wumbiri, i nozwa lezvaku ku na ni mufana a babyako zva mahati. A mufana loye i wa hi n’wana wa nduna ya Herodhi Antipasi, loyi a nga tsemisa hloko ya Johani Mubhabhatisi. A nduna leyi yi nozwa lezvaku Jesu i sukile Judhiya, makunu i wo tlhela Kana. Hikwalaho, yi no tekela ku suka kaya ka yona le Kapernawume yiya lavetela Jesu le Kana. A nduna leyo yi nga bayisekile nguvhu, yi no khongotela Jesu yiku: ‘Hosi, relela a n’wana wa mina na a nga sefa.’ — Johani 4:49, NM.

Jesu i no hlamula wanuna loye hi magezu ma nga mu hlamalisa nguvhu, aku: ‘Tlhela, a n’wana wa wena i hanyile.’ (Johani 4:50) A wanuna loye a nga hi nduna ya Herodhi, i no kholwa magezu ya Jesu, zvonake a tlhela kaya. Na a nga se chikela, i no tlhangana ni malandza yakwe na ma hi ni mahungu yo saseka ya ku a n’wana wakwe i wa nga ha babyi! I wa hanyile futsi! I no wutisa malandza yakwe aku: ‘I hanyile rini’? Lezvo i wa lava ku tiyiseka ku hakunene i hanyisilwe hi Jesu.

A malandza ma no hlamula maku: ‘A feveri yi mu tsikile tolo hi hora ya wu ntlhanu ni timbiri.’ — Johani 4:52.

A nduna leyo yi no tekela ku zvi wona ku i hanyile a cikhati caleci Jesu a ngaku: “A n’wana wa wena i hanyile.” Andzhako ka lezvo, a wanuna loye — a nga ganyile laha ko kala ava ni zvitiri — zvin’we ni vontlhe va laha kaya kakwe, va no maha vapizani va Kristu.

Leco cive cihlamaliso ca wumbiri leci Jesu a nga maha le Kana. Co sangula, i cicile mati ma maha vhinyo, maku leci ca wumbiri, i no hanyisa mufana a nga tsawukene naye hi cipimo ca 26 wa tikilometro. Hambulezvo, a nga nyimangi laho. I gumesile a maha zvihlamaliso zvin’wani. Kanilezvi, a cihlamaliso leci ca wumbiri a nga ci maha cikhati a nga tlhela Galileya, cive ca lisima nguvhu hakuva ci mu tivekisile lezvaku muphrofeti wa Nungungulu. Hambulezvo, xana a muphrofeti loyi i wa ta dzundziwa zvo kota kwihi lomu tikweni gakwe?

Lezvo zvi wonekile cikhati leci Jesu a nga tlhela kaya le Nazareta. Ka cipimo ci landzelako, hi ta wona lezvi zvi nga humelela kwaseyo.