Jesu i wa mu nyika nguvhu lisima Johani Mubhabhatisi. Ahati a vanhu laha va yileko ke, va wa mu wonisa kuyini Johani? Jesu i mahile mufananiso wu hi vhunako ku tiva hlamulo wa kona. I te: “A cizukulwana leci . . . ci fanana ni vanana va tshamileko wutshan’wini go xavisa, va nge ngalo ka vanghana vabye: Hi mu bele tinanga, kanilezvi a mu kinangi; hi hlalukile, kanilezvi a mu mahangi hlomulo.” — Matewu 11:16, 17.

Xana Jesu i wa lava ku wula yini? I no tlhamusela aku: ‘Johani i nota a ngagi a nganwi, vaku: I na ni dhimoni. A N’wana wa munhu i nota, waga, wanwa, ve ngalo: Langutani munhu wa kulondzola, cidhakwa, munghana wa vahlengisi ni vawonhi!’ (Matewu 11:18, 19) Johani i wa hanya wutomi ga wuNazira; i wa nga ti tateli zvo khoma wutomini gakwe, ne i wa nganwi vhinyo. Hambulezvo, a vanhu lavo va waku i na ni dhimoni. (Mitsengo 6:2, 3; Luka 1:15) Kanilezvi, Jesu i wa hanya ku fana ni van’wani; i waga a tlhela anwa a nga hundzeleti. Hambulezvo, va wa mu lumbeta ku i khobomu ni ku cidhakwa. Zvi wonekisa ku khwatsi a ku tsakisa munhu zva karata!

Jesu i no fananisa a cizukulwana leco, kutani vanhu va nguva leyo, ni vanana va tshamileko wutshan’wini go xavisa lava va alako ku kina a cikhati leci a vanghana vabye va bako tinanga, ne va nga kombisiko ku va le hlomulweni laha a vanghana vabye va hlalukako. Hambulezvo, Jesu i no va byela lezvi: “A wutlhari gi kombisile a kululama ka gona hi mitiro ya gona.” (Matewu 11:16, 19) Hi zvezvo futsi, a “mitiro” — ku nga lezvi Johani na Jesu va nga kari va zvi maha — yi wa komba lezvaku lezvi va nga va lumbeta hi zvona, zvi wa hi mawunwa futsi.

Andzhako ka loku Jesu a kombile lezvaku a cizukulwana leciyani ci wa nga ingisi, i no kona madhoropa yo kari yo kongoma, lomu a nga mahile zvihlamaliso zvo tala. I no kona dhoropa ga Korazini, ni ga Bhetsaidha, ni ga Kapernawume. Jesu i te loku i wa no maha zvihlamaliso lezvo lomu Tire ni lomu Sidhoni, a vanhu va madhoropa lawo na va hundzulukile. A dhoropa ga Kapernawume, ku wa hi lomu a nga sukela kona hi cikhati co kari a famba a tira. Hambu kwalomo, a kutala ka vanhu a va hundzulukangi. I no wula lezvi hi dhoropa lego: “Ku ta hehuka ka tiko ga le Sodhoma hi Siku ga Kulamula ku hundza wena.” — Matewu 11:24.

Hi kulandzela, Jesu i no dhumisa Papayi wakwe hi lezvi a fihlako lisine ka “titlhari ni vapimako”; kanilezvi, a vhuna vanhu vo ti koramisa vo fana ni vanana, lezvaku va li zwisisa. (Matewu 11:25) I no ramba vanhu lavo hi matsenya aku: “Tanani ka mina, n’wina n’wentlhe mu tirako ni ku bindzwa, ndzi ta mu humuta. Rwalani a pingu wa mina, mu gondza ka mina; hakuva ndzi rulile, ndzi hi ni mbilu yi koramileko; mu ta kuma kuhumula mihefemulweni ya n’wina. Hakuva a pingu wa mina a wu tsandzi, ni nzhwalo wa mina wa hehuka.” — Matewu 11:28-30.

Xana Jesu i wa humuta kutani ku tangalisa vanhu hi ndlela muni? I wa maha lezvo hi ku va gondzisa lisine li ngata hi ka Nungungulu, a va tlhatlhisa ka mikhuwo yo biha va nga hi wukhumbini ga yona, leyi a varangeli va wukhongeli va nga kari va va bindzisela hi yona — yo kota zvinaywanaywana zvabye xungetano hi Sabhadho. Lava va nga karateka hi lezvi va nga bindziselwa kuhanya hi varangeli va politika, i no va komba ndlela ya ku va kuma kuchavelelwa. Lava va nga xaniseka hi ciwonho, i no va komba lezvi va nga fanele ku maha kasi va tsetselelwa zviwonho zvabye va tlhela va hanya na va tsakelwa hi Nungungulu.

Lava va nga kari va vhumela ku rwala a pingu kutani kanga wa Jesu wo hehuka, va wa ti hendleleta ka Nungungulu hi kuzvirandza, va tirela a Papayi loyi wa hina wa tipswalo ni wuxinji. A ku tirela Nungungulu a hi ndzhwalo, hakuva a milayo yakwe a yi bindzi ne ni kutsongwani. — 1 Johani 5:3.