Ka siku go kari, Jesu ni vapizani vakwe va 4 va wa kari va tira nguvhu le Kapernawume. Ni gambo ga kona, a vanhu va nota ni vababyi kasi a ta va hanyisa. Kala ka cikhati leco, Jesu i wova ni cikhati citsongwani ca ku a tshama yece a khongela ka Papayi wakwe.

Ka siku gi nga landzela, Jesu i no phindzula na ka ha te phu, a famba yece. I no ya kuma wutshamu ga gi nene kasi a khongela ka Papayi wakwe. Kanilezvi, a zvi tekangi cikhati co leha. Laha ‘Simoni ni lava a nga hi navo’ va nga wona lezvaku Jesu a nga kona, va no sangula ku famba va mu lavetela. Kota lezvi a nga hi laha kaya ka Simoni Pedro, kuzvilava hi yena a nga rangela a ntlawa lowo. — Marku 1:36; Luka 4:38.

A cikhati va nga mu kuma, Pedro i te: “Vontlhe va ku lava.” (Marku 1:37) A vanhu va lomu Kapernawume va wa nga zvi lavi ku Jesu a famba — niku lezvo zvi wa zwisiseka. Va wa tsakile nguvhu hi lezvi a nga va mahele. Hikwalaho, va no zama ku “a nga suki ka vona.” (Luka 4:42) Hambulezvo, xana Jesu i tile laha misaveni kasi ku ta maha zvihlamaliso basi? Ahati a ntiro wakwe ke, i wa tela ku ta wu maha ka dhoropa lego basi? Zvini lezvi Jesu a nga wula mhakeni leyi?

Jesu i no byela vapizani vakwe aku: “A hi fambeni kun’wanyani, ka miti leyi yi nga kusuhani, kasi ndza fela ku kanela ka yona kambe, hakuva ndzi tele lezvo.” I no byela ni lava va nga lava ku a tshama, aku: ‘Ndzi fanele ku kanela a ivhangeli ya Mufumo wa Nungungulu ni ka yin’wani miti; hakuva ndzi rumelwe lezvo.’ — Marku 1:38; Luka 4:43.

Zvi la su dlunya lezvaku Jesu i tile laha misaveni kasi ku ta chumayela Mufumo wa Nungungulu. A Mufumo lowo, wu ta basisa a vito ga Papayi wakwe wu tlhela wu mbheta mababyi wontlhe ya vanhu hi kumbhelela. Khwatsi hi lezvi a kaleloko Mosi a nga mahile zvihlamaliso kasi ku tiyisekisa vanhu lezvaku i wa rumilwe hi Nungungulu, Jesu yenawu i no kombisa khwatsi lezvaku i rumilwe hi Nungungulu hi ku maha zvihlamaliso a hanyisa vanhu. — Eksodhusi 4:1-9, 30, 31.

Jesu ni vapizani vakwe va 4 va no gumesa va suka lomu Kapernawume vaya ka madhoropa man’wani kasi a ya chumayela ka wona. A vapizani lavo va 4 hi Pedro ni makabye wakwe Andrewu, na Johani ni makabye wakwe Jakobe. Makunu va wa hi ni vhiki na va rambilwe hi Jesu lezvaku a fambafamba navo kota vapizani vakwe vo sangula.

A ntiro lowu Jesu a nga wu maha na a hi ni vapizani vakwe va 4 lomu Galileya wuve wa wu nene nguvhu, laha ka kuza wu tiveka ni ka matshamu ya le kule nguvhu. ‘A wudhumo gakwe gi no zwala Siriya gontlhe’ ni ka 10 wa madhoropa ma nga vitaniwa ku i Dhekapoli ni le tlhatukweni wa Jordhani. (Matewu 4:24, 25) Ku nota vanhu vo tala hi ka matshamu lawo ni le Judhiya va landzela Jesu ni vapizani vakwe. A votala va nota ni vanhu va nga lava ku hanyisiwa. Vontlhe va ngata a va sukangi na va swirekile hakuva Jesu i hanyisile lava va nga babya, a hlongola madhimoni ka lava va nga hi ni madhimoni.