Laha Jesu ni vapizani vakwe va nga kari va fambafamba va chumayela ‘masinagogeni lomu tikweni gontlhe ga Galileya,’ i wa kari a maha zvilo zva zvi nene nguvhu. Lezvi a nga kari a maha, zvi no tiveka ka matshamu yo tala. (Marku 1:39) A mahungu lawo, ma no chikela ni ka dhoropa go kari ku nga hi ni wanuna a nga babya hi hlokonho. Dhokodhela Luka i zvi wulisile ku a wanuna loye i wa “tele hi hlokonho”. (Luka 5:12) Loku munhu a gilwe nguvhu hi wubabyi legi, gi wa tlhela gi wonhetela ni zviro zva miri wakwe.

A hlokonho ya wanuna loye makunu yi wa tshingile nguvhu, i wa fanele ku tshama kule ni van’wani. Ahandle ka lezvo, loku a wona vanhu i wa fanele ku banguleka aku: “A ndzi hlazvekangi, a ndzi hlazvekangi!” kasi va nga tshineli kusuhani va thapelwa hi hlokonho. (Levhi 13:45, 46) Kanilezvi, zvini a nga maha a wanuna loyi a cikhati a nga wona Jesu? I no tshinela a ya mu khizamela, a gumesa a mu khongotela, aku: “Hosi, loku u zvi lava ndzi hanyise.” — Matewu 8:2, NM.

Kunene, a wanuna loyi i wa hi ni kukholwa ka hombe nguvhu hi Jesu! I wa zwisa nguvhu wusiwana kambe hi hlokonho leyi a nga hi nayo! Makunu zvini lezvi Jesu a nga maha? Loku wena u wa hi kona, na wu mahile yini? Jesu i no mu zwela wusiwana, a nawuluta canja gakwe a mu henya. A guma aku: “Ndza zvi lava! Hanya.” (Matewu 8:3, NM) Hambu lezvi kuzvilava zvi karatako ku zvi kholwa, a hlokonho ya wanuna loye yi no tekela ku hangalaka, a hanya.

U wa nga ta zvi tsakela ku fumelwa hi Hosi ya ntamu ni ya ku zwela wusiwana, a ku fana na Jesu? Lezvi Jesu a nga mahela wanuna loye wa hlokonho, zvi hi tiyisekisa ku a cikhati leci a to fumela misava, ku ta tatiseka ciphrofeto ca Bhibhiliya caku: “I ta zwela wusiwana loyi a hlokisilweko ni muvhumali; a ponisa wutomi ga vavhumali.” (Lisimu 72:13) Kunene, Jesu i ta maha lezvi a zvi xuvako, kasi ku vhuna vontlhe va xanisekako.

Kambe wa zvi alakanya lezvaku a ntiro wa Jesu wu wa tsakisa vanhu hambu na a nga se hanyisa wanuna loyi wa hlokonho? Makunu andzhako ka ku a hanyisile wanuna loye, a vanhu va no zvi tiva ku i mahile nchumu lowo wo hlamalisa. Hambulezvo, Jesu i wa nga lavi lezvaku a vanhu va kholwa kakwe hi kuzwa lungu ya lezvi a nga kari a maha basi. I wa ci tiva a ciphrofeto ci nga wula lezvaku a gezu gakwe “gi nga ta zwiwa maphangweni.” (Isaya 42:1, 2) Lezvo zvi wula ku i wa nga ta ti lavela wudzundzo. Mayelano ni ciphrofeto leco, Jesu i no laya wanuna loyi a nga hi ni hlokonho aku: “U nga byeli munhu; kanilezvi famba u ya ti kombisa ka mupristi, u nyikela a munyikelo lowu Mosi a nga wu yimisa”. — Matewu 8:4.

A wanuna loye i wa tsakile nguvhu hi lezvi a nga hanyisilwe laha ka ku a nga zvi koti ku ti khoma— niku lezvo va zwisiseka. Zvezvi a nga ku vhuthu, i no famba a hlawutela mahungu lawo ka vontlhe. Lezvo zvi mahile lezvaku a van’wani va nyawukela ku wona Jesu hi matihlo yabye. Zvi zile zvi chikela laha ka ku Jesu a nga ha fambafambi kubaseni lomu madhoropeni. Ka cikhati leco, i wo tshama ciwuleni, lomu ko kala vanhu. Hambulezvo, i no yelwa hi vanhu va ngata hi ka matshamu manyingi kasi a ya va gondzisa ni ku va hanyisa.