A cikhati leci Jesu a nga tiva lezvaku a vaFarisi ni valandzeli va Herodhi va wa lava ku mu daya, i noya Bimbini ga Galileya ni vapizani vakwe. Ku nota vanhu vo tala hi le Galileya, le Sidhoni, le Jerusalema, le n’walungu wa Idhumeya, le mutsuwuka-gambo wa Congo wa Jordhani, ni madhoropeni man’wani ma nga hi kusuhani ni bimbi le tikweni ga Tire. Jesu i no ta hanyisa vanhu vo tala. Hi cigelo leco, lava va nga kari va babya nguvhu va no mu tshinelela kasi va mu khumba. Ne va wa nga rindzeli ku yena a va khumba. — Marku 3:9, 10.

A vanhu va ngata ka Jesu va wa tele nguvhu laha ka ku a kombela vapizani vakwe lezvaku va lulamisela cingalavana a ta nghena ka cona. I wa mahela ku tshinelanyana lomu matini a va gondzisa na a hi kulenyana navo, ni ku tsemakanya hi cona kambe a ya ka tlhelo legi gin’wani ga Bimbi kasi a ya gondzisa van’wani.

Matewu, a mupizani wa Jesu, i wulile lezvaku a ntiro lowu Jesu a nga maha, wu wa tatisa ‘lezvi zvi nga kanelwe hi muphrofeti Isaya’. (Matewu 12:17) Ciphrofeto muni leci Jesu a nga kari a tatisa?

Hi leci caku: “Hi gona a nandza ga mina legi ndzi gi hlawulileko; cirandzwa ca mina leci muhefemulo wa mina wu xaleleko khwatsi ha cona. Ndzi ta veka moya wa mina hehla kakwe, i taba hungu hi kulamula a ka vamatiko. A nga ta holova, ne ni ku kanyuluka; a gezu gakwe gi nga ta zwiwa maphangweni. A lihlanga li khinyekileko a nga ta li tshova, a nga ta tima a ngoti ya kandiya yi fufunhako, a kala a yisa nongameto kuhluleni; a vamatiko va ta tsumba vito gakwe.” — Matewu 12:18-21; Isaya 42:1-4.

Jesu hi gona nandza ga Nungungulu legi a xalalako khwatsi hi gona. Jesu i kombisile kululama kubaseni, loku ku nga pfhupelisilwe hi mikhuwo ya wukhongeli. A vaFarisi, ne va wa nga vhuni munhu wo babya hi Sabhadho! Lezvo ku wa hi ku tirisa Nayo wa Nungungulu hi kuya hi mawonela yabye. Kanilezvi, Jesu i no tlhatlhisa vanhu ka mikhuwo leyo yo bindza ni yo kala kululama, hi ku kombisa kululama ka Nungungulu a tlhela a komba ku i wa vhuniwa hi moya wakwe. Lezvo zvi mahile ku a varangeli va wukhongeli va zama ku mu daya. Hi nga wona kunyenyeza ka zvona!

Makunu, ma wula yini a magezu lawa yaku “a nga ta holova, ne ni ku kanyuluka; a gezu gakwe gi nga ta zwiwa maphangweni”? Loku Jesu a  hanyisa vanhu, i wa nga vhumeli ku vona — kutani madhimoni — ma mu “tivekisa.” (Marku 3:12, NM) Jesu i wa nga lavi lezvaku a vanhu va mu tiva hi kuzwa lungu ya vanhu lomu maruweni kutani hi mahungu yo hundzeleta ma nga hlawutelwa hi vanhu hi kuzwa kutsaka.

A cin’wani kambe, Jesu i wa chumayela mahungu yo chavelela lava va nga fana ni lihlanga li khinyekileko. A vanhu lavo, va wa fana ni trisido ya kandiya yi nge tuvi-tuvi, yi lava ku timeka. Jesu a nga tshovangi lihlanga li khinyekileko, ne a nga timangi trisido yi tuvikako yi lava ku timeka. I no va zwela wusiwana, a kombisa lirandzo, a tiyisa vanhu lavo vo rula. Handle ko kanakana, Jesu hi yena loyi a ringanako ku tsumbiwa hi vanhu vontlhe!