Laha Jesu a nga lava ku ruma vapostoli vakwe lezvaku va ya chumayela hi vambiri vambiri, i no va gondzisa khwatsi lezvi va nga fanele ku ya tirisa zvona. Hambulezvo a nga nyimangi laho. I no kombisa lirandzo, a va tlharihisa lezvaku va wa ta xanisiwa. I no va byela lezvi: ‘Langutani, ndza mu ruma na mu fanana ni tiyivhu cikari ka timhisi; . . . Ti woneleni vanhu, hakuva va ta mu nyikela tihubyeni, va mu xupula masinagogeni yabye. Ina, mu ta yisiwa mahlweni ka vafumeli ni tihosi hi kota ya mina’. — Matewu 10:16-18.

Lisine futsi. A vapostoli va Jesu va wa ta tshuka va xanisiwa nguvhu. Hambulezvo, i no va tiyisa hi ku va tsumbisa aku: ‘Loku va mu nyikela kabye, mu nga kanakani muku mu ta wulawulisa kuyini niku zvini mu ta nga wulawula, hakuva zvi ta nyikiwa ka n’wina hi cikhati leci mu ta nga wulawula. Hakuva a hi n’wina mu ta nga wulawula, kanilezvi hi moya wa Papayi wa n’wina wu to wulawula hi n’wina.’ I no tlhavinyeta aku: ‘A munhu i ta nyikela nakulobye kufeni, ni papayi i ta nyikela n’wana wakwe; a vanana va ta vhukela vapswali vabye, va va dayisa. Mu ta vengiwa hi vanhu vontlhe hi kota ya vito ga mina; kanilezvi loyi a timiselako kala magumo, hi yena a ta nga hanyiswa.’ — Matewu 10:19-22.

Kota lezvi a ku chumayela wu nga hi ntiro wa lisima nguvhu, Jesu i no kuca vapizani vakwe lezvaku va tlhariha kasi va nga tshuki va vhalelwa ku chumayela. I te: ‘Loku va mu xanisa mutini wo kari, chavelani ka mun’wani; hakuva hi zvinene ndziku ka n’wina: Mu nga ta kala mu mbheta a miti ya vaIzrayeli, a N’wana wa munhu na a nga se chikela.’ — Matewu 10:23.

Kunene, Jesu i va gondzisile zvilo zva hombe a vapostoli vakwe va 12, a va tlharihisa a tlhela a va tiyisa! A mhaka yo tiya hi lezvaku lezvi a nga wula, zvi wa nga tiri ka vapostoli basi. Lezvo hi zvi wona ka magezu yakwe yaku: “Mu ta vengiwa hi vanhu vontlhe”. Lezvo a zvi mahekangi cikhatini leco. Makunu, i wa nga wuli lava va nga chumayelwa hi vapostoli basi. I wa wula ni lava va nga wa ta chumayelwa Mufumo wa Nungungulu andzhako ka loku a delwe a tlhela a vhuka. Ahandle ka lezvo, a ku na zvo tsaliwa zvi kombako lezvaku a vapostoli va yisilwe mahlweni ka vafumeli ni tihosi, ne ku nyikelwa hi maxaka kasi va dawa ndzeni ka cikhatanyana leci va ngaya chumayela le Galileya.

Ha zvi wona khwatsi a ku Jesu i va byelile zvilo lezvo a vapostoli vakwe na a komba lezvi zvi nga wa ta maheka cikhatini ci nga hata. Wona magezu lawa kambe yaku va wa nga ta mbheta a miti yontlhe ya vaIzrayeli hi ku chumayela, a ‘N’wana wa munhu na a nga se chikela.’ I wa komba lezvaku a vapizani vakwe va nga ta chumayela a Mufumo wa Nungungulu va eneta kontlhe, yena Jesu Kristu,  a Hosi yi yimisilweko, na a nga se ta lamula vanhu hi ku yimela Nungungulu.

A vapostoli va wa nga faneli ku hlamala loku va xanisiwa a cikhati leci va nga kari va chumayela, hakuva Jesu i te: A “mupizani a nga hundzi mugondzisi wakwe, ni nandza a gi hundzi a hosi ya gona.” Lezvi Jesu a nga kari a zvi wula zvi laha kubaseni. Yena i wa kari a zondiwa a tlhela a xanisiwa hi ku chumayela Mufumo wa Nungungulu; makunu vonawu va wa ta mahiwa zvezvo. Hambulezvo, Jesu i no va kuca, aku: “Mu nga chavi lava va dayako miri, na va nga hi na ntamu a ku daya muhefemulo; kanilezvi chavani loyi a nga ni ntamu a ku lovisa a muhefemulo ni miri le Gehena.” — Matewu 10:24, 28.

Jesu i vekile cikombiso mhakeni leyi. I tiyile hlana, a vhumela kufa. A nga chavangi a tsika ku tsumbeka ka Jehovha, loyi a nga ni ntamu wontlhe. Hi Jehovha, a Nungungulu wa Ntamu-wontlhe, a zvi kotako ku lovisa “muhefemulo” (zvi wulako ku a munhu afa a nga ha vhuki). Hi yena kambe a zvi kotako ku vhuxa munhu a kuma wutomi ga pindzukelwa. Lezvo zvi va tiyisile nguvhu a vapostoli va Jesu!

Jesu i tirisile mufananiso kasi ku komba lezvaku Nungungulu wa va randza niku wa khatala nguvhu hi vapizani vakwe. I te: “A zvinjingiri zvimbiri a zvi xavisiwi hi mali ya lahasi nguvhu ke? Hambulezvo, ne a cinjingiri cin’we a ciwi lahasi Papayi wa n’wina na a nga zvi tivi. . . . Hikwalaho mu nga chavi; n’wina mu va lisima nguvhu a ku hundza zvinjingiri zvo tala.” — Matewu 10:29, 31, NM.

A mahungu lawa a vapizani va Jesu va nga chumayela ma wa ta hambanisa mingango. A vokari va wa ta ma tsakela, a van’wani ne. I no va byela lezvi: ‘Mu nga alakanyi ku ndzi tele ku neha kurula misaveni’. Lisine futsi. Kasi a munhu a hanya hi lisine la Bhibhiliya laha ngangweni, zvi lava kutiya-hlana. Jesu i te: ‘Loyi a randzako papayi wakwe kutani mamani wakwe a ku hundza mina a nga ndzi faneli; ni loyi a randzako mufana wakwe kutani nhanyana wakwe a ku hundza mina a nga ndzi faneli.’ — Matewu 10:34, 37.

Hambulezvo, va kona va nga wa ta va amukela khwatsi a vapizani va Jesu. I te: “Kani hi mani a nyikako ka mun’we wa lava va tsongwani a khokho ga mati yo titimela ntsena, hi ku tiva lezvaku mupizani, hi zvinene ndziku ka n’wina, a nga ta lahlekelwa hi nchachazelo wakwe.” — Matewu 10:42.

Laha makunu a vapostoli va Jesu va nga gondzisilwe khwatsi, va tlharihisiwa va tlhela va tiyisiwa, va no famba, va ‘tsemakanya mitini, na va kanela ivhangeli, ni ku hanyisa vababyi matshan’wini wontlhe.’ — Luka 9:6.