CIPIMO 51
Ku dawa munhu laha festeni ya Herodhi
MATEWU 14:1-12 MARKU 6:14-29 LUKA 9:7-9
-
HERODHI A TSEMISA HLOKO YA JOHANI
A cikhati leci a vapostoli va Jesu va nga kari va tira le Galileya, Johani mubhabhatisi, loyi a nga tivekisile Jesu kota Yivhana ya Nungungulu, i wa nga ha hi na thomo lego. Ka cikhati leco, ku wa hundza malembe mambiri na a vhalelwe paxweni.
Hosi Herodhi Antipasi i wa tlhatlhile wukati ni sati wakwe wo sangula, a teka Herodhiya a nga hi sati wa Filipu, a makabye wakwe wo hambana hi vamamani. Hi kuya hi Nayo wa Mosi, lowu Herodhi a nga ti byela lezvaku wa wu landzela, lezvi a nga zvi maha ku wa hi wubhayi niku zvi wa nga hi laha nayweni. Makunu laha Johani a nga kona Herodhi kubaseni, aku lezvi a nga maha zvi bihile, i no mu khoma a mu vhalela paxweni, kuzvilava na a kucetelwa hi Herodhiya.
Herodhi i wa nga zvi tivi ku i ta mu maha yini Johani, hakuva a vanhu va wa mu wona kota “muphrofeti.” (Matewu 14:5) Kanilezvi, Herodhiya i wa ci tiva co maha. I wa hi ni civiti ca hombe nguvhu hi Johani, a tshama hi ku hlota tindlela ta “ku mu daya”. (Marku 6:19) Hi magumo, a ndlela yi no vhululeka.
Na ku kiyela cikhati citsongwani kasi ku giwa Phasika ga 32 Nguveni ya Hina, Herodhi i no maha festa ya hombe ya ku tlhanganisa malembe. I no ramba tinduna takwe tontlhe to chaviseka, ni varangeli va masochwa, ni vanhu va lisima nguvhu va le Galileya. Laha va nga kari vaga festa leyo, Salome a nhanyana wa Herodhiya a nga pswele na Filipu, i no nghena a kina mahlweni ka vanhu. A vavanuna lavo va no tsaka nguvhu hi lezvi a nga kinisa zvona.
Herodhi yenawu i no tsaka nguvhu hi makinela ya n’wana wa sati wakwe, a se mu byela lezvi: ‘Ndzi kombele ni cihi u ci lavako, ndzi ta ku nyika.’ I no tlhela a hlambanya aku: ‘Ndzi ta ku nyika ni cihi u to kombela, hambu ni khihlanya ga mufumo wa mina.’ Salome i no ranga hi ku ya wutisa mamani wakwe aku: Mama, ‘ndzi kombela yini?’ — Marku 6:22-24.
Herodhiya i no tekela ku: ‘Ci ndzi hlamulile, ndzi wa zvi rindzela hi mahlo yo pswhuka!’ Aku: Famba u ya kombela “a hloko ya Johani Mubhabhatisi.” Salome i no tlhela hi ku hatlisa a yaku: ‘Ndzi lava lezvaku u ndzi nyika zvalezvi lomu ngelweni a hloko ya Johani Mubhabhatisi.’ — Marku 6:24, 25.
Herodhi i no bayiseka nguvhu. Hambulezvo i wa nga hi na ndlela, hakuva a vapfhumba vakwe va wa mu zwile na a tsumbisa Salome. Makunu i wa dhana ku nga mahi lezvi a nga tsumbisile. Hambu lezvi a nga zvi tiva ku loyi a nga lava ku dawa a nga na nandzu, i no ruma a guardha giya paxweni gi ya maha zvilo zvo tshisa nguvhu. Hi kutsopeta ka tihlo, a guardha gi no wuya ni hloko ya Johani lomu ka bhandeja gi ta nyika Salome, a gumesa a famba nayo ka mamani wakwe.
Laha a vapizani va Johani va nga zvi tiva, va no ya teka cirumbi cakwe va ya lahla. Va gumesa va byela Jesu lezvi zvi nga maheka.
Laha Herodhi a nga gumesa azwa lezvaku Jesu wa hanyisa vanhu a tlhela a hlongola madhimoni, i no chava nguvhu. I no ti wutisa ku a wanuna loye a mahako zvihlamaliso lezvo, ku ngava Johani Mubhabhatisi a nga vhuka “hi ka vafileko” ke! (Luka 9:7) Hi cigelo leco, i wa nga hagi gi relela hi ku lava ku wona Jesu. Hambulezvo, i wa nga lavi kuzwa lezvi Jesu a nga gondzisa. I wa lava ku ta mu wona kasi a tiyiseka ku hi Johani a nga vhuka ke.