A vatsali ni vaFarisi lava va nga ala ku Jesu i hlongola madhimoni hi ntamu wa Nungungulu, va wa hi khombyeni ga ku rukatela moya wa ku basa. Makunu, va wa ta yima na Nungungulu ni ku na Sathani ke? Jesu i te: “Loku mu rimela sinya ya yi nene, yi ta pswala mihandzu ya yi nene. Loku mu rimela sinya yi nga hiko yi nene, yi ta pswala mihandzu yi nga hiko yi nene. Hakuva a sinya yi tiviwa hi mihandzu ya yona.” — Matewu 12:33, NM.

Jesu i wa humesa mihandzu ya yi nene hi ku hlongola madhimoni. Makunu, a ku wula lezvaku i wa zvi maha hi ku vhuniwa hi Sathani, gi wa hi wupumbu. Khwatsi hi lezvi Jesu a nga wula ka kanelo yakwe laha Citsungeni, loku a handzu wu hi wu nene, ni sinya ya kona yi nene. Ahati a handzu wa vaFarisi ke, wa zvilo zvo kala hloko, zva ku lumbeta Jesu vaku i hlongola madhimoni hi ku vhuniwa hi Sathani? Wu wa komba lezvaku va bihile. Jesu i no va byela lezvi: ‘N’wina pswalo wa tinyoka, mu ta zvi kotisa kuyini ku wulawula a timhaka ti nene, lezvi mu bihileko ke? Hakuva a nomu wu wulawula’ lezvi zvi teleko mbilwini. — Matewu 7:16, 17; 12:34.

Kunene, a magezu ya hina ma komba lezvi a timbilu ta hina ti nga tshamisa zvona niku hi ta lamulwa hi kuyelana ni lezvi hi wulawulako. Hi cigelo leco Jesu a ngaku: ‘A timhaka tontlhe ta hava leti va ti wulawulako vanhu, va ta ti hlamulela ha tona sikwini ga kulamula. Hakuva hi timhaka ta wena u ta hlayelwa kululama; hi timhaka ta wena u ta koniwa.’ — Matewu 12:36, 37.

Hambu lezvi Jesu a nga kari a maha zvihlamaliso, a vatsali ni vaFarisi va wa lava ku a maha zvilo zvin’wani; va te: ‘Mugondzisi, hi lava ku wona a ciwoniso ci mahiwa hi wena.’ Kani va wa mu wonile na a maha zvihlamaliso kani a va mu wonangi, ku wa hi ni vakustumunyu vo tala va nga zvi wonile. Hikwalaho, Jesu i no byela a varangeli lavo va vaJudha aku: “A cizukulwana leci ca kubiha ci nga kholekangiko ci lava a ciwoniso; kanilezvi ci nga ta nyikiwa ciwoniso, ntsena a ciwoniso ca muphrofeti Jona.” — Matewu 12:38, 39.

Jesu a nga va siyangi munyameni, i no va tlhamusela lezvi a nga zvi wula, aku: ‘Kotisa lezvi Jona a nga tshama ndzeni ka hlavhi a masiku manharu ni wusiku ginharu, yenawu N’wana wa munhu i ta tshama ndzeni ka misava masiku manharu ni wusiku ginharu.’ Jona i wa mitilwe hi njhanjhi ya hombe yi gumesa yi mu kavhula a ku khwatsi hi loku a vhuxiwa hi ka vafileko. Hi ndlela leyo, Jesu i wo phrofeta lezvaku yena i wa tafa a guma a vhuxiwa hi siku ga wunharu. A cikhati leci lezvo zvi nga maheka, a varangeli lavo va vaJudha a va ci vhumelangi a “ciwoniso ca muphrofeti Jona”. Hi ndlela leyo, va no ala ku ti sola va hundzuluka. (Matewu 27:63-66; 28:12-15) Kanilezvi, a vanhu “va le Ninivha” va ti solile a cikhati leci va nga chumayelwa hi Jona. Hikwalaho, va wa ta kona a cizukulwana leco. Jesu i tlhelile aku a hosi ya cisati ya le Xebha yonawu yi wa ta va kona hi cikombiso ca yona, hakuva yi dokolokele kuzwa wutlhari ga Solomoni yi  tlhela yi gi hlamala laha yi nga gizwa. Jesu i no gumesa aku: “A wahombe ku hundza Solomoni i kona laha.” — Matewu 12:40-42.

Jesu i tlhelile a fananisa ciyimo ca cizukulwana leco ni wanuna a nga susiwa dhimoni. (Matewu 12:45) I te kota lezvi a wanuna loye a nga kala ku vhala laha ku nga hi ni dhimoni hi zvilo zva zvi nene, a dhimoni lego gi wuya ni madhimoni man’wani ya 7 ma ta mu xanisa. A ku fana ni wanuna loye a nga susilwe dhimoni, a vaIzrayeli vonawu va wa basisilwe. Kanilezvi, a tiko gontlhe gi no tsika ku ingisa vaphrofeti va Nungungulu, lezvi zvi nga gumesa hi ku va zonda na Jesu — loyi zvi nga kari zvi dlunyateka ku i na ni moya wa Nungungulu. Lezvo zvi kombile lezvaku a ciyimo ca vona ci wa bihile nguvhu ku hundza kusanguleni.

Loku Jesu a ha wulawula, ku no chikela mamani wakwe ni vamakabye vakwe va nyima hi le ndzhako ka vanhu. A vokari va nga tshamile kusuhani naye va no mu byela lezvi: “A mamani wa wena ni vamakabye va wena va yimile le handle, va lava ku wonana na wena.” Jesu i no wula zvilo zvi nga komba lezvaku i wa hi ni wunghana ga hombe ni vapizani vakwe, lava a nga va wona kota vamakabye vakwe va ku pswaliwa rumbu gin’we, ni vamamani vakwe. I no xungeta vapizani vakwe, aku: “A mamani wa mina ni vamakabye va mina hi lava va zwako a mhaka ya Nungungulu va yi maha.” (Luka 8:20, 21, NM) Hi ndlela leyo, i no komba lezvaku kani a wuxaka gabye gi wa hi ga lisima ku kota kwihi, a wunghana legi a nga hi nago ni vapizani vakwe hi gona gi nga hi ga lisima nguvhu a ku hundza wuxaka. A zvo ku nandziha a kuva ni wunghana ga hombe ni maKristu-kulori, nguvhunguvhu loku a van’wani va hi kanakanela kutani ku wulawula kubiha hi hina ni zvilo zva zvi nene lezvi hi zvi mahako!