Jesu i wa rambile 4 wa vapizani lezvaku vava vakukuti va vanhu. A vapizani lavo hi Pedro, na Andrewu, na Jakobe, na Johani. Makunu, hi Sabhadho, va noya sinagogeni lomu Kapernawume. Jesu i no sangula ku gondzisa kwalomuya sinagogeni zvonake a vanhu va hlamala kambe hi lezvi a nga gondzisisa zvona. I wa va gondzisa zvilo zvi ngata hi ka Nungungulu. I wa nga fani ni varangeli vabye va wukhongeli.

Ka Sabhadho lego, lomu sinagogeni ku wa hi ni wanuna a nga hi ni dhimoni. A wanuna loye a nga hi ni dhimoni i no banguleka kwalomuya sinagogeni, aku: “I mhaka muni hi nga nayo na wena, wena Jesu wa le Nazareta; u tele ku ta hi lovisa ke? Ndza ku tiva lezvaku hi wena mani, u Loyi wa Kubasa wa Nungungulu”! Jesu i no kawuka dhimoni lego gi nga kari gi xanisa wanuna loye, aku: “Miyela, u huma ka yena”! — Marku 1:24, 25.

A dhimoni gi no tekela ku wisa wanuna loye lahasi, gi mu puluwundzisa, gi tlhela gi mu pongapongisa. Kanilezvi, gi no gumesa gi huma “na gi nga mu mahangi nchumu.” (Luka 4:35) Lava va nga hi lomu sinagogeni va no hlamala nguvhu! Va wutisana vaku: ‘Zvini lezvi? Hambu a mimoya ya kubiha wa yi laya, yi mu ingisa’! (Marku 1:27) A zvilo lezvo zvo hlamalisa a nga zvi maha zvi no hangalaka zvi eneta tiko gontlhe ga Galileya — niku lezvo zva zwisiseka.

Jesu ni vapizani vakwe va no huma lomu sinagogeni vaya kaya ka Simoni Pedro. Va no ya kuma mukokati wa Pedro na a babya nguvhu — i wa hi ni feveri ya hombe. Va no khongotela Jesu lezvaku a mu hanyisa. Jesu i no tshinela, a mu khoma hi woko, a mu vhuxa a suka a yima. A feveri yi no tekela ku hangalaka, a sangula ku nyimanyima a va tirela — kuzvilava a longisela zvakuga zva Jesu ni vapizani vakwe.

Laha a gambo makunu gi nga sangula ku pela, ku nota vanhu vo tala laha kaya ka Pedro. A vanhu lavo va wata hi ka matshamu yo hambanahambana, na va heleketa lava va nga kari va babya. Na ku nga se hundza cikhati co leha, ku no tala nguvhu zvi tlhela zvi ku khwatsi a vanhu va dhoropa gontlhe va no ta tlhangana laha kaya ka Pedro. Va wa yela yini? Va wa lava ku hanyisiwa. Hi lisine, va noya ka Jesu ni “vontlhe lava va nga babya hi tinghumbe ti tsalangeneko . . . ; yena i no tlhateka mandla ka mun’we ni mun’wani wa vona, a va hanyisa.” (Luka 4:40) Kani a munhu i wa hi ni mababyi muni, Jesu i no ta hanyisa vontlhe. Lezvo zvi yelana ni lezvi zvi nga sina zvi phrofetilwe. (Isaya 53:4) Hambu lava va nga hi ni madhimoni, i no hlongola madhimoni lawo — a va hanyisa. Laha a madhimoni ma nga kari ma huma, ma wa ranga hi ku pongisa vanhu lavo, vaku: “Wena u N’wana wa Nungungulu.” (Luka 4:41) Kanilezvi Jesu i no ma kawuka ma miyela, a nga ha ma tsiki kambe ma wulawula. Ma wa zvi tiva lezvaku Jesu hi Kristu, kanilezvi Jesu i wa nga lavi lezvaku ma wonekisa ku khwatsi ma wa khozela Jehovha — a Nungungulu wa lisine.