Ka siku go kari, Jesu i wa kari a tira yi nga chayi. I wa hanyisile wasati a nga babya hi ku huma nkhata, a tlhela aya kaya ka Jayiro a ya vhuxa nhanyana wakwe— zvontlhe lezvo na a suka hi le Dhekapoli. Hambulezvo, yi wa nga se chaya. Na a ha suka laha kaya ka Jayiro, i no landzelelwa hi zvikhumu zvimbiri na zvi banguleka zviku: “N’wana Dhavhidha, hi mahele wuxinji!” — Matewu 9:27.

Hi ku vitana Jesu kota “N’wana Dhavhidha,” a vavanuna lavo va wo komba lezvaku va kholwa ku Jesu hi yena a nga wa ta tshama citshan’wini ca wuhosi ca Dhavhidha, niku hi yena Mesiya. Jesu i no mahisa ku khwatsi a nga zvizwi lezvi va nga kari va mu khongotela. Kuzvilava i wa lava ku wona ku va ta godhola ke. Kanilezvi a va godholangi. Laha a nga kari a nghena laha ka muti wo kari, vonawu va no nghena. Jesu i no va wutisa, aku: ‘Ma kholwa lezvaku ndzi nga zvi kota’ ku mu hanyisa ke? Vona va no mu hlamula ne na va nga kanakani vaku: “lna, Hosi.” Jesu i no tekela ku henya matihlo yabye, aku: “A ku maheke ka n’wina kotisa kukholwa ka n’wina.” — Matewu 9:28, 29.

A mahlo yabye ma no vhululeka hi citshuketi, va sangula ku wona! A ku fana ni lezvi a nga rangile a byela van’wani, vonawu i no va byela lezvaku va nga byeli munhu lezvi a nga va mahele. Kanilezvi, va no tsaka va nga zvi koti ni ku ti khoma, va wulawula hi yena ni ka matshamu ya le kule.

Laha a vavanuna lavo va nga kari va suka, a vanhu va nota ni wanuna a nga hi mbeveve hi lezvi a nga hi ni dhimoni. Jesu i no hlongola dhimoni lego, a se tekela ku wulawula. A vanhu va no hlamala, zvonake vaku: Cima a hi se wona ‘zvo kota lezvi lomu Izrayeli!’ A vaFarisi lava va nga hi kona, va wa nga hi na ndlela ya ku kaneta zvihlamaliso lezvo. Hikwalaho, va no phinda zvezvi zva tolo kasi ku kanakanela loyi a mu nyikako ntamu wa ku maha zvihlamaliso Jesu, vaku: “I humesa madhimoni hi hosi ya madhimoni.” — Matewu 9:33, 34.

Andzhako ka cikhatanyana, Jesu ni vapizani vakwe va no tlhela Nazareta, lomu Jesu a nga kulele kona. Ku wo hundza cipimo ca lembe basi na a gondzisile ka sinagoga go kari kwalomu Nazareta. Ka khati lego, a vanhu va wa sangulile hi ku zvi tsakela lezvi Jesu a nga gondzisa. Kanilezvi, va gumesile va swireka va mu djikela, va zama ku mu daya. Ka khati legi ga wumbiri, Jesu i no zama ku va vhuna kambe lava a kale va nga hi vaakelani vakwe.

Jesu i noya sinagogeni hi Sabhadho a ya gondzisa. A kutala ka vanhu va no hlamala laha ka ku va wutisana vaku: “Kasi inaloyi i gi kumile kwihi a wutlhari legi, ni ntamu wa ku maha zvihlamaliso lezvi?” Va tlhela vaku: “Loyi a hi yena a n’wana wa muvatli ke? A mamani wakwe a hi Mariya; ni vamakabye vakwe a hi Jakobe, na Josefa, na Simoni, na Judha ke? A vamakabye vakwe vontlhe va cisati a hi vona lava hi hanyako navo? Makunu i zvi kuma kwihi zvontlhe lezvi?” — Matewu 13:54-56, NM.

Jesu va wo mu wona kota munhu a nga hi muakelani wabye basi. Va se: ‘Inaloyi i kula lomu mandleni ya hina! Makunu, zvi nga mahisa kuyini a ku ava yena Mesiya?’ Lezvo zvi mahile ku va mu chepeta va tlhela va nga mu tsakeli, hambu lezvi va nga wonile wutlhari gakwe ga hombe ni zvihlamaliso lezvi a nga maha. Hambu maxaka yakwe ma wa nga kholwi kakwe, hi lezvi ma nga kari ma mu tiva kusukela wun’wananeni. Lezvo zvi mahile ku aza aku: “A muphrofeti a nga dzundziwi tikweni gakwe ni mutini wakwe.” — Matewu 13:57, NM.

Jesu i no hlamala laha a nga wona lezvaku a va kholwi ka yena. Hikwalaho, a nga ha mahangi zvihlamaliso. Kanilezvi, i no “tlhateka mandla yakwe ka vababyi va tsongwani [basi], a va hanyisa.” — Marku 6:5, 6.