Andzhako ka loku Jesu a hanyisile citiri ca murangeli wa masochwa, i no suka le Kapernawume aya dhoropeni ga Nayine, gi nga kumeka kwalomo ka 32 wa tikilometro le Dzongeni, hi tlhelo ga Mupela-gambo. I wa nga hi yece. I wa hi ni vapizani vakwe na a landzelwa hi vanhu vo tala kambe. Ko khwatsi va sangulile ku nghena lomu Nayine hi muphindelo. Laha va nga kari va nghena, va no tlhangana ni vaJudha vo tala na va ya lahla jaha lehandle ka dhoropa.

Loyi a nga bayisekile nguvhu cikari kabye, ku wa hi mamani wa jaha lego. Ahandle ka kuva noni, makunu i wa felwe hi n’wana wakwe wa mun’we. A cikhati a nuna wakwe a ngafa, i wa sele ni n’wana wakwe wo randzeka. Handle ko kanakana, i wa mu randza nguvhu. I wa rindzela ku hlayisiwa hi yena niku i wa tsumba yena ka zvontlhe zva mandziko. Makunu, i wa no salisa zvezvi! I wa nga ha hi na wa ku mu pangalata ni ku mu vhunetela. A hi kuhlomula ka zvona!

Laha Jesu a nga wona noni leyo, i no bayiseka nguvhu hi ku wona hlomulo lowu yi nga hi ka wona. I no tiyisa a noni leyo hi magezu yo chavelela, aku: “U nga rili!” Kanilezvi, a zvi gumelwangi laho. I no tshinela a khoma leci va nga rwalile hi cona a jaha lego gi nga file. (Luka 7:13, 14) I zvi mahile hi ndlela ya ku a vanhu lavo va nga kari va rila, va tekela ku nyima hi citshuketi. A kutala ka vona kuzvilava va wa ti wutisa ku: ‘Kasi zvi wula yini zvezvi a nga wula? Zvini a lavako ku maha?’

Ahati lava va nga hi na Jesu ke, lava va nga mu wonile na a hanyisa vanhu vo tala, zvini va nga kari va zvi ehleketa? Lisine ku a kaleloko ku wa tshukile ku vhuxiwa vanhu vo kari. Hambulezvo, va wa nga se wona Jesu na a vhuxa munhu. Makunu, kuzvilava va wa ti wutisa lezvi: ‘Xana Jesu i ta gi vhuxa a jaha legi?’ (1 Tihosi 17:17-23; 2 Tihosi 4:32-37) Jesu i no wula lezvi: “Jaha, ndziku ka wena, vhuka!” (Luka 7:14) A jaha gi no vhuka futsi, gi tshama gi sangula ku wulawula! Jesu i no mu nyikela ka mamani wakwe, loyi a nga ha dzukile ni ku hlamala, lezvo na a tsakile nguvhu kambe. Makunu i wa hi ni wa ku mu pangalata.

Loku a vanhu va zvi wonile ku a jaha gi vhukile hakunene, va no sangula ku dhumisa Jehovha, Loyi a  Nyikako wutomi, vaku: “Ku humele muphrofeti wa hombe cikari ka hina”. A van’wani vaku: “Nungungulu i endzele a vanhu vakwe.” (Luka 7:16) A mahungu lawo ma no hangalaka hi cihatla, ma ya ka matiko ya lomu kusuhani. Ko khwatsi ma chikele ni le dhoropeni ga Nazareta, lomu Jesu a nga kulele kona — gi nga hi kwalomo ka 10 wa tikilometro — maza ma ya chikela ni le Judhiya, kwale Dzongeni.

Ka cikhati leco, Johani Mubhabhatisi i wa ha vhalelwe paxweni. Ni kwalomo a nga hi kona, i wa zvi lava nguvhu a tiva lezvi Jesu a nga kari a maha. A vapizani vakwe va no mu hlawutela a zvihlamaliso lezvo. Lezvi Johani a nga maha, hi ta zvi tiva ka cipimo ci landzelako.