A vanhu va matshamu ya le kule nguvhu va no zvizwa lezvi Jesu a nga kari a maha. Hikwalaho, va nota hi kwalomolomo kasi ku tazwa lezvi a nga kari a gondzisa ni ku wona zvihlamaliso zvakwe. Hambulezvo, loku ku hundzile masiku yo kari, Jesu i no tlhela Kapernawume, laha a nga sukele kona a famba a maha ntiro wakwe. A vanhu va lomu Kapernawume ni va kusuhani ni Bimbi ga Galileya, va nozwa a ku i wuyile. Hikwalaho, va nota laha ka muti lowu a nga hi ka wona. A vokari va vona va wa hi vaFarisi ni vagondzisi va Nayo, va ngata hi le Galileya, ni le Judhiya, ni le Jerusalema.

Ka muti lowu Jesu a nga hi ka wona, ku no tala hi vanhu laha ka kuza ‘va vhumala ni wutshamu laha nyangweni.’ Jesu i no gumesa a sangula ku va gondzisa. (Marku 2:2) Ka cikhati leco, zvontlhe zvi wa tshamisekile kasi ku maheka nchumu wo hlamalisa. Leco cive cimaho ci hi vhunako ku zvi wona khwatsi lezvaku Jesu i na ni ntamu wa ku fuvisa leci ci vangako kuxaniseka ka vanhu ni ku hanyisa ni wihi a lavako ku mu hanyisa.

Laha Jesu a nga kari a gondzisa na a hi ka yindlu leyo yi nga tele hi vanhu, ku nota 4 wa vavanuna ni munhu a nga file reve. A wanuna loye i wa hi laha ka lihlaka kutani sango. Va wa lava ku Jesu a hanyisa munghana wabye. Hambulezvo, va wa nga zvi koti ku mu chiketa laha ka Jesu hi kota ya kutala ka vanhu. (Marku 2:4) Handle ko kanakana, va karatekile nguvhu. Hikwalaho, va no noma le hehla ka yindlu, va bhoxa va releta munghana wabye laha Jesu a nga hi kona.

Xana Jesu i zangarile hi lezvi va nga mu colopetela? Ne ni kutsongwani! I no hlamala nguvhu hi kukholwa kabye, a byela wanuna loyi a nga file reve aku: “A zviwonho zva wena zvi tsetselelwe.” (Matewu 9:2) Xana Jesu i wa hi ni ntamu wa ku tsetselela zviwonho futsi? A vaFarisi ni vatsali va no swireka va ngurangura va wutisana lezvi: ‘Hikuyini a munhu loyi a wulako zvakunghahi? Wa rukatela; himani a nga tsetselelako zviwonho, a handle ka Nungungulu yece?’ — Marku 2:7.

Jesu i no tiva lezvi va nga kari va zvi ehleketa, a va wutisa lezvi: “Hikuyini mu alakanyako zvilo lezvo timbilwini ta n’wina? Cini ci olovako? Ku wula ku: ‘A zviwonho zva wena zvi tsetselelwe,’ kutani ku wula ku: ‘Suka u yima, u teka lihlaka la wena u famba ke’?” (Marku 2:8, 9, NM) Jesu i zvi kotile ku tsetselela zviwonho zva wanuna gayani, hi ku tirisa ndzhiho lowu a nga wa ta hakhela hi kufamba ka cikhati.

Hi kulandzela, Jesu i no komba vontlhe, ni lava va nga kari va mu sola, lezvaku i wa hi ni ntamu wa ku tsetselela zviwonho laha misaveni. I no byela loyi a nga file reve aku: “Mina ndza wula ka wena, vhuka, u teka sango ga wena uya kaya.” A wanuna loye i no tekela ku vhuka a teka sango gakwe a famba na a woniwa hi vanhu vontlhe. Vontlhe va no hlamala, va dhumisa Nungungulu, vaku: ‘Cima hi wa nga se wona zvakunghahi’! — Marku 2:11, 12.

Hi nga wona a mhaka leyi: Jesu i kumbukile ciwonho laha a nga wulawula hi mababyi, ni lezvaku a ku tsetselelwa zviwonho zvi nga yelana ni kuhanyisiwa mababyi! A Bhibhiliya gi gondzisa lezvaku Adhamu, loyi hontlheni hi tako hi ka yena, i wonhile, ni lezvaku hontlhe hi tlhapelwe hi wuyelo ga ciwonho — ku nga mababyi ni kufa. Kanilezvi, loku a Mufumo wa Nungungulu wu ta sangula ku fuma, Jesu i ta tsetselela zviwonho zva vontlhe lava va randzako Nungungulu va tlhela va mu tirela. A mababyi ma ta guma ma loviselwa magumo. — Va Le Roma 5:12, 18, 19.