Lezvi a vanhu va nga maha loku vazwa lezvi Jesu a nga kari a gondzisa ni ku zvi maha, zvi wa yelana nguvhu ni tshamela ga timbilu tabye. Lezvo zvi wonekile khwatsi na a hi ka muti wo kari le Galileya. A muFarisi wo kari wa ku hi Simoni i no ramba Jesu lezvaku a yaga naye; kuzvilava na a fela ku mu wona khwatsi loyi a nga kari a maha zvihlamaliso zva hombe. Khwatsi hi lezvi ka makhati man’wani a nga vhumelile ku yaga ni vahlengisi ni vawonhi, ka khati legi kambe Jesu i no vhumela; kuzvilava na a fela ku ya gondzisa lava va nga hi kona.

A maruwa ya le Palestina ma wa hi ni lithuri, laha ka ku loku munhu a famba hi masandaliya a mikondzo yi wa tolovela ku hisa yi tlhela yi chaka. Makunu zvi wa tolovelekile ku loku a mupfhumba a chikela, va mu hlambisa mikondzo hi mati yo titimela. A ndlela yin’wani ya ku kombisa wunene ni ku hoyozela khwatsi mupfhumba, ku wa hi ku mu pswopswa ni ku mu chela mafura lomu ka misisi. Hambulezvo, a cikhati leci Jesu a nga chikela laha kaya ka Simoni, ne cin’we ca lezvi a nga mu mahelangi! Makunu, hi nga wula lezvaku i mu amukele khwatsi?

Loku a vapfhumba vontlhe va tshamile mezeni, va no sangula kuga. Laha va nga kari vaga, ku no nyanimela wasati wo kari a nghena na a nga rambiwangi. Vontlhe lomu dhoropeni va wa zvi tiva ku a wasati loye “muwonhi”. (Luka 7:37) Lisine ku a vanhu vontlhe vawonhi, hambulezvo zvi wonekisa ku a wasati loye i wa hi ni mahanyela yo biha nguvhu; ko khwatsi i wa hi cibhayi. Kuzvilava i wa zvi tiva lezvi Jesu a nga kari a gondzisa ni lezvaku i wa ramba ‘vontlhe lava va tirako ni ku bindzwa, kasi ku va humuta.’ (Matewu 11:28, 29) Ko khwatsi a wasati loye i no sangula ku lavetela Jesu hi ku kokiwa hi magezu ni mitiro yakwe.

Laha Jesu a nga hi mezeni, a wasati loye i nota hi lendzhako kakwe a ta khizama laha ka mikondzo yakwe na a kari a rila. A mihloti yakwe yi wo wela laha ka mikondzo ya Jesu, a se mu sula hi misisi; a yi pswopswa a tlhela a yi chela mafura yo nuhela a ngata nawo. Simoni i no zvi wona, a sola mbilwini yakwe a ti byela lezvi: ‘Loku munhu loyi i wa hi muphrofeti, na a mu tivile loyi wasati a mu khumbako . . . lezvaku muwonhi.’ — Luka 7:39.

Jesu i no zvi tiva lezvi Simoni a nga kari a zvi ehleketa, aku: “Simoni, ndzi na ni mhaka” ndzi lavako ku ku byela. Simoni aku: “Wula Mugondzisi”! Jesu i no ya mahlweni aku: “Ku wa hi kona a vanhu vambiri va nga hi ni nandzu ka mupembisi wo kari. [A] mun’we i wa hi ni nandzu wa 500 wa macheleni, ni mun’wani wa 50. Laha va nga vhumala a zva ku riha ha zvona, yena i lo va tsetselela hi wumbiri gabye. Makunu hi wihi wa vona a ta nga mu randza nguvhu”? Simoni i no hlamula, kuzvilava na a nga khatali, aku: ‘Ndzi alakanya ku hi loyi a nga tsetselelwa nguvhu.’ — Luka 7:40-43.

Jesu aku u wula zvona. Makunu, i no byela Simoni na a cuwuka wasati loye, aku: ‘Wa mu wona wasati loyi ke? Ndzi nghenile ndlwini ya wena, a wu ndzi nyikangi a mati ndzi hlamba mikondzo; kanilezvi yena i tsakamisile mikondzo ya mina hi mihloti, a yi kulula hi misisi yakwe. Wena a wu ndzi pswopswangi, kanilezvi yena, cima ndzi nghena a nga tsikangi ku pswopswa mikondzo ya mina. Wena a wu totangi a hloko ya mina hi mafura; kanilezvi yena i totile mikondzo ya mina hi mafura yo nuhela.’ Jesu i zvi wonile lezvaku a wasati loye i wa ti sola hi mbilu yontlhe hi mahanyela yo biha a nga hi nawo. A se gemeta hi magezu lawa: ‘A zviwonho zvakwe le’zvinyingi, zvi tsetselelwe, hakuva i randzile nguvhu; kanilezvi loyi a tsetselelwako zvitsongwani, i randza kutsongwani.’ — Luka 7:44-47.

A hi ku khwatsi Jesu Kristu i wo tsaka hi mahanyela yo biha. Kanilezvi, i wo kombisa tipswalo niku wa va zwisisa lava va mahileko zviwonho zva hombe, va ti sola va hundzuluka zvonake vaya ka yena a ya va vhuna. Handle ko kanakana, a wasati loye i salile a te pe, a cikhati a ngazwa Jesu na a mu byela lezvi: “A zviwonho zva wena zvi tsetselelwe. . . . A kukholwa ka wena ku ku hanyisile; famba hi kurula.” — Luka 7:48, 50.