Pedro i nozwa Jesu na a nyika wusungukati ga lezvaku loku a makabye a tlulene minenge ni mun’wani i fanele ku zama ku bhulisana naye na va hi vona va vambiri basi. Kanilezvi, zvi wonekisa ku khwatsi Pedro i wa lava ku tiva ku a makabye i fanele ku mu wonhela makhati mangani a mu tsetselela.

Pedro i no wutisa Jesu aku: “Hosi, a makabye wa mina i ta ndzi wonhela makhati mangani, ndzi mu tsetselela ke? Ku kala ntlhanu ni kumbiri ke?” A varangeli vo kari va wukhongeli va wa gondzisa lezvaku a munhu i fanele ku tsetselela mun’wani kala makhati manharu. Makunu, kuzvilava Pedro i wa alakanya ku gi wa tava wuxinji loku a tsetselela makabye ‘kala 7 wa makhati’. — Matewu 18:21.

A ku hlayela makhati lawa a munhu a ku wonhelako, a zvi yelani ni lezvi Jesu a nga kari a gondzisa. Hikwalaho, i no vhuna Pedro lezvaku a cica mawonela yakwe. I te: “A ndzi ku byeli ku kala 7 wa makhati, kanilezvi kala 77 wa makhati.” (Matewu 18:22, NM) Hi magezu man’wani, lezvo zvi wula ku mu tsetselela contlhe cikhati. A ku na ntsengo wa makhati lawa Pedro a nga fanele ku tsetselela makabye.

Jesu i no guma a hlawutela mufananiso kasi ku vhuna Pedro ni lava van’wani lezvaku va zvi zwisisa khwatsi a ku zvo boha ku tsetselela van’wani. A mufananiso lowo wu wulawula hi nandza gi nga kala ku pimanyisa wuxinji ga hosi ya gona. A hosi leyo yi no lava ku a malandza ya yona ma hakhela lezvi ma nga dhevha. Makunu va nota ni nandza gi nga dhevha 10 000 wa titalenta [ti nga ringana a 60 000 000 wa macheleni]. Leyo yi wa hi mali yo tala nguvhu. Ku wa nga hi na ndlela ya ku a nandza lego gi hakhela mangava lawo. Hikwalaho, a hosi yi no laya lezvaku gona ni sati wa gona, ni vana va gona, va xavisiwa kasi ku hakhelwa mangava lawo. A nandza gi no khizama, gi khongotela hosi ya gona giku: “Hosi, . . . timisela ha mina, ndzi ta ku riha [mangava] wontlhe.” — Matewu 18:26.

A hosi yi no gi zwela wusiwana, yi gi mahela wuxinji, yi vhinya mangava lawo. Zvalezvi a hosi yi nga gi tsetselela, gi noya kuma nandza-kulobye gi nga gi  dhevha a 100 wa macheleni. Gi no khoma a nandza-kulobye hi ma 25, gi gi tlimba na giku: “Ndzi rihe mali ya mina.” Kanilezvi, a nandza lego gi no khizama gi mu khongotela, giku: “Timisela ha mina, ndzi ta ku riha.” (Matewu 18:28, 29) Hambulezvo, a nandza legi gi nga tsetselelwa mangava hi hosi, a gi pimanyisangi a wuxinji ga hosi ya gona. Gi no khoma a nandza-kulobye, gi gi vhalelisa paxweni na giku kala gi hakhela, kuveni lezvo gi wo dhevha zvimalana!

Jesu i no wula lezvaku loku a malandza man’wani ma wonile ku a nandza lego a gi mu mahelangi wuxinji mun’wani, ma noya byela hosi. A hosi yi no zangara, yi vitanisa nandza lego yi taku: “Nandza go biha, ndzi ku rivalele wontlhe nandzu wa wena, hi lezvi u nga ndzi khongotela; xana u wa nga fanelangi a kuva ni wuxinji ka nandza-kuloni, kota lezvi mina ndzi nga ku mahela wuxinji ke?” A hosi leyo yi nga zangarile, yi no nyikela nandza lego lezvaku gi ya vhalelwa kala gi riha mangava wontlhe. Jesu i no gemeta hi magezu lawa: ‘A Papayi wa mina wa le tilweni i ta mu maha zvalezvo, loku mu nga tsetseleli hi timbilu mun’we ni mun’wani a makabye wakwe.’ — Matewu 18:32-35.

Kunene, hi gondza zva hombe nguvhu mhakeni ya ku tsetselela! Jehovha i hi tsetselele a mangava ya hombe nguvhu — ku nga zviwonho zva hina. Kani zvini a muKristu-kulori a hi wonhelako, zvi tsongwani nguvhu loku hi zvi fananisa ni lezvi hi nga tsetselelwa. Jehovha kambe a nga hi tsetseleli khati gin’we, i hi tsetselela makhati ya talela ga cima. Makunu, a hi chukwana ku hinawu hi tsetselela makabye wa hina makhati yo tala, hambu loku hi hi ni cisolo ka yena ke? Loku hi maha lezvo, na hi ingisa lezvi Jesu a nga hi gondzisa, Nungungulu yenawu i ta ‘hi tsetselela minandzu ya hina, khwatsi hi lezvi hi va tsetselelako lava va nga ni minandzu ka hina.’ — Matewu 6:12.