Kota lezvi Jesu a nga hi munhu wo mbhelela, a nga kumanangi ni zvikarato lezvi a vanhu van’wani va nga hi nazvo. Hambulezvo, i va zwelile nguvhu wusiwana. I wa ti yimisele ku maha ni cihi kasi ku va vhuna. I wa maha ni lezvi zvi nga kala zvi nga laveki ka zvikhati zvo kari. Kunene, i vhunile vanhu hi ku va zwela wusiwana. Ehleketa hi zvikombiso zvi nga lomu ka Cipimo 32, 37, 57, ni 99.

A vanhu vontlhe — vanana ni vahombe — zvi wa nga va karateli kuya ka Jesu hakuva i wa nga hi munhu wo randza kuva yece ni wo kala cinghana, ne i wa nga ti woni na a hi wa lisima ku hundza van’wani. A vanhu va wa tizwa khwatsi loku va hi na Jesu hi ku wona lezvi a nga khatalisa zvona hi vona. Kasi ku wona lezvo, wona Cipimo 25, 27, ni 95.

Jesu i wa khongela ka Papayi wakwe hi mbilu yontlhe na a hi yece kutani na a hi ni vakhozeli van’wani va lisine. Lezvo i wa zvi maha hi kukhandzakanya. I wa khongela hi zvikhati zvo hambanahambana. I wa nga khongeli loku a lava kuga basi. I wa khongela a bonga Papayi wakwe, a mu dhumisa a tlhela a kombela wutlhari loku a lava ku maha zviboho zva lisima. Wona zvikombiso zvi nga lomu ka Cipimo 24, 34, 91, 122, ni 123.

Hambu ka zvikhati lezvi zvi nga ringana ku Jesu a tshama a ku ge, a humula, i wa ti tsona ku humula a rangisa kutshamiseka ka van’wani. I wa nga randzi ku alakanyela ga yena basi. Ka mhaka leyi kambe, i hi vekele cikombiso leci hi nga ci landzelako. Loku u lava ku wona lezvi a kombisileko zvona ku i wa zvi randza ku vhuna van’wani, gondza Cipimo 19, 41, ni 52.

Jesu a nga no gondzisa lezvaku a ku tsetselela van’wani zva lisima zvi gama kwalaho, yena futsi i tsetselele vapizani vakwe ni van’wani laha a nga kari a tirisana navo. Ehleketa hi zvikombiso zvi nga lomu ka Cipimo 26, 40, 64, 85, ni 131.

Zvi wa sina zvi phrofetilwe lezvaku a kutala ka vaJudha va wa nga ta mu amukela Mesiya ni lezvaku a valala vakwe va wa ta mu daya. Makunu, zvi wa olova ku Jesu a nga ti karati laha a nga vhuna vanhu, a zvi mahela ku tatisa nayo. Hambulezvo, i no hiseka a va gondzisa wukhozeli ga lisine. Mhakeni ya kuhiseka, i va vekele cikombiso a valandzeli vakwe vontlhe va hanyako lomu a vanhu va kona va nga khataliko hi mahungu yabye va tlhela va va xanisa. Wona a Cipimo 16, 72, ni 103.

Jesu i wa hi ni wutivi ni wutlhari a ku hundza vanhu vo kala ku mbhelela. Lezvi a nga hi munhu wo mbhelela kambe, i wa hi ni kupima ku nene niku i wa zvi kota ku maha zvilo a ku hundza vontlhe. Kanilezvi i no ti koramisa a tirela van’wani. A zvikombiso zva kona zvi lomu ka Cipimo 10, 62, 66, 94, ni 116.

Jesu i va kombisile lihlazva-mbilu a vapizani vakwe ni vanhu van’wani hi kuphindaphinda laha va nga kari va tsandzeka ku pimanyisa cikombiso cakwe kutani ku maha lezvi a nga va gondzisa. I kombisile lihlazva-mbilu kambe a va gondzisa hi kuphindaphinda lezvi zvi nga laveka kasi vava vanghana va hombe va Jehovha. Kasi ku wona lezvi a nga kombisisa zvona a lihlazva-mbilu, gondza Cipimo 74, 98, 118, ni 135.