Andzhako ka loku ngilozi Gabriyeli a byelile Mariya lezvaku i ta pswala n’wana loyi a nga wa ta vitaniwa ku hi Jesu, niku a n’wana loye i wa ta fuma kala kupindzuka, Mariya i no mu wutisa lezvi: “Zvi ta mahisa kuyini lezvo, lezvi ndzi nga tiviko wanuna?” — Luka 1:34.

Gabriyeli i no mu hlamula aku: “A moya wa ku basa wu tata hehla ka wena, ni ntamu wa loyi a nga Hehla-Hehla wu ta ku fenengeta; hikwalaho a n’wana wo basa loyi a ta nga belekiwa i ta vitanwa a N’wana wa Nungungulu.” — Luka 1:35.

Gabriyeli i no engetela zvin’wani, kuzvilava kasi ku vhuna Mariya lezvaku a kholwa mahungu yakwe, i te: ‘Languta, a xaka ga wena Elizabheti, yenawu i xurile nyimba ya mufana wukhosaneni gakwe; leyi i hweti ya wuntlhanu ni yin’we ka yena loyi va ngaku i ngon’wa. Hakuva a ku na cilo ci nga mu tsandzako Nungungulu.’ — Luka 1:36, 37.

A hlamulo wa Mariya wu komba ku i vhumelile lezvi Gabriyeli a nga mu byela. Hakuva i te: “Hi zvona, ndzi nandza ga Hosi; a zvi maheke ka mina kota lezvi u wulileko.” — Luka 1:38.

Zvalezvi Gabriyeli a nga suka, Mariya i no tekela ku ti longisela kasi a ya vhuxela Elizabheti. Elizabheti i wa tshama ni nuna wakwe Zakariya le Judha, ka wutshamu ga zvitsunga kusuhani ni Jerusalema. A kaya ka Zakariya ku wa hi ka pfhuka wa masiku manharu kutani mune, kusukela kaya ka Mariya le Nazareta.

Hi magumo Mariya i no chikela kaya ka Zakariya. Laha a nga kari a nghena lomu ndlwini, i no losa Elizabheti. Zvalezvi Elizabheti a nga zvizwa, i no tekela ku tala hi moya wa ku basa, a byela Mariya aku: ‘U katekile wena cikari ka vavasati, yi katekile ni mbeleko ya nyimba ya wena! Zvi maheka hikuyini lezvi ka mina, lezvaku a mamani wa Hosi ya mina ata ka mina ke? Hakuva laha a gezu ga kulosa ka wena gi nga zwala tindleveni ta mina, a cin’wanana ci no tshukuma hi kutsaka rumbyini ga mina.’ — Luka 1:42-44.

Mariya i no mu bonga hi mbilu yontlhe, a mu hlamula aku: ‘A muhefemulo wa mina wa dhumisa Hosi, ni moya wa mina wa tsaka ha Nungungulu a Muhanyisi wa mina; hakuva i cuwukile a wulahasi ga nandza gakwe. Kusukela lezvi a zvizukulwana zvontlhe zvi taku ndzi katekile. Hakuva Loyi a nga ni ntamu i ndzi mahele zvilo zva hombe’. Wona lezvaku hambu lezvi Mariya a nga kumile thomo, i yisile wudzundzo gontlhe ka Nungungulu. I te: “Gi basile a vito gakwe. A zvizukulwaneni zvontlhe a wuxinji gakwe gi ka lava va mu chavako.” — Luka 1:46-50.

Mariya i no simama ku dzundza Nungungulu hi ku wula zvilo zvi nga wa ta maheka hi kufamba ka cikhati. I te: ‘I tirile hi ntamu hi woko gakwe; i hangalasile lava va ti kukumukisako kualakanyeni ka timbilu tabye. I wisile tihosi zvitshan’wini zva tona zva wuhosi, a tlakusa lava va tsongwani. Lava va nga ni ndlala i va xurisile hi lezvi zvo nandziha; a tlhelisa lava va fumileko na va nga hi na nchumu. I vhunile Izrayeli a nandza gakwe, na a alakanya a wuxinji gakwe ka Abrahama ni pswalo wakwe kala kupindzuka, kota lezvi a nga tsumbisa a vapapayi va hina.’ — Luka 1:51-55.

Mariya i no tshama ni xaka gakwe Elizabheti hi cipimo ca tihweti tinharu, kuzvilava na a fela ku mu vhuna ku maha mitiro ya laha kaya, kota lezvi ku nga kiyela mavhiki matsongwani kasi a phuluka. Mariya na Elizabheti va wa hi ni tinyimba hi ku vhuniwa hi Nungungulu! Kunene, zvive zvi nene lezvi a vavasati lavo va vambiri vo tsumbeka va nga tshama zvin’we cikhatini leco ca lisima nguvhu wutomini gabye!

Hi nga wona lezvi Jesu a nga dzundziswa zvona na a nga se pswaliwa! Elizabheti i mu vitanile ku “Hosi ya mina”, niku a cin’wanana leci ci nga hi lomu ndzeni kakwe ‘ci no tshukuma hi kutsaka’ a cikhati leci Mariya a nga mu losa! Lezvo zvi hambene nguvhu ni lezvi a van’wani va nga guma va mu wonisa zvona Mariya ni n’wana wakwe loyi a nga wa ta pswaliwa, kota lezvi hi to zvi wona.