Mariya i tshamile ni xaka gakwe Elizabheti hi tihweti tinharu. Na ku kiyela kutsongwani kasi Elizabheti a pswala n’wana wakwe, Mariya i no salisa xaka gakwe a sangula lipfhumba lo leha aya kaya kakwe le Nazareta, ku nga hi le n’walungu wa Judha. Ka cikhati leco, ku wo kiyela 6 wa tihweti kasi yenawu a phuluka.

Zvezvi Mariya a nga ku fula, Elizabheti i no sala a phuluka. Zakariya na Elizabheti va tsakile nguvhu lezvi a nga phuluka khwatsi, va tlhela vava ni n’wana wa mu nene wo kala zvitshetshela. A cikhati leci Elizabheti a nga va komba cin’wanana cakwe a vaakelani vakwe ni maxaka, vonawu va no tsaka.

A Nayo lowu Nungungulu a nga nyikile vaIzrayeli wu wa wula lezvaku loku a n’wanana wa mufana a tlhanganisa 8 wa masiku, i wa fanele ku nghenisiwa wukwera, a tlhela a chuliwa vito. (Levhi 12:2, 3) Zakariya na Elizabheti va no ingisa a Nayo lowu, va chula n’wana wabye a ku hi Johani. Kanilezvi, a van’wani va no zvi wona zvi hi chukwana ku va mu chula vito ga papayi wakwe, va ku hi Zakariya. Hambulezvo Elizabheti i no ala, aku: “Kokwihi; i ta vitanwa a ku hi Johani.” (Luka 1:60) Alakanya ku ngilozi Gabriyeli, i wa sina a wulile lezvaku a n’wana loye i fanele ku chuliwa ku hi Johani.

A maxaka ni vaakelani va no zvi sola, va kurumeta vaku: Phela n’wina a mu na ‘xaka gi vitaniwako hi vito legi.’ (Luka 1:61) Va no wulawula hi mawoko va wutisa Zakariya ku i wa lava ku a n’wana wakwe a chuliwa ku hi mani. Zakariya i no kombela cibakwana, a ya hi ku tsala hlamulo wakwe, aku: “A vito gakwe hi Johani.” — Luka 1:63.

Ka cikhati caleco, ku no maheka cihlamaliso! Zakariya i no tekela ku sangula ku wulawula! Kuzvilava wa zvi alakanya lezvaku i mahile mbeveve a cikhati a nga kala ku kholwa lezvi a nga byeliwa hi ngilozi — zvaku a sati wakwe Elizabheti i wa ta pswala n’wana. Lezvi makunu a vaakelani vakwe va nga wona ku Zakariya i sangulile ku wulawula, va no hlamala, va ti wutisa ku: “Xana a n’wanana loyi i ta maha wa kuyini ke?” (Luka 1:66) Va no zvi wona lezvaku Nungungulu i wa nghenele mhaka ya kuchuliwa ka Johani.

 Zakariya i no gumesa a tala hi moya wa ku basa, a wula lezvi: “A yi khesiwe Hosi, a Nungungulu wa Izrayeli, hakuva i endzele a vanhu vakwe ni ku va tirula. I hi vhuxele a limhondzo la ku hanyisa a ndlwini ka Dhavhidha a nandza gakwe”. (Luka 1:68, 69) A cikhati a ngaku “limhondzo la ku hanyisa”, i wa wula Hosi Jesu, loyi a nga ha ta pswaliwa. Zakariya i kombile ni lezvi Nungungulu a to zvi maha hi ku tirisa Jesu. I te: Loku a hi tlhatlhisile mandleni ya valala va hina, i ta hi nyika thomo ga ku “mu tirela na hi nga chavi nchumu, hi kubasa ni kululama mahlweni ka yena masikwini wontlhe ya hina.” — Luka 1:74, 75.

Xungetano hi n’wana wakwe, Zakariya i phrofetile aku: “Wena n’wananga, u ta vitaniwa muphrofeti wa Loyi a Hundzeleleko Kutlakuka, hakuva u ta ranga mahlweni ka Jehovha u longisela tindlela takwe, kasi ku tivisa vanhu vakwe lezvaku i ta va hanyisa hi ku va tsetselela zviwonho zvabye, hi kota ya wuxinji ga Nungungulu wa hina. Hi wuxinji legi, hi tava ni kuwonekela hi le hehla, kasi ku woningela lava va tshamileko munyameni ni ndzhutini wa kufa, ni ku kongomisa mikondzo ya hina ndleleni ya kurula.” (Luka 1:76-79, NM) Handle ko kanakana lezvi Zakariya a nga wula, zvi va tsakisile nguvhu lava va nga zvizwa.

Ka cikhati leco, Mariya i wa chikele kaya kakwe le Nazareta. Hambulezvo, i wa nga se tekwa niku ku wa nga hi na munhu lomu cipandzeni cakwe a nga zvi tiva ku i na ni nyimba. Ka cipimo ci landzelako, hi ta wona lezvi zvi nga maheka laha zvi nga tiveka a ku Mariya i na ni nyimba.