A nyimba ya Mariya makunu yi wa hi ni mune wa tihweti. Kambe wa zvi alakanya ku i tshamile tihweti to sangula ta nyimba yakwe le kaya ka Elizabheti, a xaka gakwe, ku nga kumeka dzongeni wa zvitsunga zva Judha ke? Makunu Mariya i wa tlhelile kaya kabye le Nazareta. Ka cikhati leco, zvi wa ta tiveka ku i na ni nyimba. Hi nga alakanyela tingana ta kona ni lezvi a nga wa ta karatekisa zvona!

A cin’wani ci nga maha ku Mariya a karateka nguvhu hi mhaka leyi, hi ku i wa wutilwe hi muvatli wa ku hi Josefa, loyi yenawu a nga tshama kwalomuya Nazareta. Mariya i wa zvi tiva kambe ku a Nayo wa Nungungulu, wu wa wula lezvaku loku a wasati a wutilweko a vhumela ku hlengela masango ni wanuna wo kari, i wa fanele ku gandliwa hi maribye. (Dhewuteronome 22:23, 24) Hikwalaho, hambu lezvi Mariya a nga zvi tiva ku a nga mahangi wubhayi, kuzvilava i karatekile a ti wutisa ku i ta mu tlhamuselisa kuyini Josefa lezvi a nga xurisile zvona nyimba, ni ku kona zvini a nga wa ta maha Josefa loku a zvizwa.

Ka cikhati leco, ku wa hundza tihweti tinharu Josefa na a nga wonani na Mariya, makunu a zvi kanakanisi ku i wa lava ku mu wona hi mahlo yo pswhuka. Zvi wonekisa ku a cikhati va nga kumana, Mariya i no tekela ku byela Josefa lezvaku i na ni nyimba — a maha zvontlhe a nga zvi kota kasi ku mu kholwisa ku a nyimba leyo i xurile hi moya wa ku basa wa Nungungulu. Hambulezvo, kota lezvi u zvi tivako, zvi mu karatele nguvhu Josefa ku zvi zwisisa ni ku zvi kholwa.

Josefa i wa zvi tiva ku Mariya i wa hi wasati wo tsumbeka niku i wa hi ni nduma ya yi nene. Josefa kambe i wa mu randza nguvhu Mariya. Kanilezvi, hambu lezvi Mariya a nga mu tlhamusele, Josefa nga kholwangi ku a nyimba leyi a nga hi nayo a hi ya wanuna mun’wani. Josefa i wa nga lavi ku Mariya a gandliwa hi maribye kala afa ne ku mu dhanisa lomu ka vanhu. Hi kota ya lezvo, i no maha makungo ya ku mu tsika na zvi nga tiviwi hi munhu. Cikhatini leco, loku a wanuna a wutile wasati wo kari, ja va wa  woniswa ku khwatsi va chadhile. Hikwalaho, loku va lava ku tsikana, va wa fanele ku tlhatlha wukati hi kuya hi nayo.

Josefa i noya a ya etlela na a ha ehleketa khwatsi hi lezvi a nga lava ku zvi maha. Loku na a etlele, i no lora ngilozi ya Jehovha, yi mu byela lezvi: ‘U nga chavi a ku teka Mariya, a sati wa wena; hakuva a nyimba leyi a nga nayo ya moya wa ku basa. I ta beleka mufana, u ta mu chula vito gakwe aku hi Jesu; hakuva hi yena a to hanyisa a vanhu vakwe zviwonhweni zvabye.’ — Matewu 1:20, 21.

A cikhati leci Josefa a nga vhuka, i no tsaka nguvhu hi lezvi makunu a nga yi zwisisile khwatsi a mhaka leyi. I no tekela ku maha lezvi a ngilozi yi nga mu byelile — a teka Mariya a famba naye kaya kakwe. Leyo yi wa hi ndlela ya ku komba vanhu vontlhe lezvaku Josefa na Mariya ja va wa hi sati ni nuna. Lezvo zvi wa fana ni muchadho. Kanilezvi, Josefa a nga hlengelangi masango na Mariya a cikhati leci a nga hi ni nyimba ya Jesu.

Loku ku hundzile tihweti to kari, zvi lavile ku Josefa na Mariya va ti longisela kasi vaya kule nguvhu ni kaya kabye Nazareta — hambu lezvi Mariya a nga sikile hi nyimba. Ka cipimo ci landzelako hi ta wona ku va yile kwihi, ka cikhati leco ku nga kari ku kiyela masiku matsongwani kasi Mariya a phuluka.